الماتى قالاسىنىڭ جەرگىلىكتى اسكەري باسقارۋ ورگاندارى 2004 جىلى تۋعان ەر ازاماتتار اسكەرگە شاقىرىلادى. بۇل تۋرالى الماتى وكق ونلاين بريفينگىندە الماتى قالاسى قورعانىس ىستەرى جونىندەگى دەپارتامەنتى باستىعىنىڭ ورىنباسارى فارحات قۇرمانعاجينوۆ مالىمدەدى, دەپ حابارلايدى Egemen.kz.
ازاماتتاردى شاقىرۋ ۋچاسكەلەرىنە تىركەۋ جاس ادامداردى اسكەري ەسەپكە تۇرعىزۋ, ولاردىڭ سانىن, اسكەري قىزمەتكە جارامدىلىق دارەجەسىن ايقىنداۋ, ءبىلىم دەڭگەيىن, العان ماماندىعى مەن دەنە دايارلىعىن انىقتاۋ ماقساتىندا قاڭتار ايىنىڭ باسىنان باستاپ جۇرگىزىلۋدە. ءىس-شارا جىل سايىن 5 قاڭتاردان 31 ناۋرىزعا دەيىن وتەدى.
بيىل الماتى بويىنشا 7 مىڭعا جۋىق ءجاسوسپىرىمدى اسكەري ەسەپكە قويۋ جوسپارلانۋدا. ءاربىر ادام تۇرعىلىقتى جەرى بويىنشا جەرگىلىكتى اسكەري باسقارۋ ورگانىنا جۇگىنىپ, تولىق اقپارات الا الادى.
كۇن سايىن قالانىڭ جەرگىلىكتى اسكەري باسقارۋ ورگاندارىنا مەديتسينالىق تەكسەرۋدەن ءوتۋ ءۇشىن مەكتەپ جانە ارنايى ورتا وقۋ ورىندارىنىڭ وقۋشىلارى كەلۋدە. جاسوسپىرىمدەر اسكەري قىزمەتكە جارامدىلىعىن دالەلدەيتىن مەديتسينالىق تەكسەرۋدەن جانە قاجەتتى قۇجاتتاردى تەكسەرۋدەن وتەدى. ەگەر تىركەۋ بارىسىندا ەمدەلۋگە نەمەسە مەديتسينالىق باقىلاۋعا مۇقتاج اسكەرگە شاقىرۋ جاسىنا دەيىنگىلەر انىقتالسا, وندا ولار ەمدەۋ-پروفيلاكتيكالىق ۇيىمدارىنا تىركەلەدى.
بەلگىلى ءبىر جۇمىس الگوريتمى جاسالدى. اتالعان جۇمىس بارلىق سانيتارلىق تالاپتاردى ساقتاي وتىرىپ ۇيىمداستىرىلدى, سانيتارلىق-ەپيدەميولوگيالىق شارالار كۇشەيتىلدى.
"قالا اۋداندارىنىڭ باسقارمالارىندا اسكەرگە شاقىرۋ جاسىنا دەيىنگىلەر مەن مەديتسينالىق كوميسسيا مۇشەلەرى مەديتسينالىق بەتپەردەلەرمەن جانە انتيسەپتيكتەرمەن قامتاماسىز ەتىلەدى. مەديتسينالىق تەكسەرۋ كەمىندە 2 مەتر قاشىقتىقتى ساقتاۋ ارقىلى وتەدى. مەديتسينالىق كوميسسيا عيماراتىندا كۇنىنە كەمىندە 2 رەت بارلىق قىزمەتتىك جانە قوسالقى بولمەلەرگە دەزينفەكتسيا جۇرگىزىلەدى", - دەپ اتاپ ءوتتى فارحات قۇرمانعاجينوۆ.
ازاماتتاردى شاقىرۋ ۋچاسكەلەرىنە ەسەپكە الۋ جۇمىستارى جەرگىلىكتى اتقارۋشى ورگاندارى جەرگىلىكتى اسكەري باسقارۋ ورگاندارىمەن بىرلەسىپ جۇرگىزەدى.
قازاقستان رەسپۋبليكاسىنىڭ "اسكەري قىزمەت جانە اسكەري قىزمەتشىلەردىڭ مارتەبەسى تۋرالى" زاڭىنا سايكەس ەسەپكە تۇرعان جىلى جاسى 17-گە تولعان نەمەسە سول جىلى تولاتىن قازاقستان رەسپۋبليكاسىنىڭ ەر ازاماتتارى جاتادى.
بارلىق ءىس-شارالار اياقتالعاننان كەيىن جاستارعا شاقىرۋ ۋچاسكەسىنە تىركەۋ تۋرالى كۋالىك بەرىلەدى. بۇل كۋالىك اسكەرگە شاقىرۋ كەزىندە شاقىرىلۋشىنىڭ ەسەپتە تۇرعانىن راستايتىن قۇجات بولىپ تابىلادى.
اسكەري ەسەپكە العاش تۇرعان ازاماتتارمەن قوسىمشا قورعانىس مينيسترلىگىنىڭ اسكەري وقۋ ورىندارىنا ءتۇسۋ بويىنشا اقپاراتتىق جۇمىس جۇرگىزىلەدى جانە كەلىسىمشارت بويىنشا اسكەري قىزمەتتىڭ ارتىقشىلىقتارى تۇسىندىرىلەدى.
مەديتسينالىق (اسكەري-دارىگەرلىك) كوميسسيا اسكەري ەسەپتەن شىعارا وتىرىپ, اسكەري قىزمەتكە جارامسىز دەپ تانىعان ازاماتتار اسكەري ەسەپكە قابىلدانبايدى. ازاماتتار جۇمىس (وقۋ) ورنىن, اتقاراتىن لاۋازىمىن جانە ورتاشا جالاقىسىن ساقتاي وتىرىپ, اسكەرگە شاقىرىلۋعا دەيىنگىلەردى اسكەري ەسەپكە قويۋعا بايلانىستى مىندەتتەردى ورىنداۋ ءۇشىن قاجەتتى ۋاقىتقا جۇمىستان (وقۋدان) بوساتىلادى.