قىزدار ۋنيۆەرسيتەتىندە رەسپۋبليكالىق وليمپيادا مارەگە جەتتى

تۇڭعىش رەت ۇيىمداستىرىلعان جارىستىڭ باستى ماقساتى – بولاشاق تالاپكەرلەردىڭ ماماندىق تاڭداۋىنا ىقپال ەتۋ, مەكتەپ تۇلەكتەرىنىڭ كەلەشەكتەيگەرەتىن كاسىپتەرىنە دەگەن قىزىعۋشىلىقتارىن ارتتىرۋ.

جاستاردىڭ زياتكەرلىك الەۋەتىن جانە وقۋ ورنىنىڭ قوعامداعى ءيميدجىن ارتتىرۋ باعىتىنداعى ءبىلىم سايىسى 2 كەزەڭ بويىنشا ۇيىمداستىرىلدى.

سايىستىڭ ىرىكتەۋ كەزەڭىنە ەلىمىزدىڭ بارلىق ايماعىنداعى ءبىلىم بەرۋ مەكەمەلەرىنەن 100-دەن استام وقۋشى قاتىستى. ولار اعىلشىن تىلىنەن تەست تاپسىرىپ, بازالىق ءبىلىمىن تەكسەرۋگە مۇمكىندىك الدى.دوداعا قاتىسۋشىلار بۇل تۋردا لەكسيكالىق-گرامماتيكالىق تەست سۇراقتارىنا جاۋاپ بەرىپ, ءاۋديوماتىن جانە ۆيدەوماتەريالدار بويىنشا تاپسىرمالار ورىندادى. ءبىرىنشى كەزەڭ بويىنشا 11 وقۋشى 70 پايىز بالل جيناپ, اقتىق اينالىمعا جولداما الدى.

اقتىق كەزەڭنىڭ «Introducing» تۋرىندا ءار وقۋشى ءوزىن, مەكتەبىن تانىستىرۋ ماقساتىندا جاھاندانۋ زامانىنداعى «What’s a Digital Lady» تاقىرىبىندا 2 مينۋتتىق بەينەبايان ءتۇسىرىپ, ءححى عاسىرداعى «Digital Lady» بەينەسىن ۇسىندى. ال «Magic Box» تۋرىندا ءبىلىم مەن تانىمدى ايقىندايتىن تاپسىرمالاردى ورىنداسا,«جۇلدىزدى سۇراق» بولىمىندە قاتىسۋشىلار ۋنيۆەرسيتەتتە ءبىلىم بەرەتىن پروفەسسور-وقىتۋشىلار قويعان سۇراقتارعا جاۋاپ بەردى.

بىرنەشە ساتىلى جارىس قورىتىندىسى بويىنشا الماتى وبلىسىنىڭ «ۇشقوڭىر» ورتا مەكتەپ-گيمنازياسىنىڭ وقۋشىسى ديليارا ارىنوۆا ۇزدىك اتانىپ, ءبىرىنشى ورىنعا يە بولدى. ەكىنشى ورىن الماتى قالاسىنداعى №86 مەكتەپتىڭ وقۋشىلارى ايدا ورازبەك پەن دانا سابيتوۆاعا بۇيىردى. ال ءۇشىنشى ورىندى تۇركىستان وبلىسىنداعى №3 حامزا جالپى ورتا مەكتەبىنىڭ وقۋشىسى شاحرۋزا سۇلتانبەكوۆا, الماتى قالاسىنداعى №86 مەكتەپ گيمنازيانىڭ وقۋشىسى ارماندا قاسەنوۆا مەن شىمكەنت قالاسىنداعى ق. سىپاتاەۆ اتىنداعى ورتا مەكتەپتىڭ وقۋشىسى لەيلا قۇرماشينا ءوزارا ءبولىستى.

جەڭىمپازدار مەن جۇلدەگەرلەر ارنايى ديپلومدارمەن, العىس حاتتارمەن جانە سەرتيفيكاتتارمەن ماراپاتتالدى.

وليمپيادادا «جۇزدەن – جۇيرىك...» شىققان وقۋشى قىزدار ۋنيۆەرسيتەتىنىڭ تىلدەردى وقىتۋ ورتالىعىندا 4 اي مەرزىم كولەمىندە اعىلشىن تىلىنەن ءبىلىمىن اقىسىز نەگىزدە تەرەڭدەتۋگە مۇمكىندىك الدى.