سپورت سارقىتى اق ازيادانى تاماشالاۋعا ءماجبۇر بولعان تۇلكى

ولگا نوۆيكوۆا التىن جۇلدەلەرىن قايدا ساقتايدى؟

قالاي دەسەك تە, الماتى وبلىسىن­دا­­عى سولداتساي شاتقالى سپورتشىلارى­مىز ءۇشىن قۇتتى بولدى. شاڭعىمەن باع­دارلاۋ جارىسىندا ابىرويىمىزدى اسى­رىپ, جانكۇيەرلەردى جەلپىنتىپ كەت­كەن ولگا نوۆيكوۆانىڭ سپورتتاعى تا­بىسى – قازاقستان قۇراماسىنىڭ قور­جىنىنا تۇسكەن تۇڭعىش التىن بولدى. ال شاڭعىمەن باعدارلاۋداعى سپرينتتىك جارىستا دا ولگا التىننان القا تاققا­نىن الاقايلاپ جازدىق.

وسىدان كەيىن دە ولگا قولى جەتكەن تابىستارعا توقىراپ قالماي, ۇزاق قاشىقتىققا شاڭعىمەن باعدارلاۋدا التىن جۇلدە الىپ, VII قىسقى ازيا ويىندارىنىڭ ءۇش دۇركىن چەمپيونى اتاندى. سول كەزدە 25 جاستاعى ولگا نو­ۆيكوۆا شاڭعى ەستافەتالىق جارىسىندا ءتورتىنشى التىن جۇلدە الۋعا مۇم­كىندىگى بولدى. قۋانىشى قوينىنا سىي­ماعان ول ماراپاتتاۋ راسىمىندە: «ۇزاق قاشىقتىققا باعدارلاۋ جارىسى اسا قيىن بولعان جوق. ونىڭ ۇستىنە ورماننان وتكەندە تۇمان باسىلىپ, كارتادا بەلگىلەنگەن نۇكتەنى تابۋ وڭايعا ءتۇستى. ال ءبىرىنشى اينالىمداعى بۇرىلىستاردا اباي بولۋعا تىرىستىم», دەپ اسەرىمەن بولىسكەن ەدى.

«ازيادانىڭ ءۇش بىردەي التىن جۇل­دەسىن ەندى قايدا ساقتايسىز», دەگەن جۋرناليستەر سۇراعىنا سپورتشى: «بارلىق مەدالىمدى ساقتايتىن ورنىم بار. ال ازيادا مەدالدارىن بولەك ساقتايمىن, ولاردى تەك جاقىن دوستارىما عانا كور­سەتەمىن», دەپ جاۋاپ بەرگەنى ەستە.

 

وڭتۇستىككورەيالىق حوككەيشى قالاعان سىيلىعىن الدى ما؟

بالۋان شولاق سپورت سارايىندا وت­كەن قىزدار اراسىنداعى حوككەي ءتۋر­­ني­رىن وڭتۇستىك كورەيا كومانداسى ءبىرىن­­­شى بولىپ اياقتادى. ولار الدىڭعى ءتورت ماتچتا دا جەڭىلىس تاپتى. سوڭعى رەت وڭ­­تۇستىككورەيالىقتار ساياسات ارالارىنا سى­زات سالعان سولتۇستىككورەيالىقتاردان 6:1 ەسەبىمەن جەڭىلىپ, قارسىلاستار قاق­پا­سىنا بار بولعانى 1 شايبا سالعان كيۋ سان لي ويناعان كوماندا وسىلايشا ءوز قاق­پالارىنا 37 شايبا جىبەرىپ الدى.

