شىمكەنت قالاسىنىڭ اكىمى مۇرات ايتەنوۆ «Instagram» جەلىسىندە تىكەلەي ەفيردە تۇرعىندارمەن جۇزدەسىپ, الەۋمەتتىك سالاداعى ماسەلەلەردى تالقىلادى. ادەتتەگىدەي, شاھار باسشىسى الدىمەن ەپيدەميولوگيالىق احۋالدى بايانداپ ءوتتى.
وتكەن تاۋلىكتە شاھاردا COVID-19 ينفەكتسياسىن جۇقتىرعان 9 جاعداي تىركەلدى. بۇگىندە قالادا 1 060 توسەك - ورىن بار (جۇقپالى - 560, كارانتيندىك - 500), ونىڭ 896 توسەك-ورنى بوس. جۇقپالى جانە كارانتيندىك اۋرۋحانالاردا 164 ناۋقاس ەم قابىلداۋدا.
شىمكەنت قالاسىندا پاندەمياعا قارسى سپۋتنيك V ۆاكتسيناتسياسىن سالۋ 1-ءشى اقپاننان باستالدى. قالاعا 1000 دوزا ۆاكتسينا جەتكىزىلدى.
قالا اكىمىنىڭ بۇل جولعى ەفيرى دەنساۋلىق ساقتاۋ سالاسىنداعى ماسەلەلەرگە ارنالدى. مۇرات دۇيسەنبەك ۇلى تۇرعىنداردىڭ سۇراقتارىنا جاۋاپ بەرىپ, سالاداعى جوسپارلاردان حاباردار ەتتى.
شىمكەنت قالاسىندا بۇگىندە حالىققا 123 دەنساۋلىق ساقتاۋ مەكەمەسى قىزمەت كورسەتەدى. ونىڭ ىشىندە 36 - مەملەكەتتىك مەكەمە, 87 - جەكەمەنشىك مەكەمە. وسىدان 2-3 جىل بۇرىن جەكەمەنشىك كلينيكالار بار-جوعى 30 شاقتى بولاتىن. 2019 جىلى تۇرعىندار مەديتسينالىق كومەكتى تەك 1 باعدارلاما ارقىلى الاتىن. ول - تەگىن مەديتسينالىق كومەكتىڭ كەپىلدەندىرىلگەن كولەمى پاكەتى. الايدا بۇل باعدارلاما اياسىندا بارلىق مەديتسينالىق كومەك قول جەتىمدى ەمەس-ءتىن. مىسالى, كۇردەلى وپەراتسيالار, قىمبات تۇراتىن دياگنوستيكالىق زەرتتەۋلەر, مرت كت جانە كەيبىر سيرەك كەزدەسەتىن زەرتتەۋلەر, ت.ب.
2020 جىلى كۇردەلى قايتا جوندەۋ جۇمىستارىنا 6,1 ملرد. تەڭگە ءبولىندى.
مەديتسينالىق قۇرال-جابدىقتاردىڭ 40 %-ى ەسكىرگەن ەدى. 2020 جىلى ماتەريالدى- تەحنيكالىق بازاعا 6 ملرد. تەڭگە قارالىپ, كوپتەگەن قۇرال جابدىقتار الىندى. ناتيجەسىندە 80 %-ن استامى جاڭارتىلدى. 2020 جىلى جاز ايلارىندا "اسار" شاعىناۋدانىندا ءمودۋلدى ورتالىق اشىلدى. قايتپاس -1, تاسكەن, نۇرتاس شاعىناۋداندارىندا قىزمەت كورسەتەتىن «اتامەكەن» ەمحاناسى سوعىلدى, وندا ءبىر اۋىسىمدا 250 ادام قابىلدايدى.
قالا اكىمىنىڭ ايتۋىنشا, 2021 جىلى بۇل باعىتقا تاعى دا 6 ملرد. تەڭگە بولىنەدى.
بيىل ينۆەستورلار كومەگىمەن قالانىڭ №9, №11, №12 ەمحانا جانە 400 ورىندىق بالالار جانە ەرەسەكتەر وڭالتۋ ورتالىعىن اشۋ جوسپارلانۋدا.
شىمكەنت قالاسىندا ءار 15 مينۋتتا 1 بالا تۋىلادى. وتكەن جىلى 30 مىڭنان استام بالا دۇنيەگە كەلدى. وسىعان بايلانىستى قوسىمشا 200 ورىندىق بوسانۋ ءۇيىن سوعۋ جوسپارلانۋدا.
سونداي-اق, شاhار باسشىسى مەديتسينا سالاسىن اقپاراتتاندىرۋ, سىبايلاس جەمقورلىق قۇقىق بۇزۋشىلىعىنىڭ الدىن الۋ باعىتىندا اتقارىلاتىن جوسپارلاردى باياندادى.
ەفير سوڭىندا قالا اكىمى ادەتتەگىدەي تۇرعىنداردى ساقتىق شارالارىنا ءمان بەرۋدى, ءالى دە بوساڭسۋعا بولمايتىنىن اتاپ ءوتتى.