بۇرىنعى دەپۋتات «فيلوسوفيا, ساياساتتانۋ جانە ءدىنتانۋ ينستيتۋتى» باسشىسىلىعىنا باردى

سەرىك تۇرار ۇلى 1957 جىلعى 15 اقپاندا الماتى قالاسىندا تۋعان, قازاق. ۇيلەنگەن, ءۇش قىزى جانە ۇلى بار. ماسكەۋ حيميالىق ماشينا جاساۋ ينستيتۋتىن (1979 ج.) – حيميالىق-تەحنولوگيالىق پروتسەستەردى اۆتوماتتاندىرۋ ينجەنەرى, بلكجو وك جانىنداعى جوعارى كومسومول مەكتەبىن (1984 ج.) – ساياساتتانۋشى, كوكپ وك قوعامدىق عىلىمدار اكادەمياسىن (1991 ج.) – الەۋمەتتانۋشى ماماندىعى بويىنشا بىتىرگەن. الەۋمەتتىك عىلىمدار دوكتورى, پروفەسسور, قازاقستان رەسپۋبليكاسى ۇلتتىق عىلىم اكادەمياسىنىڭ اكادەميگى.

ەڭبەك جولىن جاڭا-جامبىل فوسفور زاۋىتىندا ازوت-وتتەگى تسەحىنىڭ باقىلاۋ-ولشەۋ جانە اۆتوماتتاندىرۋ شەبەرى (1979-1981 جج.) بولىپ باستاعان. كومسومول ورگاندارىندا قىزمەت اتقارعان. تاۋەلسىزدىك كەزەڭىندە قازاقستان رەسپۋبليكاسىنىڭ پرەزيدەنتى اپپاراتى اقپارات-تالداۋ ورتالىعىنىڭ اعا رەفەرەنتى, سەكتور مەڭگەرۋشىسى, باسشىسىنىڭ ورىنباسارى (1993-1995 جج.), قازاقستان حالقى اسسامبلەياسى اتقارۋشى حاتشىلىعىنىڭ مەڭگەرۋشىسى (1995-1997 جج.), قازاقستان رەسپۋبليكاسى جاستار ءىسى, تۋريزم جانە سپورت ءمينيسترىنىڭ ورىنباسارى (1997 ج.), قازاقستان رەسپۋبليكاسى ءبىلىم جانە مادەنيەت مينيسترلىگى ۇيلەستىرۋ جانە باقىلاۋ دەپارتامەنتىنىڭ ديرەكتورى (1997 ج.), «كراۋ» بىرلەسكەن كاسىپورنىنىڭ باس ديرەكتورى (1997-1998 جج.), قازاقستان رەسپۋبليكاسى پارلامەنتى اقپارات-تالداۋ ورتالىعىنىڭ ديرەكتورى (1998-2002 جج.), قازاقستان رەسپۋبليكاسى پرەزيدەنتى اكىمشىلىگىنىڭ ىشكى ساياسات ءبولىمى مەڭگەرۋشىسىنىڭ ورىنباسارى (2002-2004 جج.), قازاقستان رەسپۋبليكاسى پرەزيدەنتى اكىمشىلىگىنىڭ ىشكى ساياسات باسقارماسى الەۋمەتتىك-ساياسي ءبولىمىنىڭ باس ينسپەكتورى (2004 ج.), قازاقستان رەسپۋبليكاسى پرەزيدەنتى اكىمشىلىگىنىڭ بۇقارامەن بايلانىس جانە ءباسپاسوز ءبولىمىنىڭ مەڭگەرۋشىسى (2004-2005 جج.), قازاقستان رەسپۋبليكاسى پرەزيدەنتى اكىمشىلىگىنىڭ الەۋمەتتىك-ساياسي ءبولىمى مەڭگەرۋشىسىنىڭ ءبىرىنشى ورىنباسارى (2005 – 2006 جج.), الماتى قالاسى اكىمىنىڭ ورىنباسارى (2006-2013 جج.) بولىپ جۇمىس ىستەدى. 2013 جىلعى اقپان ايىنان باستاپ 2016 جىلدىڭ قاڭتار ايىنا دەيىن بەسىنشى سايلانعان قازاقستان رەسپۋبليكاسى پارلامەنتى ءماجىلىسىنىڭ دەپۋتاتى, ەكونوميكالىق رەفورما جانە وڭىرلىك دامۋ كوميتەتىنىڭ مۇشەسى, «نۇر وتان» پارتياسىنىڭ فراكتسيا مۇشەسى. 2016 جىلعى ناۋرىز ايىنان 2021 جىلدىڭ قاڭتار ايى ارالىعىندا قازاقستان رەسپۋبليكاسى پارلامەنتى ءماجىلىسىنىڭ دەپۋتاتى, ەكولوگيا ماسەلەلەرى جانە تابيعات پايدالانۋ كوميتەتىنىڭ مۇشەسى, «نۇر وتان» پارتياسىنىڭ فراكتسيا مۇشەسى.

«فەنومەن منوگوپارتينوستي ۆ كازاحستانە» (1997 ج.) مونوگرافياسىنىڭ, سونداي-اق 100-دەن اسا عىلىمي جاريالانىمداردىڭ اۆتورى. «قۇرمەت» وردەنىمەن, «ەرەن ەڭبەگى ءۇشىن» مەدالىمەن, «نۇر وتان» حدپ-نىڭ «بەلسەندى قىزمەت ءۇشىن» مەدالىمەن, ازيا وليمپيادالىق كەڭەسىنىڭ التىن بەلگىسىمەن, ءبىلىم جانە عىلىم, مادەنيەت جانە اقپارات, دەنساۋلىق ساقتاۋ, تۋريزم جانە سپورت مينيسترلىكتەرىنىڭ ومىراۋ بەلگىلەرىمەن ماراپاتتالعان.