قالانى ءدارى-دارمەكپەن جابدىقتاۋدى قامتاماسىز ەتۋ ماقساتىندا الماتى قالاسىنىڭ ستاتسيونارلارىندا, ەمحانالارى مەن ءدارىحانالارىندا ءدارى-دارمەك قۇرالدارىنىڭ جانە مەديتسينالىق ماقساتتاعى بۇيىمدارىنىڭ جەتكىلىكتى بولۋىنا اپتا سايىن مونيتورينگ جۇرگىزىلىپ تۇرادى, دەپ حابارلايدى Egemen.kz.
بۇگىنگى كۇنى, كوروناۆيرۋس ينفەكتسياسىن ەمدەۋدى تالاپ ەتەتىن پرەپاراتتار قالانىڭ بارلىق ءدارىحانالارىندا بار. قامتاماسىزدىق شامامەن 90%-دى قۇرايدى, ءدارىحانا قويمالارىندا 1 ملن.-نان استام (1 037 مىڭ) ەمدەۋدى تالاپ ەتەتىن پرەپاراتتار بار.
ء«دارى-دارمەك قۇرالدارىن ساتۋدان الىپ تاستاۋ تۋرالى ەشقانداي نۇسقاۋ بولعان جوق جانە بولۋى مۇمكىن ەمەس, سەبەبى ءدارىحانالار بيزنەستىڭ تاۋەلسىز سۋبەكتىلەرى بولىپ تابىلادى. بۇدان باسقا, قالا اكىمدىگى ءدارىحانا سورەلەرىن الەۋمەتتىك ماڭىزى بار ءدارى-دارمەك قۇرالدارىمەن جانە مەديتسينالىق ماقساتتاعى بۇيىمدارمەن تولىقتىرۋ بويىنشا بارلىق قاجەتتى شارالاردى قولدانۋدا», – دەپ حابارلادى الماتى قالاسى كاسىپكەرلىك جانە ينۆەستيتسيالار باسقارماسىنىڭ باسشىسى ەركەبۇلان ورازالين.
باسشىنىڭ ايتۋىنشا, نارىقتى تولىقتىرۋ ءۇشىن قالا ءدارىحانالارىنا ءدارى-دارمەك پرەپاراتتارىن جەتكىزۋ تۇراقتاندىرۋ قورى قاراجاتتارىنىڭ ەسەبىنەن جۇزەگە اسىرىلادى. قازىرگى ۋاقىتتا, اكەلۋگە جوسپارلانعان 40,1 ملن. ءدارى-دارمەك قۇرالدارى مەن مەديتسينالىق ماقساتتاعى بۇيىمداردىڭ قالاعا جەتكىزىلگەنى 47,2 ملن (118%), 23,4 ملن ساتىلدى, قولداعى بارى 23,8 ملن ونىڭ ىشىندە, ازايتىلمايتىن قالدىعى 8 ملن.
وسىلايشا, قالادا نىقتىلىقتىڭ ەكى ايلىق قورى قالىپتاستىرىلدى.
سونىمەن بىرگە, فارماقاۋىمداستىعىنىڭ دەرەكتەرى بويىنشا ەلىمىزدە كوۆيدكە قارسى بىرقاتار پرەپاراتتارعا شەكتى باعالاردىڭ ەنگىزىلۋىنە بايلانىستى, ءدارىحانالار ءدارى-دارمەك قۇرالدارىنا قايتا باعالاۋ جۇمىسىن جۇرگىزۋدى جالعاستىرۋدا, بۇل ولاردىڭ سورەلەردە ۋاقىتشا بولماۋىنا اكەلىپ سوعۋى مۇمكىن.
جالپى العاندا, الماتىدا ءدارى-دارمەككە, سونداي-اق مەديتسينالىق بەتپەردەلەرگە كوپ سۇرانىس جوق. جاعداي تۇراقتى.