الماتى قالاسى مەن ونىڭ ماڭىنداعى جەرلەر باقىلاۋعا الىناتىن بولدى. بۇل تۋرالى «حابار» تەلەارناسى حابارلادى.
وسى شاھاردا جەر تەلىمىن ءتيىمدى پايدالانۋعا ارنالعان جيىن وتكىزىلىپ, وعان وڭىرلىك دامۋ ءمينيسترى بولات جامىشەۆ پەن پارلامەنت ءماجىلىسىنىڭ دەپۋتاتتارى, الماتى قالاسى مەن وبلىس اكىمدىگىنىڭ جەتەكشىلەرى قاتىستى. بۇل جيىننىڭ وتكىزىلۋىنە مىنا ماسەلە تۇرتكى بولعان ەدى. وسى كەزگە دەيىن اۋىل شارۋاشىلىعى ماقساتىنا جانە كوممەرتسيالىق نىساندار سالۋعا بەرىلگەن 1 مىڭعا جۋىق تەلىمى پايدالانىلماي, 42-ءى مەملەكەتكە قايتارىلعان. ال قالا ماڭىنداعى اۋىل شارۋاشىلىعىنا بولىنگەن 7 مىڭ گەكتارداي جەر تەلىمى ءالى كۇنگە دەيىن بوس جاتىر. سونىمەن بىرگە, اۋماعى 62 گەكتار بولاتىن جەكە تۇرعىن ءۇي قۇرىلىسىنا بەرىلگەن جەر تەلىمدەرى يگەرىلمەگەن. ارناي تەكسەرۋدەن كەيىن وسىنىڭ كەيبىر بولىگى مەملەكەتكە قايتارىلىپتى. ءبىر نازار اۋداراتىنى, الماتى قالاسىنىڭ اكىمى احمەتجان ەسىموۆ شاھاردىڭ باس جوسپارىنا سايكەس, قالا ماڭىندا بوس جەرلەردىڭ جوق ەكەنىن ايتىپ وتىر.
جيىندا جەر كودەكسىنە وزگەرتۋلەر مەن تۇزەتۋلەر ەنگىزۋ ماسەلەسى كوتەرىلدى. ول بويىنشا مەملەكەتكە قايتارىلعان جەردىڭ يەسى 3 جىلعا دەيىن ونى ساتىپ الماسا, بانكتەردە كەپىلدىكتە تۇرعان اۋىل شارۋاشىلىعى جەرلەرىنىڭ مەملەكەتكە قايتارىلۋى مەن ساياجايلاردى زاڭداستىرۋ جايى ۇسىنىلدى. سونداي-اق, اۋىل شارۋاشىلىعى ماقساتىنا جەر العان قوجايىن 5 جىلدىڭ كولەمىندە ونى ءتيىمدى پايدالانىپ جاتقانىن راستاۋى كەرەك.
باقىتبەك كەنەش ۇلى.
دەرەككوز: «حابار» تەلەارناسى.
فوتو: Vox Populi