شىمكەنتتە كوروناۆيرۋس «باعدارشامى» «جاسىل ايماقتى» كورسەتىپ تۇر. دەگەنمەن جايباراقات بولۋعا تاعى بولمايدى. سەبەبى ىندەتتىڭ بەتى ءالى تولىق قايتقان جوق. ەندى نە ىستەۋ كەرەك؟ ازىرگە ىندەتتىڭ الدىن الۋدىڭ ەڭ باستى شاراسى ۆاكتسينا سالدىرۋ مەن كارانتين شارالارىن ساقتاۋ بولىپ تۇر.
وسىعان وراي شىمكەنتتە كارانتين ۋاقىتى 8 ناۋرىزعا دەيىن ۇزارتىلدى. بۇل تۋرالى شىمكەنت قالاسىنىڭ باس مەملەكەتتىك سانيتارلىق دارىگەرى ءابدىماناپ تولەباەۆتىڭ جاڭا قاۋلىسىندا ايتىلدى. «شىمكەنت اۋماعىنداعى كارانتين مەن شەكتەۋ شارالارى 2021 جىلدىڭ 22 اقپان ساعات 00.00-دەن 2021 جىلدىڭ 8 ناۋرىزى ساعات 00.00-گە دەيىن ۇزارتىلسىن», دەلىنگەن قۇجاتتا. وسى ۋاقىت ارالىعىندا قالا تۇرعىندارى مەن قوناقتارىنا ادامدار كوپ جينالاتىن ءىس-شارالاردى, ونىڭ ىشىندە ەسكە الۋ, تۋعان كۇن, مەرەيتوي, قۇدالىق, توي جانە باسقا دا ءىس-شارالاردى وتكىزۋگە تىيىم سالىنادى. سونداي-اق شاھاردا 65 جاستان اسقان ادامداردىڭ ءجيى ءجۇرىپ-تۇرۋى شەكتەلەدى. ءارى تۇرعىندارعا ەكى مەتردەن كەم ەمەس الەۋمەتتىك قاشىقتىقتى ساقتاپ, بەتپەردە تاعۋ مىندەتتەلگەن.
شاھار «جاسىل ايماقتا» تۇر دەگەن اتى بولماسا, COVID-19 ىندەتىن جۇقتىرعاندار سانى ءالى دە ازايار ەمەس. قالادا 24 قاڭتار مەن 19 اقپان ارالىعىندا COVID-19 اۋرۋىنىڭ 6 040 جاعدايى تىركەلگەن. ونىڭ 3 075-ءى سيمپتومدى بولسا, 2965-ءى – سيمپتومسىز. جالپى 5 510 ادام ەمدەلىپ شىققان. سونداي-اق 18 اقپاندا كوروناۆيرۋس ينفەكتسياسىن جۇقتىرعان 10 جاعداي تىركەلگەن. قازىرگى ۋاقىتتا قالادا ناۋقاستاردى قابىلداۋعا ارنالعان 1 060 توسەكتىك ورىن بار (جۇقپالى – 560, كارانتيندىك – 500). ونىڭ ىشىندە 890-ى بوس. ال جۇقپالى جانە كارانتيندىك اۋرۋحانالاردا 170 ناۋقاس ەم قابىلداۋدا.
عالىمدار ەلىمىزدە سالىنىپ جاتقان سپۋتنيك V ۆاكتسيناسىنىڭ وڭ اسەرى, پايداسى تۋرالى ءجيى ايتا باستادى. جاقسى جاڭالىق ساناسىن قورقىنىش بيلەگەن ەل تۇرعىندارىنا سەنىم مەن جىگەر بەردى. وسىلايشا, ازاماتتار ءوز ەركىمەن ەكپە ەكتىرە باستادى. ماسەلەن, شىمكەنتتە 19 اقپانعا دەيىن كوروناۆيرۋسقا قارسى سپۋتنيك V ۆاكتسيناسىنىڭ ءبىرىنشى كومپونەنتى بويىنشا ەرىكتى تۇردە 1 مىڭ ادامعا ەكپە سالىندى. اتاپ ايتار بولساق, ەكپە العاندار: باستاپقى مەديتسينالىق-سانيتارلىق كومەك كورسەتۋ ۇيىمدارىنان – 472, مەديتسينالىق جەدەل جاردەم كورسەتۋ مەكەمەسىنەن – 94, ينفەكتسيالىق اۋرۋحانادان – 54 مەديتسينا قىزمەتكەرى, سونداي-اق باسقا اۋرۋحانالاردان – 298, سانيتارلىق-ەپيدەميالىق باقىلاۋ قىزمەتىنەن – 78 جانە 4 ەرىكتى قالا تۇرعىنى.
بۇگىندە كوروناۆيرۋس ينفەكتسياسىنا قارسى ەكپە ەگىلگەن ازاماتتاردىڭ دەنساۋلىعى جاقسى. ەكپەدەن كەيىن اسقىنۋلار تىركەلمەگەن. العاش ەكپە العان 1 مىڭ ادامعا 23 اقپاننان باستاپ سپۋتنيك V ۆاكتسيناسىنىڭ ەكىنشى كومپونەنتى سالىنا باستايدى. شىمكەنت قالالىق اقپاراتتىق-كوممۋنيكاتسيالىق ورتالىعىندا وتكەن بريفينگتە قالالىق دەنساۋلىق ساقتاۋ باسقارماسىنىڭ باسشىسى باقىتجان پوزيلوۆ وسىلاي دەپ مالىمدەدى. ءباسپاسوز ماجىلىسىندە شاھاردىڭ باس دارىگەرى قالاداعى ەپيدەميالىق احۋال مەن ۆاكتسينالاۋ جۇمىستارى بويىنشا باياندادى.
«شىمكەنت قالاسىندا كوروناۆيرۋسقا قارسى 1 مىڭ دوزا سپۋتنيك V پرەپاراتىنىڭ ءبىرىنشى كومپونەنتىن سالۋ تولىق اياقتالدى. اتالعان ەكپەنى ەرىكتى تۇردە العاشقى مەديتسينالىق-سانيتارلىق كومەك كورسەتۋ ۇيىمدارى, جەدەل جاردەم كورسەتۋ مەكەمەلەرى, ينفەكتسيالىق اۋرۋحانا جانە سانيتارلىق-ەپيدەميالىق باقىلاۋ قىزمەتكەرلەرى قابىلدادى», دەدى باقىتجان جولداسبەك ۇلى. باسقارما باسشىسىنىڭ ايتۋىنشا, ەكىنشى كەزەڭدە ۆاكتسينا پەداگوگتەرگە سالىنادى. بۇل قىزمەتكەرلەرگە وتاندىق Qazcovid-In ۆاكتسيناسى ەگىلەدى.
قازىرگى تاڭدا شىمكەنتتە ەپيدەميالىق جاعداي تۇراقتى. اۋرۋحانالاردا توسەكتىك ورىن جەتكىلىكتى. قويمالارداعى ءدارى-دارمەك قورى دا كوڭىل كونشىتەرلىك جاعدايدا.
شىمكەنت