ال سولتۇستىك كورەيا قۇراماسىنىڭ باس جاتتىقتىرۋشىسى ۆون سون ري ءوز شاكىرتتەرى 6:1 ەسەبىمەن جەڭىسكە جەت­كەن ماتچ قورىتىندىسىن بىلاي تۇجى­رىمداعان بولاتىن:

– وڭتۇستىككورەيالىق كورشىلەرىمىزدى قايتسەك تە جەڭۋىمىز كەرەك دەگەن ۇلكەن ماقسات بولعان جوق. ەلدەرىمىز ونسىز دا ەكى بولىككە بولىنگەن. كەلەسى ازيادادا بىرىككەن تۇتاس كوماندا رەتىندە ويناۋدى تى­لەيمىن. الماتىدا وتكەن تۋرنيردە ءبىز جا­پونيا مەن قىتاي كوماندالارىنا قار­سى بار كۇشىمىزدى سالىپ ويناۋدى ماقسات ەتتىك.

وڭتۇستىك كورەيا كومانداسىنىڭ باس جاتتىقتىرۋشىسى يۋن گون كيم ءوز ارىپ­­تەسىمەن تولىق كەلىسەتىنىن ءبىلدىرىپ, وڭ­تۇس­تىك كورەيا قۇراماسىنىڭ ەسەبىندەگى جالعىز گولدى سالعان حوككەيشى قىز كيۋ سان ليگە قالاعان سىيلىعىن الىپ بەرۋگە ۋادە بەرگەنى ەستە.

 

ازيادا التىنى اسكەردەن بوساتادى

وڭتۇستىك كورەيا سپورتشىلارى جالپى كوماندالىق ەسەپتە ءۇشىنشى ورىن­عا تۇراقتاعانى بەلگىلى. قۇلديلاپ سىر­عاناۋدا قولا العان وسى ەلدىڭ سپورتشىسى دجۋنگ دوحيون جارىستىڭ العاشقى كۇندەرىندە قولا مەدالدى قولعا ءتۇسىرىپ, ودان ازيادانىڭ التىنىن جەڭىپ الماق بولدى. كورەي سپورتشىسى:

– بۇگىن مەن چەمپيون اتانا المادىم. بىراق الداعى جارىس كۇندەرى ماقساتىم ورىندالادى دەگەن ۇمىتتەمىن. وڭتۇستىك كورەيا زاڭى بويىنشا ءىرى حالىقارالىق جا­رىستاردىڭ چەمپيوندارى اسكەري بو­رىشىن وتەۋدەن بوساتىلادى. بىزدە ءتىپتى ايگىلى ارتىستەرگە دە, پرەزيدەنتتىڭ ۇلى­نا دا مۇنداي جەڭىلدىك بەرىلمەيدى. سون­دىق­تان جەڭىسكە ۇمتىلۋىما سەبەپ بار. اسكەردەن بوساسام جاتتىعۋلارىمدى ءارى قاراي جالعاستىرامىن. سايكەسىنشە, ءوز ەلىمنىڭ ابىرويىن قورعاپ, جەڭىس تۋىن جەلبىرەتۋگە مۇمكىندىگىم كوبەيەدى, – دەگەن ەدى سپورتشى.

قۇلديلاپ ءتۇسۋ جارىستارىندا قازاق­ستاندىق دميتري كوشكين مەن يگور زاكۋرداەۆ ءبىرىنشى, ەكىنشى ورىنعا يە بولدى دا, ءۇشىنشى ورىندا وسى دجۋنگ دوحيون تۇرعان ەدى.

وڭتۇستىك كورەيا ازياداعا تاۋ شاڭ­عى­شى­لارىنان جاساقتالعان جاڭا قۇراما جىبەرگەن ەدى. ولار ءوز ەلىنىڭ اماناتىن اقتادى دەسەك دە بولادى. ءسويتىپ, بۇل ەلدىڭ سپورتشىلارى 3 التىن, 1 كۇمىس, 3 قولا مەدالدى جەڭىپ الدى. ەرلەر اراسىندا دجۋن دونحيون 1 التىن, 1 قولا مە­دالدى يەلەندى.

اسكەردەن بوساتىلعان دجۋن دوحيون الاڭسىز جاتتىعۋمەن اينالىسىپ, تالاي رەت جۇلدەگەرلەر تۇعىرىنا كوتەرىلگەن دە بولار؟!

