تاريح تابالدىرىعىندا تۇرعان كوك تۇلپار – جاڭا جىلقى جىلى قارساڭىندا استانا قالاسىنىڭ الەۋمەتتىك جاعىنان قورعالماعان بىرنەشە وتباسىلارى قونىس تويىن تويلاماق.
كەشە استانا قالاسىنىڭ اكىمى يمانعالي تاسماعامبەتوۆتىڭ قاتىسۋىمەن قۇرىلىس كومپانيالارى اراسىندا داستۇرگە اينالعان مەملەكەتتىك-الەۋمەتتىك سەرىكتەستىك قايىرىمدىلىق شارالارى اياسىندا مۇگەدەك بالالار تاربيەلەپ وتىرعان 11 وتباسىنا جاڭا پاتەر كىلتتەرى تابىس ەتىلدى.
تاريح تابالدىرىعىندا تۇرعان كوك تۇلپار – جاڭا جىلقى جىلى قارساڭىندا استانا قالاسىنىڭ الەۋمەتتىك جاعىنان قورعالماعان بىرنەشە وتباسىلارى قونىس تويىن تويلاماق.
كەشە استانا قالاسىنىڭ اكىمى يمانعالي تاسماعامبەتوۆتىڭ قاتىسۋىمەن قۇرىلىس كومپانيالارى اراسىندا داستۇرگە اينالعان مەملەكەتتىك-الەۋمەتتىك سەرىكتەستىك قايىرىمدىلىق شارالارى اياسىندا مۇگەدەك بالالار تاربيەلەپ وتىرعان 11 وتباسىنا جاڭا پاتەر كىلتتەرى تابىس ەتىلدى.
جۇيكە جۇيەلەرى دىمكاستانعان, سال اۋرۋىنا شالدىققان, ونكولوگيالىق كەسەلمەن اۋىراتىن بالالاردى كۇتىپ-باعىپ, جۇمىستان قول ءۇزىپ, اتا-انالارى ۇيدە وتىرىپ قالعان بۇل وتباسىلارىنىڭ احۋالى تومەن. پاتەر جاعدايلارىن جاقسارتۋعا ەشبىر مۇمكىندىكتەرى جوق. مىنە, وسىنداي جاعدايدى ەسكەرە كەلىپ, قالا اكىمدىگىندە قۇرىلىس كومپانيالارىنىڭ كومەگىمەن وسىنداي وتباسىلارىنا تەگىن پاتەر بەرۋ ءداستۇرى جالعاسىپ كەلەدى.
بيىلعى جىلى قالاداعى «استاناپرومستروي-م», «Allur Auto Astana» «سك قۇلاگەر», «استاناترەيدينتەرنەيشنل», «استاناسەرۆيسسترويمونتاج-01», «التىن ءححى», «ازيا», «استاناسترويينۆەست», «تسەنتر كازەنەرگومونتاج», «اليانسسترويينۆەست» قۇرىلىس كومپانيالارى ەلوردانىڭ 11 وتباسىنا جاڭا پاتەرلەر ساتىپ الىپ بەردى. بۇل وتباسىلاردىڭ ارقايسىسى كولەمى تيىسىنشە 35-67 شارشى مەتردى قۇرايتىن ءبىر جانە ەكى بولمەلى پاتەرلەرگە يە بولدى.
تۇرمىس تاۋقىمەتىن تارتىپ, باسپانا قيىندىعىن كورىپ كەلە جاتقان وتباسىلاردىڭ بۇگىنگى قۋانىشتارىندا شەك بولمادى. بۇل وتباسىلار تاعدىر تالايىمەن ايىقپاس دەرتكە شالدىققان بالالارىنىڭ جاعدايىمەن الەۋمەتتىك قيىندىقتاردى كورىپ كەلەدى. جاڭا جىل قارساڭىندا قۋانىشقا كەنەلىپ, پاتەر كىلتىن العان وتباسىلاردىڭ قاتارىندا مۇگەدەك ەكى بالا تاربيەلەپ وتىرعان جورابەكوۆتەر جانۇياسى بار. بۇگىن پاتەر كىلتىن العان ا.ءجۇسىپوۆانىڭ ۇلى سال اۋرۋىنا شالدىققان بولسا, يۋ.وجوگينانىڭ بالاسى ايىقپاس قاتەرلى ىسىك اۋرۋىنا شالدىققان. سونىمەن بىرگە, اۋعان سوعىسىنىڭ ارداگەرى, ءىى توپتاعى مۇگەدەك راۋزا ەرەجەپوۆاعا دا وسى قايىرىمدىلىق شاراسى اياسىندا جاڭا پاتەر كىلتى تابىس ەتىلدى.
استانا قالاسىندا وسىنداي قايىرىمدىلىق شاراسىن وتكىزۋ سوڭعى جىلدارى يگى داستۇرگە اينالىپ كەلە جاتىر. العاش رەت 2011 جىلى الەۋمەتتىك جاعىنان قورعالماعان وسىنداي وتباسىلارىنا قالا كۇنى مەرەكەسى قارساڭىندا پاتەر تاپسىرىلعان بولاتىن. سودان بەرگى وتكەن ۋاقىتتا وسىنداي 60 وتباسى قونىس تويىن تويلاۋ قۇرمەتىنە يە بولدى. بۇل يگىلىكتى شارا الداعى ۋاقىتتا دا جالعاسىن تاباتىن بولادى.
جىلقىباي جاعىپار ۇلى,
«ەگەمەن قازاقستان».