ەلوردادا كولىكتى ماس كۇيدە جۇرگىزگەن شەتەلدىك ۇستالدى

«وقيعا كۋاگەرلەرى «102» پۋلتىنە كولىك رۋلىندە ماس كۇيدە وتىرعان جۇرگىزۋشى تۋرالى حابارلادى. پوليتسيا قىزمەتكەرلەرى ىزدەۋ ءىس-شاراسى بارىسىندا Toyota Camry كولىگىنىڭ 48 جاستاعى جۇرگىزۋشىسىن ماڭگىلىك ەل- ۇلى دالا كوشەلەرىنىڭ قيىلىسىندا ۇستادى. قۇجاتتارىن تەكسەرۋ بارىسىندا ەر ادامنان ءسپيرتتىڭ وتكىر ءيىسى شىعىپ تۇردى», دەلىنگەن نۇر-سۇلتان قالالىق پوليتسيا دەپارتامەنتى تاراتقان اقپاراتتا.

ۆەدومستۆو مالىمەتىنشە, مەديتسينالىق كۋالاندىرۋ قورىتىندىسىنا سايكەس, ورتاشا دەڭگەيدە ماس بولعانى راستالعانىنا قاراماستان جۇرگىزۋشى نە ءبارى 2 بوتەلكە سىرا ىشكەنىن ايتىپ اقتالعان.

«قر اكىمشىلىك قۇقىق بۇزۋشىلىق تۋرالى كودەكستىڭ 608-بابى 1-تارماعىمەن ماس جۇرگىزۋشىگە قاتىستى اكىمشىلىك ءىس قوزعالىپ, كولىگى كوممۋنالدىق تۇراققا قويىلدى. اكىمشىلىك سوت شەشىمىمەن ەر ادام 15 تاۋلىككە قامالدى جانە 7 جىل مەرزىمگە كولىك قۇرالىن باسقارۋ قۇقىعىنان ايىرىلدى», دەدى پوليتسيادان.