 

الماتىنىڭ اۋاسى ساتىلدى

ايتقانداي, ازيادا باستالماي تۇرىپ-اق, ەلىمىزگە ازيانىڭ ءار قيىرىنان قوناق­تار اعىلىپ كەلىپ جاتتى. سپورتشىلار مەن جاتتىقتىرۋشىلاردى ايتپاعاننىڭ وزىندە, شەتەلدىك جانكۇيەرلەر مەن جۋرناليستەر ءبىر قاۋىم ەل بولدى. الىستان كەلگەن مەيماندار قازاقستاننان ەستە­لىككە نە الىپ كەتتى دەپ ويلايسىز؟

ازيادانىڭ ءدۇبىرى ەستىلگەننەن-اق ەلى­مىز­دەگى كادەسىي, تابارىك جاساۋمەن, سا­تۋمەن اينالىساتىن كاسىپكەرلەر وليم­پيادادان ءوز ناسىپتەرىن الىپ قالۋعا ۇم­تىل­دى. ازيادا-2011 سيمۆولى بولعان ءىلبىس­تىڭ بالاسىنىڭ سۋرەتى بەينەلەنگەن تاۋار­لار ءتيىستى ورىنداردان تابىلا باس­تادى.

سول سياقتى الماتى مەن استانداعى سپورت سارايلارىنىڭ فويەسىندە, جارىس ءجۇرىپ جاتقان كەشەندەردە ازيادا-2011-ءدىڭ ەمبلەمالارى مەن تاڭبالارى بار كادەسىيلاردى ساتۋ باستالدى.

ازيادا-2011 اتريبۋتيكاسىن ساتۋشى­لاردىڭ اراسىندا جۇرگىزىلگەن ساۋالداما كورسەتكەندەي, شەتەلدىك تۋريستەر ازيادا تۇمارى بەينەلەنگەن توسبەلگىلەر مەن كىلتباۋلارعا قىزىققان.

قازاقستاندىقتار ءبىرىنشى كەزەكتە, «قازاقستان» دەگەن جازۋى بار باس كيىم مەن بوكەبايلاردى ساتىپ الۋعا تىرى­سادى. جەرلەستەرىمىز كوبىنەسە قار بارى­سىنىڭ بەينەسى بار تابارىكتەر مەن قازاق­ستان قۇراماسىندا ويناعان «بارىس» كلۋبىنىڭ فوتوسۋرەتىن ساتىپ العان.

حوككەي كەزدەسۋلەرى اراسىنداعى ۇزى­لىس­­تەردە مۇز ارەنالارىنىڭ فويەسىندە ءبىر-بى­رىمەن توسبەلگى ايىرباستاۋشىلاردى دا كورۋگە بولاتىن ەدى. ەرلەر حوككەيى تۋر­نيرىنە قاتىسۋشى كوماندالاردىڭ توس­بەلگىلەرى ەڭ ۇلكەن سۇرانىسقا يە بولدى.

مىنا قىزىقتى قاراڭىز, ازيادا-2011-ءدىڭ باس ءباسپاسوز ورتالىعى ورنالاسقان «الماتى تاۋەرس» بيزنەس ورتالىعىندا الماتىنىڭ كونسەرۆىلەنگەن اۋاسى ساتىلدى. سۇراستىرىپ كورگەندە, باعاسى – 850 تەڭگە بولىپ شىقتى. سالماعى قانشا ەكەنىن كىم ءبىلىپتى؟

 

جارىستى تاماشالاۋعا ءماجبۇر بولعان تۇلكى

ازيادا جارىستارى جان-جانۋارلاردى دا قىزىقتىرعانىن بايانداۋ ءتىپتى قىزىق. بۇل اڭگىمە ويىنداردىڭ تۇمارى بولىپ وتىرعان ءىلبىستىڭ بالاسى تۋرالى ايتىلىپ وتىرعان جوق. حالىقارالىق ترامپليندەر كەشەنىندەگى ك-125 ءترامپلينىنىڭ استىندا تۇلكى تۇرىپ جاتقانى سايىستىڭ سوڭعى كۇندەرىندە عانا بەلگىلى بولدى. قانات جولىنىڭ بيىگىنەن قاراعاندا, ونىڭ ىزدەرى جاقسى كورىنەدى ەكەن. ول بۇل جەردى وتكەن جازدا وزىنە ءىن قىلىپ العان.

