تاياۋدا الماتى قالاسىندا «Menin Armanym» كورپوراتيۆتىك قورىنىڭ ءباسپاسوز-كونفەرەنتسياسى ءوتتى. ۇيىم وكىلدەرى قور جۇمىسىنىڭ العاشقى ءۇش ايىنىڭ قورىتىندىلارىن ايتىپ بەردى. قور دەنساۋلىعىندا كىناراتى بار 3 جاستان 18 جاسقا دەيىنگى بالالاردىڭ ارماندارىن ورىندايدى. ولاردىڭ باسقا ۇيىمداردان ەرەكشەلىگى – سىيلىقتار بەرمەيدى نەمەسە ەمدەلۋگە قاراجات جينامايدى, كەرىسىنشە بالالاردىڭ ىشكى قالاۋىنداعى نيەتىن ورىنداۋعا كومەكتەسەدى.
«Menin Armanym» كورپوراتيۆتىك قورى – ەلىمىزدىڭ əر وڭىرىندەگى اۋىر دەرتكە شالدىققان ناۋقاس بالالاردىڭ ارمان-تىلەكتەرىن ورىنداۋعا قولعابىس ەتەدى. وسى ورايدا قور ديرەكتورى شاميل دۇيسەنعازى ۇلى اتقارىلعان جۇمىستان حاباردار ەتتى.
ء«بىز بۇل جوبانى قولعا الماي تۇرىپ, ۇزاق ۋاقىت بويى ەلىمىزدىڭ قايىرىمدىلىق نارىعىن زەرتتەدىك. وزدەرىڭىز بىلەتىندەي, قازاقستاندا قايىرىمدىلىق قورلارى كوپ, الايدا ءالى بىرىڭعاي جۇيە ورنىعا قويماعان. ءار قوردىڭ وزىندىك ەرەكشەلىگى بولعاندىقتان, ءبىز ارمانداردىڭ ورىندالۋىنا جول اشقىمىز كەلدى. وسى ماقساتتا ءبىز تۇركياعا بارىپ, 40 جىلدىق تاجىريبەسى بار ۇيىمنىڭ تۇجىرىمداماسىن نەگىزگە الدىق. بەرتىنگە دەيىن ولار əلەمدەگى 500 مىڭ بالانىڭ ارماندارىن ورىنداعان. ەلىمىزدە مۇنداي الاڭ قالىپتاسپاعاندىقتان, تۇرىك əرىپتەستەرىمىزدىڭ جۇمىسىمەن تانىسىپ, ءارى قاراي ءوز قورىمىزدى قۇرۋعا بەل بۋدىق», دەيدى قور ديرەكتورى.
بۇگىنگە دەيىن ناۋقاس 13 بالانىڭ قالاۋى جۇزەگە اسىرىلعان. سولاردىڭ ىشىندە كومەي پاپيللوماتوزىنىڭ دياگنوزى قويىلعان شىمكەنت قالاسىنىڭ 8 جاستاعى تۇرعىنى دامەليا تاعايحانوۆانىڭ كىشىگىرىم ارمانى ورىندالدى. ونىڭ ارمانى − ەسەيگەندە دارىگەر بولىپ, ادامدار اۋىرماي, جارقىن ءومىر سۇرۋىنە قولعابىس ەتۋ. قور وكىلدەرى شىمكەنت قالاسىنىڭ №6 قالالىق ەمحاناسىنىمەن كەلىسە وتىرىپ, دامەليانىڭ ارمانىن جۇزەگە اسىردى. ياعني ەمحانانىڭ دارىگەرلەرى وعان شاعىن ەكسكۋرسيا ۇيىمداستىرىپ, ءارتۇرلى دارىگەرلىك قۇرال-جابدىقتاردى كورسەتكەن. ەكسكۋرسيا سوڭىندا دارىگەرلەر بولاشاق ماماننىڭ قىزىعۋشىلىعىن وياتۋ ماقساتىندا بالالارعا ارنالعان مەديتسينالىق جيىنتىقپەن قوسا, ەستەلىككە سىيلىقتار تابىستادى.
