سقو-دا 5 كۇن ىشىندە كولىك باسقارۋ قۇقىعىنان ايىرىلعان ءۇش ماس جۇرگىزۋشى ۇستالدى, دەپ حابارلايدى Egemen.kz Polisia.kz-كە سىلتەمە جاساپ.
4 اقپانعا قاراعان ءتۇنى پەتروپاۆل قالاسىنىڭ پاترۋلدىك پوليتسەيلەرى ترۋد كوشەسىندە “ۆاز 2114” اۆتوكولىگىن توقتاتقان. تەكسەرۋ بارىسىندا 33 جاستاعى جۇرگىزۋشىنىڭ بۇرىن ماساڭ كۇيدە كولىك باسقارعانى ءۇشىن ءۇش جىل مەرزىمگە كولىك باسقارۋ قۇقىعىنان ايىرىلعانى بەلگىلى بولدى.
مەديتسينالىق كۋالاندىرۋ ناتيجەسى ونىڭ تاعى دا الكوگولدىك ماساڭ كۇيدە ەكەندىگىن كورسەتتى. كولىك سالونىندا جولاۋشى بولعان. ەر ادامدار ورتاق تانىستارىمەن ىشىمدىك ىشكەندىگىن ءتۇسىندىردى.
اتالعان فاكت قر قىلمىستىق كودەكسىنىڭ 346-بابى (كولىك قۇرالدارىن باسقارۋ قۇقىعىنان ايىرىلعان, الكوگولدىك, ەسىرتكىلىك جانە (نەمەسە) ۋىتقۇمارلىق ماساڭ كۇيدەگى ادامنىڭ كولىك قۇرالىن باسقارۋى, سول سياقتى كولىك قۇرالىن وسىنداي ادامنىڭ باسقارۋىنا بەرۋ نەمەسە كولىك قۇرالىن وسىنداي ادامنىڭ باسقارۋىنا جول بەرۋ) بويىنشا سوتقا دەيىنگى تەرگەپ-تەكسەرۋلەردىڭ بىرىڭعاي تىزىلىمىنە ەنگىزىلدى.
– بۇنداي جاعدايلار سيرەك ەمەس. وبلىس ورتالىعى مەن م.جۇماباەۆ اۋدانىندا قاڭتاردىڭ 30-ىنان باستاپ وسىعان ۇقساس تاعى ەكى فاكت انىقتالدى. زاڭ تالاپتارىن ەلەمەۋگە جول بەرىلمەيدى. پاترۋلدىك پوليتسەيلەر وسىنداي فاكتىلەردى انىقتاۋ بويىنشا رەيدتىك ءىس-شارالاردى تۇراقتى تۇردە جۇرگىزەدى, – دەيدى سقو پد جەرگىلىكتى پوليتسيا قىزمەتى باسقارماسىنىڭ باستىعى ايدىن بايماتوۆ.
باسقارۋ قۇقىعىنان ايىرىلسا دا, كولىك تىزگىندەپ جۇرگەن ادامدارعا ايىپپۇل سالىنادى نەمەسە باس بوستاندىعىن شەكتەۋ, سونداي-اق ءومىر بويى جۇرگىزۋ قۇقىعىنان ايىرۋ جازاسى قولدانىلادى.
وتكەن جىلى پوليتسەيلەر كولىك باسقارۋ قۇقىعىنان ايىرىلعان 72 ماس جۇرگىزۋشىگە قاتىستى ماتەريالداردى سوتقا تاپسىرعان. ولاردىڭ 65-ىنە قاتىستى سوت شەشىمى شىعارىلدى. تورتەۋىنىڭ كولىك باسقارۋ قۇقىعى ءۇش جىل مەرزىمگە شەكتەلدى. ال 61 جۇرگىزۋشى كولىك قۇرالدارىن باسقارۋ قۇقىعىنان ءومىر بويىنا ايىرىلدى.اقپارات كوزى Polisia.kz سايتىندا: https://polisia.kz/sqo-politsejleri-5-kun-ishinde-kolik-basqaru-quqyghynan-ajyrylghan-ush-mas-zhurgizushini-ustady/