– بۇل – وتە باتىل تۇلكى. سەكىرۋلەر باستالعاندا ول تىعىلىپ قالعان, الايدا, ءبىرىنشى كۇننەن كەيىن قاراڭعى باتقاندا شىعا باستادى. «اش بولساڭ – ىننەن شىعاسىڭ» دەگەن وسى. قارنى اشقان تۇلكى ادامداردان قورقۋىن ۇمىتادى, ءبىز ونى اراسىندا تاماقتاندىرىپ قويامىز», دەگەن ەدى ءترامپليننىڭ تەحنيكالىق قىزمەتكەرلەرى.

ازيادا جارىستارىنا امالسىز جان­كۇيەر بولعان تۇلكى وسىلايشا ادامدارعا دا ۇيرەنگەن.

 

ۆلاديمير حرۋستالەۆ:

قىزىڭا جانكۇيەر بولۋ ءۇشىن جۇيكەڭ دە مىقتى بولۋى كەرەك

ۆانكۋۆەر وليمپياداسىنىڭ كۇمىس جۇلدەگەرى ەلەنا حرۋستالەۆانىڭ اكەسى ءارى جەكە جاتتىقتىرۋشىسى ۆلاديمير حرۋستالەۆ قىزىنىڭ اق ازياداداعى اياق الىسىن بارلىق كەزدە قاداعالاپ وتىردى.

ەلەنا باستاپقىدا كۇمىس جۇلدە العان­دا اكەسى وعان مۇلدە قىنجىلمايتىنىن دا وكىنبەيتىنىن دە العا تارتقان-دى. قى­زىنىڭ قارىم-قابىلەتىن جاقسى بىلەتىن اكە ونىڭ جۇلدىزدى ساتتەرى الدا دەپ بولجاعان ەدى. اقيقاتىندا كەلەسى جولى ەلەنانىڭ جاقىن-جۋىقتارى بياتلون ستاديونىندا باس قوستى. ولار اتاقتى قىزدىڭ 15 شاقىرىم قاشىقتىققا ار­نالعان جەكە جارىسىنا قولداۋ كورسەتتى.

حرۋستالەۆا ءوزىن قولداۋشى جانكۇيەر­لەردىڭ كوڭىلىنەن شىعىپ, ازيا ويىن­دارىنىڭ العاشقى التىن مەدالىن جەڭىپ الدى. الايدا قىزىنىڭ موينىنا التىن القا تاعىلار-تاعىلماسى بەيماعلۇم بولىپ تۇرعان ساتتە حرۋستالەۆ:

– لەنا نىسانا كوزدەپ جاتقاندا مەن دەمىمدى الماي, نىسانانى قاداعالاي­مىن. جۇرەك ءلۇپىلى جيىلەيدى. بەينە ءوزىم ۆينتوۆكانىڭ شۇرىپپەسىن ساۋساقپەن ­باس­­قانداي بولىپ سەزىنەمىن. قىزىم كەز كەل­گەن جارىسقا قاتىسقاندا كوڭىل-كۇيىم قاتتى قوبالجيدى. جارىس اياقتالعان­نان كەيىن دە كوپتەگەن سۇراقتاردىڭ شىر­ماۋىندا قالامىن. لەنا جارىستىڭ باس­تاپقى كەزىندە 5-ورىندا بولدى دا, ال كەيىن 4-ورىنعا شىقتى. مەن قات­تى قوبالجىدىم. لەنانىڭ باستاپقى قار­قىنى وتە تومەن سياقتى كورىندى. ال 4-ءشى اتۋ شەبىنە جەتكەندە تۇمان قويۋلاندى. سول كەزدە قۇدايعا جالبارىندىم. جا­راتقان يەمىز لەنانىڭ مەرگەندىك تانىتۋىنا جار بولدى, – دەسە, التىن الىپ بولعان سوڭ:

