پرەمەر-مينيستر اسقار ءماميننىڭ توراعالىعىمەن وتكەن ۇكىمەت وتىرىسىندا ۇكىمەت, ۇلتتىق بانك جانە قارجى نارىعىن رەتتەۋ جانە دامىتۋ اگەنتتىگى (قنردا) اراسىنداعى 2021-2023 جىلدارعا ارنالعان ماكروەكونوميكالىق ساياسات شارالارىن ۇيلەستىرۋ تۋرالى كەلىسىم قارالدى, دەپ حابارلايدى Egemen.kz.
پرەمەر-مينيستر اتالعان كەلىسىم ۇكىمەت پەن قارجى رەتتەۋشىلەرىنىڭ كەلىسىلگەن ءىس-قيمىلدارىن قازىرگى جاعدايلاردا قامتاماسىز ەتۋگە مۇمكىندىك بەرەتىنىن اتاپ ءوتتى.
«حالىقتىڭ تۇرمىس دەڭگەيى مەن ءال-اۋقاتىن ارتتىرۋ – ەلىمىزدىڭ الەۋمەتتىك-ەكونوميكالىق ساياساتىنىڭ نەگىزگى باسىمدىعى. ول ءۇشىن اقشا-نەسيە, سالىق-بيۋدجەت جانە قۇرىلىمدىق ساياساتتاردى, سونداي-اق قارجى سەكتورىن دامىتۋ ساياساتىن ۇيلەستىرۋ قامتاماسىز ەتىلەدى», دەدى ا. مامين.
بىرلەسكەن شارالاردى ىسكە اسىرۋ ءۇش باعىت بويىنشا جۇزەگە اسىرىلاتىن بولادى. «ماكروەكونوميكالىق تۇراقتىلىقتى ارتتىرۋ» باعىتى اياسىندا تومەن ينفلياتسيا, قارجى جۇيەسىنىڭ تۇراقتىلىعى مەن ەكونوميكانىڭ ءوسۋى اراسىنداعى تەڭگەرىمدى قامتاماسىز ەتە وتىرىپ, ىسكەرلىك بەلسەندىلىكتى ىنتالاندىرۋ بويىنشا شارالار قابىلدانادى. ينفلياتسيانى بىرتىندەپ تومەندەتۋ جانە ونى ورنىقتى ەكونوميكالىق وسىمگە ىقپال ەتەتىن تومەن دەڭگەيدە ساقتاۋ جونىندەگى جۇمىس جالعاستىرىلاتىن بولادى. «قارجى نارىعىن دامىتۋ» ەكىنشى باعىتىن ىسكە اسىرۋ قارجى سەكتورىن دامىتۋدىڭ 2030 جىلعا دەيىنگى تۇجىرىمداماسىن قابىلداۋدى كوزدەيدى.
قارجى جۇيەسىنىڭ تۇراقتىلىعىن جانە ەكونوميكانىڭ ءوسۋىن قامتاماسىز ەتۋ قاجەتتىلىگىن ەسكەرە وتىرىپ, نارىقتىق تەتىكتەر نەگىزىندە ەكونوميكانى بانكتىك كرەديتتەۋدى ەداۋىر كەڭەيتۋ جونىندە شارالار قابىلداناتىن بولادى.
«ەكونوميكالىق ءوسىمنىڭ ۇزاق مەرزىمدى الەۋەتىن ارتتىرۋ» ءۇشىنشى باعىتى اياسىندا باسەكەگە قابىلەتتى شيكىزاتتىق ەمەس سەكتورعا نەگىزدەلگەن ەكونوميكانىڭ جاڭا قۇرىلىمىن قالىپتاستىرۋدى ىنتالاندىرۋ, قوسىلعان قۇننىڭ وڭىرلىك جانە جاھاندىق تىزبەكتەرىنە ەندىرۋ بويىنشا جۇمىس جالعاسادى. پرواكتيۆتى سىرتقى ساۋدا ساياساتىن جۇرگىزۋ, سونداي-اق ينۆەستيتسيالاردىڭ جاڭا تولقىنىن تارتۋ جالعاستىرىلادى.
«ەكونوميكانىڭ ساپالى جانە ورنىقتى دامۋى ءۇشىن تۇبەگەيلى جاڭا ينستيتۋتسيونالدىق جاعداي جاسالىنادى. ول جاڭا ەكونوميكالىق جاعدايدا حالىقتىڭ تۇرمىس ساپاسى مەن ءال-اۋاتىنىڭ ارتۋىنا ىقپال ەتەدى», دەدى ا. مامين.
پرەمەر-مينيستر بارلىق مۇددەلى مەملەكەتتىك ورگاندارعا كەلىسىم ءىس-شارالارىنىڭ بەلگىلەنگەن مەرزىمدە ساپالى ورىندالۋىن قامتاماسىز ەتۋدى تاپسىردى.