بۇل تۋرالى قر ەكولوگيا, گەولوگيا جانە تابيعي رەسۋرستار مينيسترلىگى ۇيىمداستىرعان بريفينگ بارىسىندا حابارلاندى. مينيسترلىكتىڭ ەكولوگيالىق رەتتەۋ جانە باقىلاۋ كوميتەتىنىڭ توراعاسى زۇلفۇحار جولداسوۆ «ارسەلورميتتال تەمىرتاۋ» اق-داعى جاقىندا بولعان اۆاريالىق جاعدايعا قاتىستى اقپارات بەردى, دەپ حابارلايدى Egemen.kz
كوميتەت باسشىسىنىڭ سوزىنە قاراعاندا, 19 اقپاندا كومپانيانىڭ كونۆەرتەر تسەحتارىنىڭ بىرىندە تازارتۋ جابدىقتارىنىڭ جۇمىسىندا اقاۋلار بولعان. وسىعان بايلانىستى ءبىر ساعاتتىڭ ىشىندە بۇكىل گاز كولەمى قورشاعان ورتاعا تازارتۋسىز كىردى. اۋماقتىق ەكولوگيا دەپارتامەنتى جەدەل تۇردە بۇل فاكت بويىنشا جوسپاردان تىس تەكسەرۋ جۇرگىزدى.
«قازىر ءبىزدىڭ ماماندار كاسىپورىندا, تەكسەرۋ جۇرگىزىلۋدە. ەڭ باستىسى, ءبىز كەلەسى ماسەلەلەر بويىنشا شارالار قابىلدايمىز – ۋاقتىلى حابارلاماۋ, نورماتيۆتەردەن اسىپ كەتۋ, تازارتۋ قۇرىلىستارىن پايدالانۋدى بۇزۋ, ساراپتامادان اۋىتقۋ», - دەپ اتاپ ءوتتى كوميتەت توراعاسى.
ول سونداي-اق وسى وقيعاعا بايلانىستى ەكولوگيا مينيسترلىگىنىڭ باسشىسى ماعزۇم مىرزاعاليەۆ «ارسەلورميتتال» كومپانياسىنىڭ ۆيتسە-پرەزيدەنتى ۆيجاي گويال مىرزامەن كەزدەسكەنىن حابارلادى. كەزدەسۋ بارىسىندا مينيستر كاسىپورىن ءوندىرىسىن ەكولوگيالاندىرۋ بويىنشا ناقتى تاپسىرمالار بەردى. اتاپ ايتقاندا, جاڭا ەكولوگيالىق كودەكسكە سايكەس ەڭ وزىق قولجەتىمدى تەحنولوگيالارعا كوشۋدى جۇزەگە اسىرۋ, ەميسسيالار مونيتورينگىنىڭ اۆتوماتتاندىرىلعان جۇيەسىن ەنگىزۋ جانە تەمىرتاۋدا 500 مىڭ اعاش وتىرعىزۋ.
سونىمەن قاتار, زۋلفۋحار جولداسوۆ «ارسەلورميتتال تەمىرتاۋ» جۇمىسىنداعى جۇيەلى پروبلەمالاردىڭ ءبىرى جەو-نىڭ ەسكىرگەن جابدىقتارى بولىپ تابىلاتىنىن حابارلادى.
«تەمىرتاۋ-اۋاسى بارىنشا لاستانعان قالا. قازگيدرومەتتىڭ مالىمەتتەرى بويىنشا 2 جىل ىشىندە لاستانۋ دەڭگەيىنىڭ 10 ەسەدەن استامعا ارتۋىنىڭ 67 جاعدايى تىركەلدى. شىعارىندىلاردىڭ نەگىزگى ۇلەسى «ارسەلورميتتال تەمىرتاۋعي» تيەسىلى. جۇرگىزىلگەن تەكسەرۋلەر كەزىندە كاسىپورىندا شاڭ بويىنشا رۇقسات ەتىلگەن نورمالاردان 125 ەسە اسىپ كەتۋ تىركەلدى», دەدى سپيكەر.
زۇلفۇحار جولداسوۆ كومپانيانىڭ تابيعاتتى قورعاۋ ءىس-شارالارى قاعاز جۇزىندە عانا «جۇمىس ىستەيتىنىن» اتاپ ءوتتى.
ء«بىز كومپانيانىڭ تابيعاتتى قورعاۋ ءىس-شارالارىنىڭ تيىمدىلىگىن تالدادىق. ماسەلەن, سوڭعى 5 جىلدا كاسىپورىن تابيعاتتى قورعاۋ ءىس-شارالارىنا 28 ملرد.تەڭگە جۇمسادى, ناتيجەسىندە شىعارىندىلار تەك 190 تونناعا عانا تومەندەتىلدى, بۇل شىعارىندىلاردىڭ جالپى كولەمىنىڭ 0,08%-ى»,- دەدى كوميتەت باسشىسى.