– ول التىن مەدالدى جەڭىپ الۋعا بار كۇش-جىگەرىن جۇمسادى. قىزىم جاقىن قا­شىقتىققا وتكىزىلگەن جارىستىڭ الدىندا تاماقتان ۋلانعانىنداي بولعانىن ايتقان ەدى. ونىڭ سول كەزدە كوڭىل حوشى بولماۋى ساتسىزدىككە ۇشىراتىپ, اقىرىندا 2 ورىنعا تابان تىرەتتى. ال بۇگىن قىزىمنىڭ جۇلدىزى جاندى. بىراق مەن مۇنى ونىڭ سوڭعى تابىسى دەپ ەسەپتەمەيمىن, – دەدى.

 

مەحجابين اكحتەر:

الەم ءۇندىستاندا قار جوق دەپ ويلايدى

سولداتساي شاتقالىنداعى شاڭعى-بياتلون كەشەنىنىڭ جارىس جولىنا ءۇندىستان قۇراماسى العاشقى بولىپ شىققان ەدى. سپورتشىلار بيىك تاۋداعى سايىس جولىنا بەيىمدەلۋگە بارىن سالدى. ءۇندىستان ءۇشىن شاڭعى سپورتى ۇيرەنشىكتى كورىنىس ەمەس ەكەنى بەلگىلى, سوعان قاراماستان, بۇل سپورت ءتۇرى حال­قى ميل­لياردتان اسىپ جىعىلاتىن ەل­دىڭ تۇر­عىندارىن قىزىقتىرا باستاعان. بۇل جايىن­دا ءۇندىستان قىزدار قۇرا­ما كو­مانداسى­نىڭ شەبەر سپورتشىسى مەحجابين اكحتەر:

– الەم جۇرتشىلىعى ءۇندىستاندا قار جوق دەپ ويلايدى. ءۇندىستاننىڭ كوپتەگەن اۋماعىندا «قار» دەگەن ءسوزدى ەستۋدىڭ ءوزى قىزىق سەزىلەدى. بىراق قار جاۋاتىن دا ايماقتار بار. مىسالى, كاشمير تا­ۋىن الىڭىز. ءدال وسى ءوڭىر ەلدەگى شاڭعى سپورتىنىڭ ورتالىعى بولىپ سانالادى. ازىرشە ءۇندىستان شاڭعىشىلارى پا­لەندەي تابىسقا جەتە قويعان جوق. مەن ازيا ويىندارىنا ءبىرىنشى رەت قاتىسىپ تۇرعان جوقپىن. دەگەنمەن بۇرىنعى جا­رىستارداعى تابىسىم ايتارلىقتاي بول­مادى. بىراق سونشالىقتى تومەن كور­سەتكىش دەپ تە ايتۋعا كەلمەس. العاش رەت قازاقستانعا كەلسەم دە, سپورتتىڭ ءدال وسى ءتۇرىنىڭ دامۋى ماعان وتە ۇنادى. ال­داعى ازيادا جارىسىنا ءوزىمنىڭ جەكە رە­كوردتىق كورسەتكىشتەرىمدى وزگەرتۋگە با­رىنشا كۇش سالامىن, – دەدى.

 

فريستايل جولى 10 كۇندە سالىنعان

ازيادا تۇساۋىن كەسپەي تۇرىپ, «تا­باعان» سپورت كەشەنىندە وتكەن فريستايل­شىلاردىڭ بەيرەسمي جاتتىعۋىنان كەيىن جولدىڭ شەيپەر-ارحيتەكتورى جارىستىڭ تەحنيكالىق دەلەگاتىمەن بىرگە سوڭعى سىناقتاردى وتكىزگەن ەدى.

