قازاق ۇلتتىق قىزدار پەداگوگيكالىق ۋنيۆەرسيتەتىنىڭ عىلىمي كىتاپحاناسى XIX عاسىردا جارىق كورگەن 300-گە جۋىق قۇندى ادەبي جادىگەرلەر مەن 20 عىلىم سالاسى بويىنشا وقۋ قۇرالدارىنىڭ تسيفرلى كوشىرمەسىن جاسادى. بۇل تۋرالى وقۋ ورنىنىڭ ءباسپاسوز قىزمەتى حابارلادى.
سونداي-اق «رۋحاني جاڭعىرۋ» باعدارلاماسى اياسىندا شىققان «جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق» جوباسى بويىنشا قازاق تىلىنە اۋدارىلعان كىتاپتاردىڭ ەلەكتروندى نۇسقاسى دا جۇكتەلدى.
كىتاپحانا وقىرماندارىنىڭ كەز كەلگەن ادەبيەتتى كومپيۋتەرگە نەمەسە ءموبيلدى تەلەفونعا جۇكتەپ الۋ مۇمكىندىگى قاراستىرىلعان.
ايتا كەتەيىك, وقۋ ورنىنىڭ ەلەكتروندى كىتاپحانا قورىندا 10 مىڭنان استام ادەبيەت ساقتاۋلى. ونىڭ ىشىندە ليتسەنزيالاندىرىلعان تاسپالار, وقۋلىقتار مەن سيرەك باسىلىمداردىڭ ەلەكتروندى جانە تسيفرلاندىرىلعان نۇسقالارى بار.
جالپى العاندا قازاق ۇلتتىق قىزدار پەداگوگيكالىق ۋنيۆەرسيتەتىنىڭ عىلىمي كىتاپحاناسىنداعى ادەبيەتتەر قورى 1 ملن-نان اسادى.
باسىلىمداردىڭ 700 مىڭعا جۋىعى وقۋ قۇرالدارى بولسا, 192 مىڭنان استامى عىلىمي باعىتتاعى كىتاپتار. ال كوركەم ادەبيەتتىڭ ۇلەسى 142 مىڭ كولەمدە.
سونداي-اق ۋنيۆەرسيتەتتىڭ كىتاپ قورىندا 54 مىڭ شاماسىندا سوزدىكتەر, انىقتامالىقتار مەن ەنتسيكلوپەديالار ساقتاۋلى. جالپى ادەبيەتتەردىڭ 936 512-ءسى قازاق تىلىندە, 120 939-ى ورىس تىلىندە جانە 10 327-ءى شەتەل تىلدەرىندە.
كىتاپ قورى كافەدرالاردان تۇسكەن تاپسىرىستار بويىنشا مەملەكەتتىك ساتىپ الۋ جۇيەسى ارقىلى جانە اۆتورلاردىڭ سىيعا تارتىلعان كىتاپتارى مەن ۋنيۆەرسيتەت باسپاسىنان شىققان وقۋلىقتار ارقىلى تولىقتىرىلادى.
الماتى