بالالار حيرۋرگياسى ەرەسەكتەردى ەمدەيتىن مەديتسينادان الدەقايدا كۇردەلى ءارى جاۋاپكەرشىلىگى دە ەكى ەسە جوعارى ەكەندىگى ايان. دۇنيەگە شىر ەتىپ كەلگەن نارەستە قانشا جەردەن شىرقىرسا دا, ءوزىنىڭ جانىنا نە باتىپ تۇرعانىن ايتا المايدى. جانە ەرەسەكتەردەگى حيرۋرگيانىڭ ارالاسۋىن قاجەت ەتەتىن كوپتەگەن كەسەل بالالاردا كەزدەسپەيدى نەمەسە وتە سيرەك. وعان قوسا ءسابي اعزالارىنىڭ كولەمى ءالى تىم كىشكەنتاي, قابىرعالارىنىڭ جۇقا, نازىك بولۋى, تولىق جەتىلمەۋى كەز كەلگەن وپەراتسيانى كۇردەلەندىرە تۇسەتىندىكتەن, وپەراتسيا تەحنيكاسىنىڭ وتە جوعارى, اسا دالدىلىگىن تالاپ ەتەدى.
بالانىڭ جاسى كىشكەنتاي بولعان سايىن وتاعا دايىندىق, ودان كەيىنگى كۇتىم دە اسا مۇقياتتىلىقتى قاجەت ەتپەك. ماسەلەن, مەديتسينادا ناۋقاس پەن دارىگەردى بايلانىستىراتىن دەونتولوگيا قاعيداسى بار. جاڭا تۋعان نارەستە, زاڭدىق تۇرعىدا, اقىل-ەسى ءالى دامىماعاندىقتان تاعدىرشەشتى دەلدالدىقتى اتا-انا اتقارۋعا ءماجبۇر بولسا, بالانىڭ ءومىرى ءۇشىن جاۋاپكەرشىلىكتى دارىگەر موينىنا الادى. ال جاڭا عانا دۇنيەگە كەلگەن سابيلەردە حيرۋرگتاردىڭ شۇعىل ارەكەت ەتۋىن قاجەت ەتەتىن ءتۋابىتتى كەسەلدەر تابىلىپ جاتادى. ماسەلەن, بۇلار – وڭەش اترەزياسى, ءتۋابىتتى ىشەك وتىمسىزدىگىنىڭ تۇرلەرى, انۋس اترەزياسى, كىندىك باۋىنىڭ ەمبريونالدىق جارىقتارى سىندى سان ءتۇرلى دەرتتەر.
وسىعان وراي, الماتىداعى بالالارعا شۇعىل مەديتسينالىق كومەك كورسەتۋ ورتالىعىندا «جاڭا تۋعان نارەستەلەر, بالالار مەن جاسوسپىرىمدەر ەندوحيرۋرگياسى» تاقىرىبىندا حالىقارالىق سەمينار-شەبەرلىك دارىستەرى ءوتتى. ءبىر جاعىنان بالالار شۇعىل مەديتسينالىق جاردەم ورتالىعىنداعى بۇل شارا پروفەسسور الماس كامال ۇلى ورمانتاەۆتى ەسكە الۋعا ارنالىپ, «ونىڭ ويلارى مەن تىلەكتەرىن ورىنداۋ» تاقىرىبىن العا شىعاردى. «جاڭا تۋعان نارەستەلەر, بالالار مەن جاسوسپىرىمدەر ەندوحيرۋرگياسى. ءيندوتسيانيندى جاسىل ICG جانە RUBINA 4K/3D بەينە جۇيەسىنىڭ اسقازان-ىشەك جولدارى مەن اناستوموزدار حيرۋرگياسىنىڭ مۇمكىندىكتەرى» ماسەلەلەرىنە قۇرىلعان سەمينارعا يركۋتسك مەملەكەتتىك مەديتسينا ۋنيۆەرسيتەتىنىڭ بالالار حيرۋرگياسى كافەدراسىنىڭ مەڭگەرۋشىسى, پروفەسسور يۋري كوزلوۆ, قازاقستان ەندوسكوپيالىق حيرۋرگتار قاۋىمداستىعىنىڭ پرەزيدەنتى, پروفەسسور ۆلاديمير كوتلوبوۆسكي دە قاتىستى.
حالىقارالىق ءىس-شارادا بالالار شۇعىل مەديتسينالىق جاردەم ورتالىعىنىڭ باس دارىگەرى, «س.اسفەندياروۆ اتىنداعى قازاق ۇلتتىق مەديتسينالىق ۋنيۆەرسيتەتى» كەاق بالالار حيرۋرگياسى كافەدراسىنىڭ مەڭگەرۋشىسى, مەديتسينا عىلىمدارىنىڭ كانديداتى اباي قۇسايىنوۆ ءسوز الىپ, ەلىمىزدەگى بالالار حيرۋرگياسىنىڭ ماسەلەلەرىن قوزعادى.
حالىقارالىق ماستەر-كلاسس شەڭبەرىندە اسقازان-ىشەك رەفليۋكس اۋرۋى, گيدرونەفروز, تۋا بىتكەن مەگاۋرەتر سياقتى اسقازان-ىشەك جولدارىنىڭ, نەسەپاعار-جىنىس جۇيەسىنىڭ تۋا بىتكەن جانە جۇرە پايدا بولعان اقاۋلارى بار بالالارعا لاپاروسكوپيالىق وپەراتسيالار جاسالدى. حيرۋرگتەر KarlStorz/كومپانياسىنىڭ سوڭعى ەندوۆيدەوحيرۋرگيالىق جابدىقتارىن قولدانا وتىرىپ, 4 حيرۋرگيالىق وپەراتسيانى ساتىمەن جۇزەگە اسىردى.
جۇمىس كۇنىنىڭ سوڭىندا دوڭگەلەك ۇستەل وتكىزىلىپ, كۇردەلى وپەراتسيالار مەن كلينيكالىق جاعدايلار تالقىلاندى. كونفەرەنتسيا مودەراتورلارى ارىپتەستەرىنىڭ كاسىبي سۇراقتارىنا جاۋاپ بەردى. سەمينار سوڭىنا قاراي پروفەسسور يۋ.ا.كوزلوۆ «سىبىردەن سۇيىسپەنشىلىكپەن: جاڭا تۋىلعان نارەستەلەر مەن سابيلەرگە زاقىمى از حيرۋرگيا» اتتى بەينە-دارىستەرىن ۇسىندى.
الماتى