استانا قالاسىندا 2016-2017 جىلدار ارالىعىندا جول سالىنىپ, جارامسىز تۇرعىن ۇيلەر رەتكە كەلتىرىلەدى.بۇل تۋرالى «قازاقستان جاڭالىقتارى» اگەنتتىگى حابارلادى.
بۇگىن, پرەزيدەنت جانىنداعى ورتالىق كوممۋنيكاتسيالار قىزمەتىندە وتكىزىلگەن بريفينگتە استانا قالاسىنىڭ اكىمى يمانعالي تاسماعامبەتوۆ 2017 جىلعا دەيىن بۇزىلاتىن تۇرعىن ءۇيدىڭ يەلەرىنە جاڭا پاتەر بەرىلەتىنىن مالىمدەدى. بۇزىلاتىن جارامسىز تۇرعىن ۇيلەردىڭ كولەمى شامامەن 150 مىڭ شارشى مەتر قۇرايدى ەكەن.
«جالپى الاتىن بولساق, قالا قالىپتاسقالى بەرى 12 ملن. شارشى مەتر تۇرعىن ءۇي سالىنىپ, پايدالانۋعا بەرىلدى. مەملەكەتتىك قولداۋدىڭ بارلىق تەتىكتەرى مەن باعدارلامالارى بويىنشا, 18 مىڭ وتباسى نەمەسە 60مىڭ ادام جەكە ۇيگە قول جەتكىزگەن»,-دەپ اتاپ ءوتتى ءسوز ورايىندا قالا باسشىسى.سونداي-اق ول جول-كولىك قوزعالىسىنا قاتىستى بىلاي دەدى: «جەڭىل رەلستى كولىك (جرك) جوباسىن حالىقارالىق قارجى ۇيىمدارىنىڭ ەسەبىنەن جۇزەگە اسىرۋ جوسپارلانعان بولاتىن. اتاپ ايتقاندا, ازيا دامۋ بانكى ارقىلى قارجىلاندىرۋ قاراستىرىلدى. اتالعان بانك ەكونوميكالىق جانە الەۋمەتتىك تيىمدىلىكتەر پاكەتىن تولىق تالداپ شىعىپ, جوبا اسا قىمبات دەگەن قورىتىندى جاسادى. مىسالى, ۇزىندىعى 21,4 شاقىرىم بولاتىن جەڭىل رەلستى كولىك جوباسىنىڭ ءبىرىنشى بولىگىنە 250 ملرد. تەڭگە جۇمسالادى ەكەن. ال ارنايى سالىنعان جولدارمەن جىلدام جۇرەتىن باعىتتىق اۆتوبۋستار (برت) جەلىسىنىڭ وسىنداي ۋچاسكەسىنە 85 ملرد.تەڭگە قاراستىرىلعان. جالپى, وسى ەكى جوبانىڭ باعا ايىرماشىلىعى 151 ملرد. تەڭگەنى قۇراپ وتىر. سوندىقتان سوڭعى اتالعان جوبانىڭ ءبىرىنشى جەلىسىن 2016 جىلى اياقتاۋ تۋرالى شەشىم قابىلداندى».
بۇل ءىس قالا جولدارىنداعى كولىك كەپتەلىسىن بولدىرماۋ ماقساتىمەن قولعا الىنعالى وتىر. ول بويىنشا اتقارىلاتىن جۇمىستاردى تياناقتى اتقارۋ جاۋاپتى تۇلعالارعا تاپسىرىلدى.
باقىتبەك كەنەش ۇلى.
دەرەككوز: «قازاقستان جاڭالىقتارى» اگەنتتىگى
فوتو: Yvision.kz