باتىس قازاقستاندا وزەن تاسىپ, كوپىردى اعىزا جازدادى

وقيعا 8 قاڭتار كۇنى كەشكىسىن بايقالعان. سوڭعى كۇندەرى كۇن كۇرت جىلىنىپ, جاڭبىر جاۋعاننىڭ سالدارى وزەن ارناسىن تولتىرىپ جىبەرگەن. ءسويتىپ, اعىن سۋ رۋبەجكا اۋىلىنا باراتىن جولعا ورناتىلعان ۋاقىتشا كوپىردىڭ توپىراقتى ىرگەتاسىن شايىپ جىبەرە جازدادى.

ايتا كەتەيىك, رۋبەجكا – جالپى ۇزىندىعى 82 شاقىرىمعا دەيىن باراتىن شاعىن وزەن, جايىقتىڭ وڭ جاق سالالارىنىڭ بىرىنە جاتادى. ماۋسىمدىق كەزەڭدە عانا اعىس پايدا بولىپ, قالعان ۋاقىتتى تىنىش جاتاتىن, سوڭعى جىلدارى قۋاڭشىلىقتان ءبولىنىپ, ءۇزىلىپ قالعان اڭعار بولاتىن. رۋبەجكا اۋىلىنىڭ تۇسىندا وزەن ۇستىنە كوپىر قۇرىلىسى 2020 جىلى قىركۇيەك ايىندا باستالعان. جول قاتىناسى ۇزىلمەۋى ءۇشىن وسى كوپىردىڭ جانىنان تۇربالار سالىپ, ۋاقىتشا ەنى – 6, ۇزىندىعى – 30 مەترلىك توپىراق كوپىر جاسالعان ەكەن. مىنە, وسى تۇربالارعا تاسىعان سۋ سىيماي, كەپتەلىپ, بوس توپىراقتى اعىزىپ كەتە جازدادى.

وقيعا ورنىنا باتىس قازاقستان وبلىستىق توتەنشە جاعدايلار دەپارتامەنتى باسشىلارى, بايتەرەك اۋدانى جول قىزمەتى ماماندارى جەدەل بارىپ, جاعدايدى باقىلاۋعا العان. رەسمي حابارعا قاراعاندا اۆتوكولىك قوزعالىسى توقتاماعان. وزەن ارناسى قالپىنا ءتۇسىپ, ەلدىمەكەندەردى سۋ باسۋ قاۋپى جويىلعان.

باتىس قازاقستان