ال باس ميىنىڭ ىسىگى دياگنوزى قويىلعان تۇرسىنباەۆ باعلاننىڭ بولاشاقتاعى ارمانى كاسىپكەر بولۋ ەكەن. ءوزى 16 جاستا بولسا دا, ومىرگە قۇشتارلىعى ەرەكشە دەپ ايتۋعا بولادى. ول ەلىمىزگە تانىمال ءارى ۇزدىك كاسىپكەر سىرىمبەك تاۋمەن كەزدەستى.
كاسىپكەردىڭ باستاماسى بويىنشا ول اپتا سايىن كولسايداعى بيزنەس-ترەنينگكە قاتىسقان. سونىمەن قاتار باعلان «Altyn Kopir» نەتۆوركينگ كەشىنىڭ قوناعى بولىپ جانە ەلىمىزدىڭ ەڭ ۇزدىك كاسىپكەرلەرىمىن جولىقتى. سول كۇنى وعان «Yokohama» اتىنان ارنايى سىيلىق تابىستالىپ جانە قوردىڭ اتىنان ەستەلىك ستاتۋەتكاسى بەرىلدى.
ايتا كەتەرلىگى, بۇل كورپوراتيۆتىك قورعا كەز كەلگەن ادام ەرىكتى بولىپ جۇمىس ىستەي الادى. دەگەنمەن قور باسشىسى ەرىكتىلەردى باستاپقى كەزدە پسيحولوگيالىق تۇرعىدان دايىندايتىندارىن تىلگە تيەك ەتتى.
ء«بىز ولاردى پسيحولوگيالىق تۇرعىدان دايىندايمىز. ەڭ الدىمەن, قوردىڭ جۇمىسىن باستاماس بۇرىن قىزمەتكەرلەرگە ەموتسيونالدى كومەك قاجەت ەكەنىن تۇسىندىك. سول سەبەپتى ولارعا موتيۆاتسيا بەرە وتىرىپ, ەرىكتىلەر قۇلشىنىسىن وياتا بىلدىك دەسەك, قاتەلەسپەگەنىمىز. وسىنداي پروتسەستەردەن وتكەننەن كەيىن عانا ەرىكتىلەردىڭ جۇمىس بارىسىنداعى كەز كەلگەن قيىندىققا توتەپ بەرە الادى. ماسەلەن, العاشقى ەكى بالانىڭ ارمانىن ورىنداعاننان سوڭ, ولار دا ەموتسيونالدى تۇرعىدان قيىن ەكەنىن ءتۇسىندى. سوندىقتان ءبىز مىندەتتى تۇردە شەبەرلىك ساباعىن وتكىزەمىز. وسىعان بايلانىستى جەلتوقسان ايىنىڭ سوڭىندا ولارمەن قوسىمشا تاعى ونلاين شەبەرلىك ساباعى ءوتتى», دەيدى ش.دۇيسەنعازى ۇلى.
سونداي-اق ول شەبەرلىك ساباعىنا رەسپۋبليكانىڭ تۇكپىر-تۇكپىرىنەن جاستار قىزىعۋشىلىق تانىتىپ, وزدەرىنىڭ بەلسەندىلىگىن كورسەتكەنىن ايتىپ ءوتتى. الداعى تاڭدا سۋپەرۆايزەرلەرگە بولەك شەبەرلىك ساباعى وتەتىنىن قوسا كەتتى.
قازاقستاندا قاتەرلى دەرتكە شالدىققان, ەمدەۋگە كەلمەيتىن ونداعان مىڭ ناۋقاس بالا بار. كەيبىرەۋىنىڭ كورەر قىزىعى ساناۋلى: بىرنەشە جىل نەمەسە بىرنەشە اي. «Menin Armanym» كورپوراتيۆتىك قورىنىڭ باستى ماقساتى − بالانىڭ مورالدىق جاعدايىن جاقسارتۋ ءۇشىن ءپاللياتيۆتى جəنە ەموتسيونالدى كومەك كورسەتۋ, əر بالاعا كۇندەلىكتى اۋىر سىرقاتتارمەن كۇرەسۋ ءۇشىن جاڭا سەرپىن بەرۋ. قازاقستاننىڭ كەز كەلگەن ازاماتى جوبانىڭ دەمەۋشىسى بولا الادى نەمەسە ەرىكتىلەر قوزعالىسىنا قاتىسا الادى.