پرەمەر-مينيستر اسقار ءماميننىڭ توراعالىعىمەن وتكەن ۇكىمەت وتىرىسىندا ەلىمىزدىڭ 2021 جىلعى قاڭتارداعى الەۋمەتتىك-ەكونوميكالىق دامۋىنىڭ جانە رەسپۋبليكالىق بيۋدجەتتىڭ اتقارىلۋىنىڭ قورىتىندىلارى قارالدى. ەلىمىزدىڭ اگروونەركاسىپتىك كەشەنىندەگى جاعداي تۋرالى اۋىل شارۋاشىلىعى ءمينيسترى ساپارحان وماروۆ باياندادى.
وسى جىلدىڭ قاڭتار ايىندا جالپى اۋىل شارۋاشىلىعى ءونىمىنىڭ كولەمى 2,5%-عا ۇلعايىپ, 170,6 ملرد تەڭگەنى قۇرادى. بۇل ءوسىم نەگىزىنەن مال شارۋاشىلىعىنداعى ءوندىرىس كولەمىنىڭ 2,7%-عا ۇلعايۋى ەسەبىنەن قامتاماسىز ەتىلدى. ماسەلەن, ەت ءوندىرىسىنىڭ سويىس سالماقتاعى كولەمى 5,3%-عا, ءسۇت 3,8%-عا ءوستى. بۇل رەتتە, 10,2 ملرد تەڭگەگە وسىمدىك شارۋاشىلىعى ونىمدەرى ءوندىرىلدى. بۇل كولەم اۋىل شارۋاشىلىعى داقىلدارىن جابىق توپىراقتا (جىلىجايدا) ءوسىرۋ ەسەبىنەن قامتاماسىز ەتىلدى.
وبلىستار بولىنىسىندە رەسپۋبليكالىق دەڭگەيدەن جوعارى قارقىن 3 وبلىستا بايقالىپ, اتاپ ايتقاندا, اقمولا وبلىسىندا 114%-دى, تۇركىستان وبلىسىندا 103,2%-دى, قوستاناي وبلىسىندا 102,7%-دى قۇرادى. ءمينيستردىڭ ايتۋىنشا, كورسەتىلگەن كەزەڭدە تاماق ونىمدەرىن ءوندىرۋ كولەمى 0,8%-عا ءوسىپ, 142,1 ملرد تەڭگەنى قۇرادى. بۇل رەتتە, وسىمدىك مايىن ءوندىرۋ كولەمىنىڭ 26,7%-عا, قىزىلشا قانتىنىڭ 25,1%-عا, سارى مايدىڭ 16,3%-عا, جارمانىڭ 11,3%-عا, وڭدەلگەن ءسۇتتىڭ 3,2%-عا, وڭدەلگەن كۇرىشتىڭ 2,3%-عا, ىرىمشىك جانە سۇزبەنىڭ 0,8%-عا ارتقانى بايقالدى.
«اۋىل شارۋاشىلىعىنىڭ نەگىزگى كاپيتالىنا سالىنعان ينۆەستيتسيالار كولەمى 75,2%-عا ۇلعايىپ, 19,9 ملرد تەڭگەنى, تاماق ونىمدەرى وندىرىسىنە سالىنعان ينۆەستيتسيالار 11,2%-عا ارتىپ, 3,5 ملرد تەڭگەنى قۇرادى», دەدى س. وماروۆ.
بيىل جالپى اۋىل شارۋاشىلىعى ءونىمىنىڭ ءوسىمىن 105%, تاماق ونىمدەرى ءوندىرىسىنىڭ ءوسىمىن 107% دەڭگەيىندە قامتاماسىز ەتۋ جوسپارلانۋدا. اتالعان جوسپارلى ينديكاتورلار ىشكى نارىقتى الەۋمەتتىك ماڭىزى بار ازىق-ت ۇلىك تاۋارلارىمەن تولىقتىرۋ جانە اگروونەركاسىپتىك كەشەننىڭ باسەكەگە قابىلەتتىلىگىن ارتتىرۋ ەسەبىنەن قامتاماسىز ەتىلەتىن بولادى.
«بۇل ءۇشىن اگروونەركاسىپتىك كەشەن سۋبەكتىلەرىن مەملەكەتتىك قولداۋ, ونىڭ ىشىندە ينۆەستيتسيالىق سۋبسيديالاۋ جانە باسقا دا قارجى قۇرالدارى, وسىمدىك شارۋاشىلىعى مەن مال شارۋاشىلىعىنداعى سۋبسيديالاۋ جالعاساتىن بولادى. وسى ماقساتتارعا بيىل 300 ملرد تەڭگەدەن استام قارجى باعىتتالادى», دەدى مينيستر.
