26 اقپاندا نيگەريانىڭ سولتۇستىگىندە ۇرلانعان 317 مەكتەپ وقۋشىسى بۇگىن, جەكسەنبىدە بوساتىلدى, دەپ حابارلايدى Egemen.kz نيگەريالىق Vanguard گازەتىنە سىلتەمە جاساپ.
قىزدار قازىرگى ۋاقىتتا جولدا, زامفارا شتاتىنىڭ اكىمشىلىك ورتالىعى گۋساۋ قالاسىنا بارا جاتىر, دەپ اتاپ وتكەن باسىلىم. ولار ءۇشىن تولەم تولەنگەنى نەمەسە تولەنبەگەندىگى تۋرالى دەرەكتەر جوق.
وقۋشىلاردى دجانگەبە قالاسىنداعى قىزدارعا ارنالعان مەملەكەتتىك ورتا مەكتەپ - ينتەرناتتان ۇرلاپ اكەتكەن. فەدەرالدىق قاۋىپسىزدىك كۇشتەرىنىڭ بولىمشەلەرى مەن پوليتسيا سوڭعى ءۇش كۇن بويى تىنىمسىز ىزدەستىرۋ جۇمىستارىن جۇرگىزدى. سونىمەن قاتار شتاتتىڭ بيلىك ورگاندارى قىزداردى قۇتقارۋ ماقساتىندا جەرگىلىكتى قاۋىم وكىلدەرىمەن كەلىسسوزدەر جۇرگىزىپ وتىرعان.