شەيپەر-ارحيتەكتور ۆالەنتين كوتلياروۆ­تىڭ ايتۋىنشا, فريستايلعا ارنالعان جولدى سالۋعا نەبارى 10 كۇن كەتكەن. الايدا, بۇل جولدا وتكەن جىلدىڭ جا­زىنان باستاپ كۇردەلى جۇمىستار جۇرگىزىلگەن.

– ءبىز جولداردى ەۋروپالىق ستاندارت­تارعا ساي دايىندادىق. 3 اكروباتيكا ءترامپلينىن سالدىق, موگۋلعا ارنالعان جوتالار جاسادىق. جولداردىڭ تەحنيكالىق جاعدايىن ازيادا تەحنيكالىق دەلەگاتى قابىلداپ, بەكىتكەن, – دەدى كوتلياروۆ.

فريستايل سايىسىندا ونەر كورسەتكەن سپورتشىلار فريستايل تراسساسىنىڭ 10 كۇندە سالىنعانىنا سەنبەيدى. ساپاسى جاعىنان ءسوز كەلتىرمەيتىن جارىس جولى بۇرىننان بەرى سولاي كەلە جاتقانداي, ساقاداي ساي ەدى.

 

دميتري رەيحەرد:

تەلەفون قوڭىراۋى ماعان كۇش-جىگەر بەردى

ال «تاباعان» سپورت كەشەنىندە قا­زاقستاننىڭ فريستايل قۇراماسىنىڭ كوشباسشىسى دميتري رەيحەرد جان­كۇيەرلەردىڭ ءۇمىتىن اقتاپ, ازيا ويىندارىندا موگۋل سايىسىنىڭ جەڭىمپازى اتاندى. وليمپيادا ويىندارىنا قا­تى­سۋشى, الەم كۋبوگى مەن ەۋروپا كۋ­بوكتارىنىڭ ءتۇرلى كەزەڭدەرىندە الدىنا جان سالماعان دميتري 23,63 ۇپاي جي­ناپ, جاپوندىق ۋەنو وسامۋدى ارتتا قال­دىردى. موگۋلدىڭ التىنىن اسىنعان رەيحەردكە:

– جارىس باستالار الدىندا نە جايلى ويلادىڭىز؟ – دەگەن سۇراق قويىلدى.

– بۇل قىزىقتى وقيعا: ءدال سورە كە­زىندە, مەنىڭ شىعاتىنىم حابارلانىپ قويعان, جارىسقا دايىن تۇرمىن. تاپ وسى ۋاقىتتا تەلەفونىم شىرىلدادى. ودان شىققان كوڭىلدى اۋەن ماعان كۇش-جىگەر بەردى!

– سوڭعى وليمپياداداعى ءساتسىز ناتي­جەلەرىڭىز ازيادادا بار كۇشىڭدى سالۋعا ىنتا بەرگەن جوق پا؟

– جوق, مەن ءبىر نارسەنى ويىمنان شى­عارماي, ساتسىزدىكتەردەن كەيىن توقىراپ قالاتىن ادام ەمەسپىن. ارقاشان العا ۇمتىلىپ, الدىعا جاڭا ماقساتتاردى قو­يىپ, سول ماقساتتارعا جەتۋ كەرەك.

 

بىرەۋدىڭ قاتەلىگىنە قۋانامىن دەپ, التىننان ايىرىلىپ قالدى

ازيا ويىندارىنىڭ چەمپيونى, قازاقستان بياتلونشىسى الەكساندر چەرۆياكوۆ جارىس كۇندەرىندە جانكۇيەر­لەرىن قۋانتۋدان جالىقپادى-اۋ.