سونىمەن قاتار ءىرى 7 ەكوجۇيە قۇرۋ جونىندەگى تاپسىرماعا سايكەس سولتۇستىك قازاقستان وبلىسىندا قۋاتى 300 مىڭ توننا بولاتىن ءداندى داقىلدار, اقمولا وبلىسىندا قۋاتى 200 مىڭ توننا بولاتىن مايلى داقىلدار, اقتوبە وبلىسىندا 20 مىڭ توننا, الماتى وبلىسىندا 15 مىڭ توننا بولاتىن ەت وندىرەتىن جانە وڭدەيتىن ەكوجۇيەلەر قۇرۋ جونىندەگى ينۆەستيتسيالىق جوبالار ىسكە اسىرىلاتىن بولادى.
بۇدان باسقا, يمپورتتى الماستىرۋ اياسىندا وسى جىلدىڭ وزىندە 35 تاۋارلىق ءسۇت فەرماسىن, 2100 گا باقتاردى, 3 ەت كومبيناتىن, 5 قۇس فابريكاسىن, بالىق وندىرەتىن 4 وبەكتىنى ىسكە قوسۋ جوسپارلانىپ وتىر, سونداي-اق 1 قانت زاۋىتىنىڭ قۇرىلىسى باستالادى. جالپى, رەسپۋبليكا بويىنشا 2021 جىلى ءتۇرلى باعىتتار بويىنشا 79 ينۆەستيتسيالىق جوبانى ىسكە اسىرۋ كوزدەلىپ وتىر.
«2021 جىلعى ەگىس ناۋقانىنا دايىندىق بويىنشا جوسپارلى جۇمىستار جۇرگىزىلۋدە. بولجامدى قۇرىلىمعا سۇيەنسەك, جالپى ەگىس الاڭى 86,4 مىڭ گەكتارعا ۇلعايىپ, 22,7 ملن گەكتاردى قۇرايتىن بولادى», دەدى س. وماروۆ.
مايلى, ازىقتىق جانە كوكونىس-باقشا داقىلدارىنىڭ, سونداي-اق قاراقۇمىق جانە قانت قىزىلشاسى سياقتى الەۋمەتتىك داقىلداردىڭ الاڭدارىن ۇلعايتۋ جوسپارلانۋدا. سونىمەن قاتار بيداي, كۇرىش جانە ماقتا سياقتى دارا داقىلدار مەن ىلعالدى كوپ قاجەت ەتەتىن داقىلدار ەگىلەتىن القاپتار قىسقارتىلاتىن بولادى.
كوكتەمگى دالا جۇمىستارىن ۋاقىتىلى جۇرگىزۋ ماقساتىندا اگروونەركاسىپتىك كەشەن سۋبەكتىلەرى 70 ملرد تەڭگە سوماسىندا جەڭىلدەتىلگەن كرەديتپەن, 379,8 مىڭ توننا كولەمىندە ارزانداتىلعان جانار-جاعارماي ماتەريالدارىمەن قامتاماسىز ەتىلەتىن بولادى, ول نارىقتىق باعادان 11%-عا ارزان بولادى. سونداي-اق اگروونەركاسىپتىك كەشەن سۋبەكتىلەرىنەن شامامەن 350 مىڭ توننا اۋىل شارۋاشىلىعى ءونىمىن فورۆاردتىق ساتىپ الۋ جوسپارلانۋدا.
«تىڭايتقىشتار قولدانۋ كولەمىن 53 مىڭ تونناعا ۇلعايتۋ جانە ولاردىڭ قولدانىلۋىن عىلىمي نەگىزدەلگەن قاجەتتىلىكتىڭ 25,5%-ىنا دەيىن جەتكىزۋ جوسپارلانۋدا. بۇل رەتتە تۇقىم شارۋاشىلىعىن سۋبسيديالاۋ كولەمى 11,8 ملرد تەڭگەنى قۇرايدى, بۇل اۋىل شارۋاشىلىعى تاۋارىن وندىرۋشىلەر ءۇشىن ساپالى تۇقىمداردىڭ قولجەتىمدىلىگىن ارتتىرۋعا مۇمكىندىك بەرەدى. كوكتەمگى دالا جۇمىستارىن جۇرگىزۋ بارىسى ەرەكشە باقىلاۋعا الىناتىن بولادى», دەدى س. وماروۆ.