Digital Almaty-2021 حالىقارالىق فورۋمىنىڭ كۇن تارتىبىندە پاندەميا كەزىندە پايدا بولعان جاڭا سىن-تەگەۋرىندەر مەن تسيفرلىق باستامالار قارالدى. الماتى قالاسىنىڭ تسيفرلاندىرۋ باسقارماسى وتكەن جىلى كوروناۆيرۋستىق ينفەكتسياعا قارسى ارەكەت ەتۋ ءۇشىن 15 جوبانى ىسكە اسىرعان بولاتىن, ونىڭ ەكەۋى وسى جىلى 5 اقپاندا وتكەن فورۋمدا تانىستىرىلدى.
ۇسىنىلعان جوبالار ونوكولوگيالىق اۋرۋلار مەن يشەميالىق ينسۋلتتى الدىن الا دياگنوستيكالاۋ سەكىلدى كۇردەلى باعىتتارداعى تار شەڭبەرلى دارىگەر ماماندارىنىڭ تاجىريبەلىك قىزمەتىندە جاساندى ينتەللەكتتىڭ قولدانىسىن كوزدەيدى.
«Forus Data» كومپانياسى PACS – راديولوگيالىق تۇسىرىلىمدەردىڭ ورتالىقتاندىرىلعان مەديتسينالىق ءارحيۆىن جاساۋعا باعىتتالعان. الماتى – وسى باستامانى ءبىرىنشى بولىپ قولداعان ءوڭىر, قازىرگى تاڭدا وسى جۇيەمەن قازاقستاننىڭ ءتۇرلى قالالارى, اتاپ ايتقاندا نۇر-سۇلتان, تالدىقورعان, تاراز, كوكشەتاۋ, وسكەمەن, اتىراۋ, پاۆلوداردىڭ 64 اۋرۋحاناسى جۇمىس جاسايدى. قوندىرىلعان جاساندى ينتەللەكتتىڭ ارقاسىندا دارىگەر شۇعىل قورىتىندى جاساپ, ءارى قاراي ەمدەۋدى اسا قاجەتسىنەتىن پاتسيەنتتەردىڭ تۇسىرىلىمدەرىن تالداۋ مۇمكىندىگىنە يە.
جاساندى ينتەللەكتتىڭ كومەگىمەن كۇردەلى اۋىتقۋلار انىقتالعان تۇسىرىلىمدەرگە اۆتوماتتى تۇردە جوعارى قىزىل بەلگى قويىلادى. كەلەسى كەزەك اۋىتقۋلارى از جانە اۋىتقۋلارى جوق تۇسىرىلىمدەرگە بەرىلەدى.
جاساندى ينتەللەكتپەن وڭدەلگەن ءتۇسىرىلىم سالىستىرۋ ءۇشىن تىكەلەي تۇپنۇسقا سۋرەتىمەن بىرگە ساقتالادى. وڭدەۋدىڭ ناتيجەسىندە تابىلعان اۋىتقۋلاردىڭ جىلۋ كارتاسى مەن سيمپتومداردىڭ ءتىزىمى جاسالادى. سەرۆيس وكپە اۋرۋلارىنىڭ, ونىڭ ىشىندە پنەۆمونيا, تۋبەركۋلەز, ءىسىنۋدىڭ (ونكولوگيا) ەڭ ءجيى كەزدەسەتىن 14 بەلگىسىن انىقتاۋعا قابىلەتتى. ناتيجەلەرى اۆتوماتتى تۇردە دارىگەردىڭ قاتىسۋىنسىز وڭدەلىپ, ساقتالادى.
جاساندى ينتەللەكتتىڭ كومەگىمەن تالداۋ جاساۋ اۋىتقۋلارى بار پاتسيەنتكە سول ءتۇسىرىلىم جاسالعان كۇنى دياگنوستيكا جاساۋعا مۇمكىندىك بەرەدى. وسى سەرۆيس ءتۇرى بولماعان كەزدەرى پاتسيەنتتەر ناتيجەلەرىن 3-تەن 14 كۇنگە دەيىن كۇتەتىن. قازىر PACS 84% دياگنوستيكا جاساۋ دالدىگىمەن كۇنىنە 300-گە جۋىق رەنتگەن تۇسىرىلىمدەرىن وڭدەيدى.الماتى جاساندى ينتەللەكت زەرتحاناسى» يشەميالىق ءينسۋلتتى ەرتە انىقتاۋ ءۇشىن CEREBRA جوباسىندا جاساندى ينتەللەكتتى پايدالانادى.
ءينسۋلتتى مەديكامەنتوزدى ەمدەۋدىڭ تەراپەۆتتىك ۋاقىتى 4,5 ساعاتتى قۇرايدى, وسى ۋاقىت ارالىعىندا دياگنوزدى دۇرىس قويىپ, ەمدەۋ ءتۇرىن تاڭداۋ قاجەت. تەراپەۆتتىك تالداۋ ۋاقىتى شەڭبەرىندە باس ميىنىڭ زاقىمدانۋ دارەجەسىن انىقتاپ ۇلگەرۋ مۇمكىن بولسا, دەر كەزىندە ەمدى باستاپ, ميدىڭ ىستەن شىعۋىنىڭ الدىن الۋعا بولادى. كوبىنەسە ءينسۋلتتىڭ دامۋ ساتىسىن انىقتاۋ ءۇشىن كوپيۋتەرلىك توموگرافيا تۇسىرىلىمدەرىندەگى سۇرعىلت توننان ادام كوزىنىڭ ەرەكشەلىگىنە بايلانىستى ونداعى ايىرماشىلىقتى انىقتاۋ مۇمكىن بولمايدى, ال جاساندى ينتەللەكت ونى 10 مينۋتتا جاساي الادى.
يشەميالىق ءينسۋلتتى انىقتاۋ ءۇشىن جاساندى ينتەللەكتتىڭ الگوريتمى ەڭ كۇردەلى بولىپ ەسەپتەلەتىنىن اتاپ وتكەن ءجون, ويتكەنى انىقتاۋدىڭ جوعارى دارەجەسىنە جەتكەن كومپانيالار الەمدە كوپ ەمەس.
الماتى قالاسىنىڭ 7-ءشى قالالىق كلينيكالىق اۋرۋحاناسىنىڭ باس دارىگەرى ماناس رامازانوۆ اتاپ وتكەندەي: «اۋداندىق اۋرۋحانا دارىگەرىنىڭ ونكولوگيانىڭ نەمەسە يشەميالىق ءينسۋلتتىڭ باستاپقى ساتىسىن انىقتاۋعا جەتكىلىكتى ساراپتامالىق قابىلەتى نەمەسە تاجىريبەسى بولماۋى مۇمكىن, ال تسيفرلىق تەحنولوگيالار بىردەن دۇرىس دياگنوز قويىپ, پاتسەنتتى مامانداندىرىلعان مەديتسينالىق مەكەمەگە شۇعىل جەتكىزۋ شەشىمىن قابىلداۋعا كومەكتەسەدى. سوندىقتان تار شەڭبەرلى بىلىكتى مامانداردىڭ بارلىق پاتسيەنتتەرگە تۇراتىن جەرىنە قاراماستىن كومەك كورسەتۋىن قامتاماسىز ەتۋ ءۇشىن بارلىق قازاقستان بويىنشا جاساندى ينتەللەكتتى قولداناتىن جوبالاردىڭ اۋقىمىن كەڭەيتۋ وتە ماڭىزدى».