بۇگىن ماجىلىستە بىرىككەن ۇلتتار ۇيىمى ايەلدەر جاعدايى جونىندەگى كوميسسياسىنىڭ 65-ءشى سەسسياسىنا دايىندالۋ ماقساتىندا ورتالىق ازيا ەلدەرىنىڭ كوشباسشى ايەلدەر ديالوگىنىڭ كونسۋلتاتسيالارى ونلاين فورماتتا ءوتتى, دەپ حابارلايدى Egemen.kz.
ءىس-شاراعا وزبەكستان رەسپۋبليكاسى ولي ماجليس سەناتىنىڭ توراعاسى, ورتالىق ازيا ەلدەرى كوشباسشىلارى ايەلدەر ديالوگىنىڭ توراعاسى ت.نارباەۆا جەتەكشىلىك ەتىپ, تۇركمەنستاننان, قىرعىزستاننان, تاجىكستاننان پارلامەنت وكىلدەرى قاتىستى.
قازاقستاندىق تاراپتان ءماجىلىس توراعاسىنىڭ ورىنباسارى ب. كەسەباەۆا جانە دەپۋتاتتار ا.قۇسپان مەن ل. رامازانوۆا قاتىستى. وتىرىس بارىسىندا قوعامدىق ومىرگە تولىققاندى جانە ءتيىمدى قاتىسۋ جانە شەشىمدەر قابىلداۋ ءۇشىن گەندەرلىك تەڭدىك, ايەل-كوشباسشىلار تۋرالى بىرقاتار ماسەلەلەر كوتەرىلىپ, تالقىلاندى.
ءوز كەزەگىندە ۆيتسە-سپيكەر بالايم كەسەباەۆا ايەلدەردىڭ جاعدايى, ولاردىڭ قۇقىقتارى مەن مۇمكىندىكتەرىن ىسكە اسىرۋدا تەڭدىككە قول جەتكىزۋ ماسەلەلەرى كوپتەگەن مەملەكەتتەر, سونىڭ ىشىندە ورتالىق ازيا ەلدەرى مەن قازاقستان ءۇشىن وزەكتى بولىپ قالا بەرەتىنىنە نازار اۋدارىپ, قازاقستاننىڭ قالىپتاسۋ جىلدارىندا بۇل باعىتتا كوپتەگەن جۇمىستار اتقارىلعانىنا توقتالدى.
سونىمەن قاتار ۆيتسە-سپيكەر تۇڭعىش پرەزيدەنت-ەلباسى نۇرسۇلتان ءابىش ۇلى نازارباەۆتىڭ باستاماسىمەن ەلدە ساياسي, ەكونوميكالىق, الەۋمەتتىك جانە رۋحاني جاڭعىرتۋ بويىنشا كەشەندى شارالار جانە ۇلتتىق دەڭگەيدە 2030 جىلعا دەيىنگى وتباسىلىق جانە گەندەرلىك ساياسات تۇجىرىمداماسى قابىلدانىپ, ىسكە اسىرىلىپ جاتقانىنا نازار اۋداردى.
سونداي-اق ەلىمىزدە ايەلدەر ساياسات پەن ەكونوميكانىڭ بارلىق سالالارىندا جۇمىس ىستەپ جاتقانىن ايتىپ, ولاردىڭ كاسىپكەرلىك باستامالارىن دامىتۋ ءۇشىن وقىتۋ, جەكە بيزنەسىن اشۋعا جاردەمدەسۋ بويىنشا ارنايى شارالار قابىلدانعانىن تىلگە تيەك ەتتى.
«مەملەكەت باسشىسىنىڭ تاپسىرمالارىنا سايكەس ايەلدەر مەن بالالاردىڭ قۇقىقتارىن جان-جاقتى قولداۋعا جانە قورعاۋعا باعىتتالعان قولدانىستاعى زاڭناما نورمالارى جەتىلدىرىلۋدە», دەدى ب.كەسەباەۆا.
وسىعان سايكەس, بيىلعى جىلدىڭ باسىنان باستاپ كامەلەتكە تولماعاندارعا قاتىستى زورلىق-زومبىلىق سيپاتتاعى قىلمىس جاساعانداردىڭ جازاسى قاتاڭداتىلدى.
پىكىر-تالاس بارىسىندا ب.كەسەباەۆا جاھاندىق داعدارىستان كەزەڭ-كەزەڭىمەن شىعۋ ۇسىنىمدارىن ازىرلەۋگە باعىتتالۋى ءتيىس داعدارىسقا قارسى ورتالىق قۇرۋدى جانە ايەلدەر مەن بالالاردىڭ قۇقىقتارىن قورعاۋدىڭ ىسكە اسىرىلىپ جاتقان مەملەكەتتىك شارالارى بويىنشا ەلدەر اراسىنداعى وزىق تاجىريبەنى جەدەل الماسۋدىڭ بىرىڭعاي بانكىسىن قۇرۋدى, ايەلدەردىڭ مەنشىكتىڭ بارلىق نىساندارىنا, قارجىلىق قىزمەتتەرگە يەلىك ەتۋگە جانە باقىلاۋعا قول جەتكىزۋىن ۇلعايتۋعا قاتىستى جانە حالىق اراسىندا گەندەرلىك تەڭدىك تۋرالى اقپاراتتى ارتتىرۋ سياقتى ءبىرشاما ماسەلەلەردى ۇسىندى.
قاتىسۋشىلار وتىرىستا ورتالىق ازيا كوشباسشىلارى ايەلدەرىنىڭ ديالوگىنىڭ 2021 جىلعا ارنالعان ءىس-قيمىل جوسپارىنىڭ جوباسىن تالقىلادى. وسى رەتتە ۆيتسە-سپيكەر قازاقستان الماتى قالاسىنداعى حالىقارالىق ۇيىمدار عيماراتى بازاسىندا گەندەرلىك تەڭدىك جانە ايەلدەردىڭ قۇقىقتارى مەن مۇمكىندىكتەرىن كەڭەيتۋ سالاسىنداعى وڭىرلىك ءبىلىم ورتالىعىن قۇرۋدى بىرنەشە كوتەرگەنىن اتاپ ءوتتى.
«سونداي-اق, 2021 جىلى ءبىزدىڭ بىرلەسكەن كۇش-جىگەرىمىزدى ەكونوميكالىق مۇمكىندىكتەردى كەڭەيتۋ جانە اۋىلدىق جەرلەردەگى ايەلدەردى قولداۋ ماسەلەلەرىن تالقىلاۋعا باعىتتاعان ءجون دەپ سانايمىن. جەر-جەرلەردە لوكداۋن كەزەڭىندە شالعايداعى اۋىلدىق وڭىرلەردەگى ايەلدەر, ادەتتە, قارجىلىق جانە باسقا رەسۋرستارعا, ونىڭ ىشىندە ينفراقۇرىلىم مەن تەحنولوگيالارعا قول جەتكىزە المادى. بۇل تۇرعىدا ءبىزدىڭ وڭىردەگى اۋىلدىق جەرلەردەگى ايەلدەردىڭ جاعدايى ورتالىق ازيا ەلدەرىنىڭ كوپشىلىگىنە ءتان جانە كۇن تارتىبىندەگى وزەكتى ماسەلە», دەدى ب. كەسەباەۆا.