ءتيىستى مەكەمەلەر قالا تۇرعىندارىن كوكتايعاقتان اباي بولۋدى ەسكەرتەدى.
10 اقپان ساعات 06.30-داعى جاعداي بويىنشا قالادا 10-15 سم, ال تاۋلى ايماقتاردا قاردىڭ قالىڭدىعى 20 سم-عا دەيىن جەتتى, دەپ حابارلايدى Egemen.kz.
9 اقپان كۇنى ساعات 20.00-دە قار جاۋا باستادى. كوكتايعاقتىڭ الدىن الۋ ماقساتىندا جولدارعا, كوشەلەرگە, جولايلىقتارىنىڭ كىرەبەرىستەرىنە كوكتايعاققا قارسى ماتەريالدار سەبىلدى. تۇنگى مەزگىلدە پاترۋل ماشينالارىنىڭ ەرىپ جۇرۋىمەن قار تازالايتىن كولوننالار ۇيىمداستىرىلدى.
قالادا قار تازالاۋ جۇمىستارىنا 557 تەحنيكا بىرلىگى, ونىڭ ىشىندە 221 قۇملاقتىرعىش, 676 جول جۇمىسشىسى جۇمىلدىرىلدى. 3340 توننا كوكتايعاققا قارسى ماتەريالدار قولدانىلدى.
قاردى سىرتقا شىعارۋ جۇمىستارى باستالدى, 830 تەكشە مەتر قار شىعارىلدى. تاڭعى قاربالاس شاقتان سوڭ قار سىرتقا جاپپاي شىعارىلادى.
اۋداندىق اكىمدىكتەردە تاۋلىك بويىنا كەزەكشىلىكتەر ۇيىمداستىرىلدى. 10 اقپان كۇنگى تاڭنان باستاپ قار تازالاۋمەن 552 تەحنيكا بىرلىگى, 1890 جول جۇمىسشىسى اينالىسۋدا.
تروتۋارلار, جاياۋ جۇرگىنشىلەر ايماعىن, قوعامدىق كولىك ايالدامالارىن, اۆتوتۇراق قالتالارىن, جاياۋ جۇرگىنشىلەر كوپىرىن, ساياباقتار مەن سكۆەرلەردى تازارتۋ جۇمىستارى جالعاسۋدا.