سايىن دالانىڭ ەركەسى – كيىك ءمۇيىزىن ساتىپ, زاڭسىز پايدا تابۋدى كوزدەگەندەر ايىلىن ءالى جيار ەمەس. اسىرەسە, تەپسە تەمىر ۇزەتىن جاس جىگىتتەر كيىكتى ءمۇيىزى ءۇشىن قىناداي قىرىپ, قىمباتقا باعالاناتىن مۇيىزىمەن ءالسىن-ءالسىن ۇستالىپ جاتىر. اقپاننىڭ باسىندا سونداي براكونەردىڭ ءبىرى قۇرمانعازى اۋدانىنداعى بالقۇدىق اۋىلىنان ۇستالعان ەدى. وسىندا تۇراتىن 34 جاستاعى جىگىت ۇيىندە كيىكتىڭ 106 ءمۇيىزى مەن تەگىس ۇڭعىلى ەكى اڭشىلىق مىلتىقتى زاڭسىز ساقتاپتى.
– پوليتسەيلەر براكونەرلىكپەن اينالىسقان جىگىتتىڭ تۇنگى مەزگىلدە «Yaqi» موتوكولىگىمەن كيىكتى اڭشىلىق قارۋىمەن اتىپ, ءمۇيىزىن زاڭسىز يەمدەنگەنى انىقتالدى. سونداي-اق بالقۇدىق اۋىلىنىڭ ماڭىنان ءمۇيىزى كەسىلگەن كيىكتىڭ ءتورت ولەكسەسى تابىلدى, – دەپ حابارلاعان ەدى وبلىستىق پوليتسيا دەپارتامەنتىنىڭ ءباسپاسوز قىزمەتىنەن.
ال وتكەن اپتادا تاعى دا ەكى تۇرعىن كيىكتىڭ 364 مۇيىزىمەن ۇستالدى. ەكەۋى دە – 23 جاستاعى جىگىتتەر. ءبىرى – اتىراۋ قالاسىندا, ەكىنشىسى يساتاي اۋدانىندا تۇرادى. ولاردىڭ براكونەرلىكپەن اينالىسقانى وبلىستىق پوليتسيا دەپارتامەنتىنە قاراستى كريمينالدىق پوليتسيا باسقارماسى مەن بالىق قورىنا قىلمىستىق قول سۇعۋشىلىقپەن كۇرەس ءبولىمىنىڭ قىزمەتكەرلەرى وتكىزگەن جەدەل-ىزدەستىرۋ ءىس-شاراسى كەزىندە انىقتالىپ وتىر.
– ءىس-شارا كەزىندە اتىراۋ قالاسىنا تاياۋ ورنالاسقان «گەولوگ» شاعىن اۋدانىنداعى كوپ قاباتتى ۇيلەردىڭ ءبىرىنىڭ اۋلاسىندا تۇرعان ەكى كولىك تەكسەرىلدى. «ۆاز-21014» ماركالى اۆتوكولىكتىڭ بىرىنەن 200 دانا كيىك ءمۇيىزى مەن قۇقىق قورعاۋ ورگانىندا تىركەلمەگەن قوس ۇڭعىلى «توز-16» ماركالى اڭشىلىق مىلتىعى تابىلدى. ءدال وسىنداي ماركالى ەكىنشى كولىكتە 164 دانا كيىك ءمۇيىزى مەن رۇقسات قۇجاتىنسىز 4,5 كاليبرلى «بايكال مر-512» ماركالى قارۋ بارى انىقتالدى, – دەپ حابارلادى دەپارتامەنتتىڭ ءباسپاسوز قىزمەتىنىڭ وكىلى مەيىرىم ەرداۋلەت.
قازىر كۇدىكتى رەتىندە ۇستالعان ءۇش جىگىتكە قاتىستى سوتقا دەيىنگى تەرگەۋ ءجۇرىپ جاتىر.
اتىراۋ وبلىسى