مارزيا وسپانوۆا – جۇزدەن اسا ناۋقاسقا ءساتتى رەانيماتسيا جاساپ, اجالدان اراشالاپ قالعان ابزال جانداردىڭ ءبىرى. بىلىكتى مامان جەدەل جاردەم قاجەت ەتەتىن ناۋقاستارعا شۇعىل كومەك كورسەتۋدە ءوزىنىڭ كاسىبيلىگىن تانىتىپ كەلەدى.
مارزيا تويشىبەكقىزى شىمكەنت قالاسىنداعى جەدەل جاردەم ستانتسياسىندا 32 جىلدان بەرى ەڭبەك ەتەدى. جەدەل مەديتسينالىق كومەك كورسەتۋ ستانتسياسىنىڭ قىزمەتكەرى ومىرگە قاۋىپ توندىرەتىن جاعدايلار, جازاتايىم وقيعالاردان زارداپ شەككەن ازاماتتارعا شۇعىل مەديتسينالىق كومەك كورسەتەدى.
– 103 قىزمەتىندە ءساتتى رەانيماتسيالىق كومەك كورسەتۋ وتە ماڭىزدى. ويتكەنى, ءبىز ءساتتى رەانيماتسيالىق كومەك كورسەتۋ ارقىلى جۇرەگى توقتاپ قالعان ناۋقاستاردى اجالدان اراشالاپ قالامىز. بىرنەشە جىل بۇرىن ءساتتى رەانيماتسيا جاساعانىم ەرەكشە ەسىمدە قالدى. قالاداعى ءدامحانالاردىڭ بىرىنەن شاقىرتۋعا تۇسكەن. ينفاركت العان ەر كىسىگە ششۇعىل مەديتسينالىق قىزمەت كورسەتتىك. رەانيماتسيالىق كومەك كورسەتۋ وتە قيىن ءوتتى. دەگەنمەن بارلىعى ءساتتى اياقتالىپ, ناۋقاستى كارديولوگيالىق ورتالىققا جەتكىزدىك. وسىنداي ءاربىر كۇردەلى جاعدايلاردا شىڭدالىپ, تاجىريبەمدى ارتتىرىپ كەلەمىن, – دەيدى فەلدشەردىڭ ءوزى.
م.وسپانوۆا – قازىرگى ۋاقىتتا جەدەل جاردەم قىزمەتىندەگى فەلدشەرلەردىڭ تالىمگەرى. ولارمەن ۇنەمى پراكتيكالىق داعدىلار بويىنشا وقىتۋ جۇرگىزەدى. ءتۇرلى شۇعىل جاعدايلاردا ناۋقاستاردى قۇتقارادى جانە كومەك كورسەتۋدە ايانباي ەڭبەك ەتىپ كەلەدى. مارزيا وسپانوۆا بىرنەشە رەت رەسپۋبليكالىق سايىستارعا قاتىسىپ, ۇزدىكتەر قاتارىنان كورىنگەن.