الماتىدا قالا اكىمىنىڭ تاپسىرماسى بويىنشا كىتاپحانا جۇيەسىن جاڭارتۋ جۇمىستارى جالعاسىن تابۋدا. بىلتىرعى جىلدان بەرى وڭتۇستىك شاھاردا 10 كىتاپحانا جوندەۋدەن وتكەنى بەلگىلى. بۇگىندە قالاداعى 25 كىتاپحانانىڭ 16-سى جاڭا فورماتتا جۇمىس ىستەۋدە.
وسى ورايدا نەگىزى 1936 جىلى قالانعان ي.كرىلوۆ اتىنداعى بالالار كىتاپحاناسى دا زاماناۋي سيپاتقا ەنىپ, مۇندا وقىرماندار ءۇشىن ءتۇرلى ۇيىرمەلەر مەن پرەزەنتاتسيالار وتكىزۋگە ارنالعان بولمەلەر پايدالانۋعا بەرىلدى.
الماتىنىڭ اكىمى ب.ساعىنتاەۆ Instagram-داعى پاراقشاسىندا دا قالانىڭ اۋەزوۆ كوشەسىندەگى 175-عيماراتتا ورنالاسقان ي.كرىلوۆ اتىنداعى قالالىق بالالار كىتاپحاناسىنىڭ اۋقىمدى جوندەۋ جۇمىسىنان كەيىن قايتا اشىلىپ, زاماناۋي ءارى جايلى وقۋ زالدارى مەن ءتۇرلى ۇيىرمەلەردىڭ جۇمىس ىستەيتىندىگى جايىندا جازدى.
بۇگىندە كىتاپحانا قورى 142 مىڭنان استام كىتاپپەن تولىققان. كىتاپحانادا قىزمەت كورسەتۋدىڭ جاڭا ۇلگىسى كوپتەگەن ءىس-شارالاردى جوعارى دەڭگەيدە وتكىزۋگە, سونىمەن قاتار وقىرماندار سانىن 250 مىڭعا دەيىن ارتتىرۋعا مۇمكىندىك بەرەدى. وسى ماقساتتا, قازاق حالقى مەن ەلىمىزدەگى وزگە ەتنوستار وكىلدەرىنىڭ تاريحىن, مادەنيەتىن, سالت-ءداستۇرىن ناسيحاتتاۋعا باعىتتالعان «التىن شاڭىراق» ورتالىعى قىزمەت ەتەتىن بولادى. قولدانىستاعى ۇيىرمەلەرگە قوسىمشا قازاق ءتىلى, شاحمات, دومبىرا ويىنى, اقپاراتتىق-كومپيۋتەرلىك ساۋاتتىلىق مەكتەبى, كرەاتيۆتى شىعارماشىلىق كلۋبى, «جاس عالىم» كلۋبى, «وقيمىز, ۇيرەنەمىز, وينايمىز» ۇيىرمەسى بالالار مەن جاسوسپىرىمدەر ءۇشىن رۋحاني-مادەني شارالاردىڭ ورتالىعىنا اينالماق.
الماتى