الماتىداعى مەملەكەتتىك ورتالىق مۋزەيدە ءدال وسى اتاۋمەن اتالعان كورمە اشىلدى. كورنەكتى دارىگەر-حيرۋرگ, مەديتسينا عىلىمدارىنىڭ كانديداتى يۆان يۆانوۆيچ ءليدى ەسكە الۋعا ارنالعان ءىس-شارا ادام جانىنىڭ اراشاسىنا اينالعان ابزال جاننىڭ عيبراتتى عۇمىرىنان سىر شەرتەدى.
دەنەسىن دەرت دەندەگەن تالايلاردىڭ ارمان وتىن قايتا مازداتقان كاسىبي شەبەردىڭ ءومىر وتكەلدەرىنە توقتالعاندا, ويىمىزعا ەڭ الدىمەن بۇكىل جان دۇنيەسىمەن دارىگەر ەدى دەگەن ءسوز ورالادى. ءوزىنىڭ دارىگەرلىك قىزمەتىندە ي.ي.لي 7 مىڭعا جۋىق حيرۋرگيالىق, ۋرولوگيالىق جانە ونكولوگيالىق پروفيلدەگى وپەراتسيا جاساعان. ولاردىڭ قاتارىندا قۇرساق قۋىسى ورگاندارىنا جاسالعان جانە ۋرولوگيالىق پلاستيكالىق كۇردەلى وپەراتسيالاردى اتاۋعا بولادى. دارىگەردىڭ ءوز سالاسى بويىنشا 2 پاتەنتى, بىرنەشە عىلىمي ەڭبەگى بار. مايتالمان مامان بۇكىل ادامزات باسىنا كەلگەن COVID-19 تاجتاجالىمەن كۇرەستە الدىڭعى شەپتە ءجۇردى, الايدا ءوزى دە ونىڭ قۇرىعىنان قۇتىلا المادى. 60 جاسقا قاراعان شىعىندا ومىردەن وتكەن ونىڭ ءجۇرىپ وتكەن دارا جولى حالىق جادىندا ماڭگى قالدى.
ءومىر بەلەستەرىنە كوز جىبەرسەك, ول ءوز ءىسىنىڭ ناعىز شەبەرىنە اينالۋ ءۇشىن قىزمەتتىك جولدىڭ بارلىق ساتىسىنان وتكەنىن كورەمىز. يۆان يۆانوۆيچ 1960 جىلى 26 اقپاندا قاراعاندى قالاسىندا دۇنيەگە كەلگەن. 1977 جىلى ورتا مەكتەپتى التىن مەدالمەن اياقتاعاننان كەيىن قاراعاندى مەملەكەتتىك مەديتسينا ينستيتۋتىن تامامداعان. 1985 جىلى قاراعاندى قالاسىنداعى №4 قالالىق كلينيكالىق اۋرۋحانا بازاسىندا حيرۋرگيا بويىنشا ينتەرناتۋرانى, 1991 جىلى الماتى مەملەكەتتىك دارىگەرلەر ءبىلىمىن جەتىلدىرۋ ينستيتۋتىنىڭ ۋرولوگيا كافەدراسىندا ورديناتۋرانى بىتىرگەن. ي.ي.لي جاڭا ۇلگىدەگى مەديتسينالىق ادىستەر جانە قۇرىلعىلارمەن جابدىقتالعان ەمدەۋ-دياگنوستيكالىق ورتالىعىنىڭ دامۋىنا ولشەۋسىز ۇلەس قوسقان جان. ول 2003 جىلى ۋرولوگ-دارىگەر, 2010 جىلى دەنساۋلىق ساقتاۋ ءىسىن ۇيىمداستىرۋشى-دارىگەر رەتىندە جوعارى بىلىكتىلىك كاتەگورياسىن الدى. ەكى مارتە الماتى قالاسى ءماسليحاتىنىڭ دەپۋتاتى بولىپ سايلاندى.
تالانتتى حيرۋرگتىڭ دەنساۋلىق ساقتاۋ سالاسىنا سىڭىرگەن ەڭبەگى ەلەنىپ «پاراسات», «قۇرمەت», «گيپپوكرات», «ن.ي. پيروگوۆ» وردەندەرى, «دەنساۋلىق ساقتاۋ ىسىنە قوسقان ۇلەسى ءۇشىن», «AVICENNA» مەرەكەلىك التىن جۇلدىز, «التىن دارىگەر» بەلگىسىمەن, حالىقارالىق «United Europe» سىيلىعىمەن, سونىمەن قاتار «ۇلتتىق مەديتسينالىق اسسوتسياتسياسىنا 25 جىل», «استاناعا – 20 جىل», «قازاقستان رەسپۋبليكاسى تاۋەلسىزدىگىنە 20 جىل», «ارميا گەنەرالى س.ق.نۇرماعامبەتوۆ» مەدالدارىمەن ماراپاتتالعان.
كورمەگە ي.ي.ءليدىڭ مەكتەپ قابىرعاسىنداعى كەزى, سونداي-اق ەڭبەك جولىنا بايلانىستى 100-دەن اسا جەكە زاتتارى, اتاپ ايتقاندا ماراپاتتارى, فوتوسۋرەتتەرى مەن كىتاپتارى, وعان تارتۋ ەتىلگەن ءتۇرلى كادەسىيلار قويىلعان. كورمە 2021 جىلدىڭ 26 ناۋرىزىنا دەيىن جالعاسادى.
الماتى