ەلوردادا قازاق كۇرەسىنەن قازاقستان چەمپيوناتى ءوتتى

تاۋەلسىزدىكتىڭ 30 جىلدىعىنا ارنالعان ءىس-شاراعا ەلىمىزدىڭ بارلىق وڭىرلەرىنەن 180 سپورتشى قاتىستى.

جارىس «Qazaq kuresi» قاۋىمداستىعى بەكىتكەن «قازاق كۇرەسى» ەرەجەلەرى بويىنشا وتۋدە. 26-سى كۇنى جالاۋىن كوتەرگەن ءۇش كۇندىك بوز كىلەمدەگى باسەكەدە ەلىمىزدىڭ 17 قۇراماسىنىڭ بالۋاندارى -38, -42, -46, -50, -55, -60, -65, 70, -75, +75 كگ سالماق دارەجەسىندە سىنعا ءتۇسىپ جاتىر.

جارىستىڭ سالتاناتتى اشىلۋ راسىمىنە قر سپورت جانە دەنە شىنىقتىرۋ ىستەرى كوميتەتىنىڭ توراعاسى سەرىك ءساپيۆ, نۇر-سۇلتان قالاسى اكىمىنىڭ ورىنباسارى باقتيار ماكەن جانە «قۇرمەت» وردەنىنىڭ يەگەرى,قر ەڭبەك سىڭىرگەن سپورت شەبەرى, قازاق كۇرەسىنەن حالىقارالىق دارەجەدەگى سپورت شەبەرى ايبەك نۇعىماروۆ قاتىستى.

باقتيار ماكەن ۇلى جارىس قاتىسۋشىلارىنا ساتتىلىك تىلەپ, -50,-55,-60,-65 كەلىدە جەڭىسكە جەتكەن جارىس جەڭىمپازدارى مەن جۇلدەگەرلەرىن ارنايى ماراپاتتادى.

«تاۋەلسىزدىگىمىزدىڭ 30 جىلدىعىنا ارنالعان قازاقشا كۇرەس سايىسىنا قوش كەلدىڭىزدەر. اتا بابامىزدان كەلە جاتقان ءداستۇرلى تۇردە وتەتىن قازاقشا كۇرەس ءوزىنىڭ دەڭگەيىندە وتۋدە. ەلباسىمىز, تۇڭعىش پرەزيدەنت نۇرسۇلتان ءابىش ۇلى نازارباەۆ «ۇلتتىق سپورت تۇرلەرىن سونىڭ ىشىندە, قازاق كۇرەسىن وليمپيالىق ويىندار دەڭگەيىنە دەيىن كوتەرۋگە كۇش سالۋىمىز كەرەك. قازاق سپورتىن دامىتۋعا بارشامىز ۇلەس قوسۋىمىز قاجەت» دەپ ايتقان بولاتىن.

پرەزيدەنتىمىز قاسىم-جومارت كەمەل ۇلى توقاەۆ «قازاقتىڭ ۇلتتىق سپورت تۇرلەرىن لايىقتى جوعارى دەڭگەيدە كورسەتۋ كەرەك»,- دەپ ۇلكەن ماقسات قويدى. سوندىقتان ءبىزدىڭ ارقايسىمىزدىڭ مىندەتىمىز – قازاق سپورتىنىڭ دامۋىنا ءوز ۇلەسىمىزدى قوسۋ. سوندىقتان دا بۇگىنگى جارىستا مىنا جاس سپورتشىلارعا ۇلگى بولىپ جۇرگەن بارشا ازاماتتارعا ساتتىلىك تىلەيمىن», - دەدى ب.ماكەن ءوز سوزىندە.

جارىستىڭ باس تورەشىسى بولات اقجىگىتوۆ كارانتينگە بايلانىستى ءار وڭىردەن ءوز سالماقتارى بويىنشا ءبىر-ءبىر سپورتشى ىرىكتەلىپ الىنعانىن ايتتى.

«چەمپيوناتقا ءار وبلىستان ءبىر ءبىر سپورتشى عانا جولداما الدى. جارىس بارلىق سانيتارلىق نورمالار مەن قاۋىپسىزدىك ەرەجەسىن ساقتاي وتىرىپ وتكىزىلۋدە. جارىسقا رەيتينگتەن وتكەن, ارنايى شاقىرىلعان ۇزدىك 20 تورەشى تورەلىك ەتتى. بارلىق بالۋانداردىڭ دايىندىق دەڭگەيى جاقسى, ءبارى ءبىر دەڭگەيدە, سەبەبى ءبىر جىلدان كەيىنگى ءبىرىنشى جارىسىمىز بولعاندىقتان ءبىراز سپورتشىلارىمىزدىڭ سالماقتارى ءوستى. بارلىعى جوعارى دەڭگەيدە وتۋدە», - دەدى بولات اقجىگىتوۆ.

«قىزىلوردا وبلىسى قىزىلوردا قالاسىنان وسى جارىسقا, ياعني قر چەمپيوناتىنا كەلدىم. ەسىمىم باۋىرجان ۇلى شەيحراحمان. جارىسقا كارانتين رەجيمىندە دايىندالدىق. سول جاعىنان قيىندىقتار بولدى. بۇگىن جارىسقا كەلگەن سپورتشىلاردىڭ بارلىعى مىقتى, وسالى جوق. بەلدەسۋدە مەنىڭ قارسىلاستارىم مىقتى بولدى. بۇگىن مەنىڭ باعىم مەن بابىم شاۋىپ وسى جارىستا جەڭىمپاز اتانىپ, 1-ورىندى يەلەندىم. اقتىق سىندا مەن جامبىل وبلىسىنىڭ بالۋانىمەن بەلدەستىم جانە ونى ايقىن باسىمدىقپەن جەڭدىم»,- دەدى قىزىلوردا وبلىسىنىڭ بالۋانى شەيحراحمان باۋىرجان ۇلى.

ەل چەمپيوناتىنىڭ ۇيىمداستىرۋشىلارى - نۇر-سۇلتان قالاسىنىڭ دەنە شىنىقتىرۋ جانە سپورت باسقارماسى جانە «Qazaq kuresi» قاۋىمداستىعى.