بۇگىن سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى ا.شپەكباەۆ الماتى قالاسىنا جۇمىس ساپارى اياسىندا قالانىڭ قوعام بەلسەندىلەرىمەن اشىق ديالوگ وتكىزدى, دەپ حابارلايدى Egemen.kz.
«بەلسەندى ازاماتتىق قوعامسىز جەمقورلىقتى ازايتۋ, ءتىپتى ونى تۇبەگەيلى جويۋ تۋرالى ايتۋدىڭ ەش ءمانى جوق. سوندىقتان ءبىز قوعامدىق سەرىكتەستەردى تاڭداۋدا جانە ونىڭ سانىنا قاتىستى ءوزىمىزدى شەكتەمەيمىز. بۇگىنگى تاڭدا اگەنتتىك 80 مىڭعا جۋىق سىبايلاس جەمقورلىققا قارسى بەلسەندىلەر مەن ەرىكتىلەردىڭ قولداۋىنا يە. ولاردىڭ قايتارىمسىز قىزمەتى ازاماتتاردىڭ ناقتى ماسەلەلەرىن شەشۋگە كومەكتەستى. ءبىز مۇنىمەن توقتاپ قالمايمىز, جۇمىستى جالعاستىرىپ, الدىن الۋ قىزمەتىن كۇشەيتەمىز», - دەدى اليك شپەكباەۆ.
ءىس – شاراعا الماتى قالاسى اكىمىنىڭ ورىنباسارى ەرجان باباقۇماروۆ, مەملەكەتتىك ورگانداردىڭ باسشىلارى, ۇكىمەتتىك ەمەس ۇيىمداردىڭ, بۇقارالىق اقپارات قۇرالدارىنىڭ وكىلدەرى, قوعام قايراتكەرلەرى, جوعارى وقۋ ورىندارىنىڭ رەكتورلارى, «الماتى – ادالدىق الاڭى», «سانالى ۇرپاق» جوبالىق كەڭسەلەرىنىڭ, ارنايى مونيتورينگ توبىنىڭ جانە ولاردىڭ فيليالدارىنىڭ جەتەكشىلەرى قاتىستى. شاقىرىلعان قوناقتار قاتارىندا قازاقستان رەسپۋبليكاسى تۇڭعىش پرەزيدەنتى - ەلباسى قورىنىڭ اتقارۋشى ديرەكتورىنىڭ ورىنباسارى, اگەنتتىك جانىنداعى سىبايلاس جەمقورلىققا قارسى ءىس-قيمىل جونىندەگى قوعامدىق كەڭەستىڭ توراعاسى يگور روگوۆ بولدى.
وتىرىستى اشا وتىرىپ, «الماتى – ادالدىق الاڭى» جوباسىنىڭ كۋراتورى ەرجان باباقۇماروۆ جوبانى ىسكە اسىرۋ قورىتىندىلارى بويىنشا وڭ ناتيجەلەردى اتاپ ءوتتى: «جۇرگىزىلگەن جۇمىس اياسىندا سىبايلاس جەمقورلىق قۇقىق بۇزۋشىلىقتار دەڭگەيىنىڭ تومەندەۋى مەن حالىقتىڭ جەمقورلىققا قارسى بەلسەندىلىگىنىڭ ارتۋىندا وڭ وزگەرىس بايقالادى, بۇل جەمقورلىققا قارسى جۇمىستى ۇيىمداستىرۋ مەن جۇرگىزۋدەگى جاڭا تاسىلدەرگە ىقپال ەتتى».
ءتۇرلى فورماتتاعى ءىس-شارالار ارقىلى جۇزدەگەن الماتىلىق ەلدەگى قازىرگى زامانعى سىبايلاس جەمقورلىققا قارسى ساياسات تۋرالى جاڭا جانە قوسىمشا اقپارات الدى, قۇقىقتىق بىلىمدەرىن نىعايتتى. بۇل جۇمىس قالانىڭ بارلىق اۋدانىندا «ادالدىق الاڭى» فيليالدارى اشىلعاننان كەيىن قوسىمشا قارقىنعا يە بولدى.
كەزدەسۋ بارىسىندا «ادالدىڭ الاڭى» جوبالىق كەڭسەسىنىڭ جاڭا جەتەكشىسى قازاقستان رەسپۋبليكاسى پرەزيدەنتىنىڭ جانىنداعى ۇلتتىق قوعامدىق سەنىم كەڭەسىنىڭ مۇشەسى اينۇر ءسابيتوۆا تانىستىرىلدى.
«ادالدىق الاڭى» جوباسىنىڭ اياسىندا اۋقىمدى جۇمىستار اتقارىلدى. تۇرعىندار سىبايلاس جەمقورلىققا قارسى جۇمىستاعى وڭ وزگەرىستەردى اتاپ ءوتتى. سونىمەن قوسا, بيىلعا جاڭا ماقساتتار قويىپ, جەكەلەگەن جوبالاردى ىسكە اسىرۋ باستالدى. قازىر جەرگىلىكتى اتقارۋشى ورگانداردا جانە حالىق ءۇشىن الەۋمەتتىك ماڭىزدى سالالاردا سىبايلاس جەمقورلىق تاۋەكەلدەرىنە تالداۋ جۇرگىزىلۋدە», - دەپ اتاپ ءوتتى اينۇر ءسابيتوۆا.
سپيكەرلەر, اگەنتتىكتىڭ جوبالىق كەڭسەلەرىنىڭ جەتەكشىلەرى جەمقورلىققا قارسى ءىس-قيمىلدىڭ ۋاقىتىلى جانە ۇيلەستىرىلگەن ءىس-قيمىلدارىنىڭ تيىمدىلىگىن, سونداي-اق جازانىڭ بۇلتارتپاستىعى قاعيداتىن مىزعىماس ساقتاۋدىڭ ماڭىزدىلىعىن اتاپ ءوتتى.
شاقىرىلعان قوعام بەلسەندىلەرى سىبايلاس جەمقورلىققا قارسى جۇمىسقا, ونىڭ ىشىندە قوعامدى ساياسي جاڭعىرتۋ جانە دەموكراتيالاندىرۋ تۇرعىسىنان ءوز كوزقاراستارىن ءبىلدىرىپ, ناقتى جەمقورلىق تاۋەكەلدەرىن بەلگىلەدى.
اگەنتتىك توراعاسى بارلىق ماسەلەلەر بويىنشا تولىق تۇسىنىكتەمە بەرىپ, بىرقاتار ناقتى وتىنىشتەر مەن شاعىمداردى باقىلاۋعا الدى. سونداي-اق مەملەكەتتىك ورگانداردىڭ باسشىلارىن جەمقورلىققا قارسى ءىس-قيمىل سالاسىنداعى جۇمىستى كۇشەيتۋگە, «ادالدىق الاڭى» جوباسىنىڭ جۇمىسىن جانداندىرۋعا شاقىردى.
«بىردە-ءبىر ماسەلە نازاردان تىس قالمايدى. ءبىز ءۇشىن بەلسەندى قايراتكەرلەرمەن ءار كەزدەسۋ ماڭىزدى. ءبىز مۇقيات پىسىقتاپ, ناقتى باسقارۋشىلىق شەشىمدەر قابىلدايمىز, مۇنىڭ ءبارى زاڭناماداعى وزگەرىستەردە كورىنىس تابادى», - دەپ سىبايلاس جەمقورلىققا قارسى ۆەدومستۆو باسشىسى ءسوزىن قورىتىندىلادى.