ايتقانداي, وسى جولى چەرۆياكوۆ جارىسقا ءبىرىنشى بولىپ شىقتى. 6 سەكۋندتان كەيىن سپورت سايىسىن قىتايلىق رەن لونگ جالعاستىردى. 33,5 سەكۋند وت­كەن سوڭ جارىس الاڭىنا جاپونيا سپورتشىسى دجۋندجي ناگاي شىقتى. جول بويىندا وسى ناگاي قىتاي بياتلونشىسىنان وزىپ كەتىپ, چەرۆياكوۆتىڭ سوڭىنا ءتۇستى. بىراق قازاقستاندىق سپورتشىنى ءبىر جايت قۇت­قارىپ قالدى. چەرۆياكوۆتىڭ اتقان وقتارى تيمەي جاتقانىن كورگەن جاپونيا سپورتشىسى قۋانعانى سونشالىق, ءوزىنىڭ نىسانالارىنان كوڭىلى اۋىپ, مۇقيات بول­عان جوق. مۇنىسىن جاپوندىق سپورتشى ويىن اياقتالعان سوڭ ءوزى مالىمدەدى.

– چەرۆياكوۆ – وتە تاجىريبەلى بياتلونشى. دەگەنمەن, بۇگىن ونىڭ جولى بولماعان سياقتى. اتىس شەبىنە مەن چەرۆياكوۆتان كەيىن كەلىپ جەتىپ, ونىڭ كوزدەي الماعان نىساندارىن كوردىم. جاسىراتىن نەسى بار, قارسىلاسىمنىڭ ءمۇلت كەتكەنىن كورىپ, وتە قاتتى قۋان­دىم. ورىنسىز بولعان قۋانىش ءوزىمدى تى­عىرىققا اپارىپ تىقتى. بۇرىن مەندە نىسانا دالدەۋدە ەشقانداي كەم­شىلىك كەتپەيتىن ەدى. دەگەنمەن, ناعىز­ بياتلوننىڭ قانداي بولۋى كەرەك ەكەن­دىگىن بارشاعا كورسەتتىك. مەندە الەك­ساندر­مەن كەزدەسەتىن ساتتەر ءالى بولادى. ءبىز ەستافەتادا جەكە جارىس كەزىندە باق سىناسامىز. ەسەمدى قايتارامىن دەپ ويلايمىن, – دەگەن بولاتىن.

وسىلايشا, دجۋندجي ناگاي قازاق­ستان­دىق سپورتشىنىڭ قاتەلىگىنە قۋانا­مىن دەپ, التىن جۇلدەدەن ايىرىلىپ قالعان.

قاراپ وتىرساق, ءبىزدىڭ ترامپليننەن شاڭعىمەن سەكىرۋشىلەرىمىزدىڭ باستى جەڭىسى – جانكۇيەرلەرگە تولى تريبۋنالار بولىپتى. جارىستاردىڭ سوڭعى جاڭبىرلى كۇنىندە دە جانكۇيەرلەردىڭ سانى ازايمادى. بارلىق جارىستارعا بيلەتتەردىڭ ساتىلىمىن قاداعالايتىن قىزمەتتىڭ مالىمەتتەرى بويىنشا, حوككەي مەن ترامپلينگە ەڭ كوپ بيلەت ساتىلعان.

«ترامپليندەر كەشەنىندەگى كۇزەت قىزمەتكەرلەرىنە «وسى سەكتسياعا قالاي جازىلۋعا بولادى؟» دەيتىن بالالار مازا بەرمەدى. سپورتتىڭ بۇل ءتۇرىنىڭ تانىمالدىلىعى ءوسىپ كەلەدى جانە وسىناۋ زور قىزىعۋشىلىقتى قولداۋعا ءبىز مۇددەلىمىز» دەگەن ەدى قازاقستاننىڭ ۇوك ۆيتسە-پرەزيدەنتى پاۆەل نوۆيكوۆ.

سول بالالار سپورتقا كەلدى مە ەكەن؟

 

الماتى