شقو باس مەملەكەتتىك سانيتار دارىگەرى مىندەتىن اتقارۋشىنىڭ جاڭا قاۋلىسى جاريالاندى.
قاۋلىدا جازىلعانداي, مەشىتتەردە ناماز (ونىڭ ىشىندە جۇما نامازىن) كەلۋشىلەردى شاحماتتىق رەتتىلىكپەن وتىرعىزىپ, جالپى سىيىمدىلىعىنىڭ 30%-نا دەيىن تولتىرۋمەن وقۋعا رۇقسات بەرىلدى.
1-5 سىنىپتار جانە 9, 11 (12) سىنىپتار اپتانىڭ 6 كۇنىندە ارالاس وقيدى. پاندەردىڭ 70%-ى شتاتتىق رەجيمدە, 30%-ى قاشىقتان وقىتۋ فورماتىندا جۇزەگە اسىرىلادى. «سونداي-اق تولتىرىلۋىن 30%-دان اسىرماي, جالپى سانى 50 ادامعا ەسكە الۋ راسىمدەرىن (اس بەرۋ) وتكىزۋگە, ءبىر وتباسى مۇشەلەرىن قوسپاعاندا كورەرمەندەردى شاحماتتىق رەتتىلىكپەن وتىرعىزىپ, جالپى ادام سانىن 20%-دان اسىرماي سپورتتىق ءىس-شارالاردى وتكىزۋگە بولادى.
بالالاردىڭ ويىن الاڭدارىن, اتتراكتسيونداردىڭ تولتىرىلۋىن 30%-دان اسىرماي, جالپى سانى 50 بالانى كىرگىزىپ جۇمىس ىستەۋگە رۇقسات ەتىلدى» دەلىنگەن قۇجاتتا. ەندى تسيرككە دە بارۋعا بولادى. قويىلار تالاپ – كەلۋشىلەردى شاحماتتىق رەتتىلىكپەن وتىرعىزىپ, جالپى ادام سانىن 30%-دان ارتىق تولتىرماۋ.
«جالپى ادام سانىن 30%-دان اسىرماي بيليارد كلۋبتارى جۇمىس ىستەي باستايدى. جەكە نەمەسە 15 ادامنان اسپايتىن توپتار ءۇشىن ماسكالىق رەجيمدى جانە كەمىندە 2 مەتر قاشىقتىقتى ساقتاي وتىرىپ, ەرەكشە قورعالاتىن تابيعي اۋماقتارعا بارۋعا رۇقسات بەرىلدى. ۇلتتىق قۇراما, كلۋبتىق كوماندالار جانە وبلىستىق كوماندالاردى دايىنداۋ ءۇشىن ءبىر مەزگىلدە 30 ادامنان اسپايتىن مولشەردە وقۋ-جاتتىعۋ جيىندارىن وتكىزۋگە بولادى. بىراق كەزەكشى توپتاردى قوسپاعاندا, مەكتەپكە دەيىنگى مەكەمەلەرگە جانە بالالار ساۋىقتىرۋ لاگەرلەرىنىڭ قىزمەتىنە تىيىم سالىنعان», دەلىنگەن قاۋلىدا.