باتىس قازاقستان وبلىستىق تىلدەردى دامىتۋ باسقارماسى جاڭا جوبانى قولعا الدى: اقپان ايىنان باستاپ رەسەي فەدەراتسياسىندا تۇراتىن قازاق دياسپورىنا وكىلدەرىنە قازاق ءتىلىن ۇيرەتۋ ءۇشىن ونلاين كۋرستار اشىلدى. ونى باتىس قازاقستان وبلىستىق «قازاق ءتىلى» قوعامىنىڭ توراعاسى التىنبەك ءابدىلمانوۆ تەگىن جۇرگىزۋدە.
مۇنداي ۇسىنىس رەسەيلىك قازاقتاردىڭ وزدەرىنەن ءتۇسىپتى. ونلاين ءتىل ۇيرەنۋ كۋرسى جىل سوڭىنا دەيىن جۇرگىزىلمەك.
رەسەيلىك قانداستار مەن باتىس قازاقستان وبلىستىق ءتىل باسقارماسىنىڭ اراسىندا ىسكەرلىك قارىم-قاتىناس بۇرىننان قالىپتاسقان. رەسەي فەدەراتسياسىنىڭ بەس وبلىسىمەن شەكتەسەتىن وڭىردە سوڭعى جىلدارى «اltyn kópir» اتتى حالىقارالىق فەستيۆال ءوتىپ كەلەدى. وتكەن جىلى پاندەميا سالدارىنان بۇل شارا ونلاين ۇيىمداستىرىلدى. شەتەلدەگى قازاق دياسپورالارىمەن ادەبي-مادەني بايلانىس ورناتۋ ماقساتىندا وتكەن بۇل شاراعا بۇرىن استراحان, ۆولگوگراد, ساراتوۆ, سامارا, ورىنبور قازاقتارى قاتىساتىن بولسا, سوڭعى ونلاين فەستيۆالگە رەسەي فەدەراتسياسىنىڭ التاي رەسپۋبليكاسىنان, ماسكەۋ, تومسك, نوۆوسيبيرسك, بارناۋل, كۋرگان, ەكاتەرينبۋرگ, چەليابينسك قالالارىنان قازاق دياسپوراسىنىڭ 92 وكىلى قاتىسقان.
- 2019 جىلى «اltyn kópir» اتتى حالىقارالىق فەستيۆالىنە ورالمەن شەكتەس بەس وبلىستان جاس قىز-جىگىتتەر كەلدى. ولاردىڭ ىشىندە جالىنداپ جانىپ تۇرعان, پاتريوت جاستار كوپ ەكەن. انا تىلىنە دەگەن ىقىلاس-ىنتاسى كەرەمەت. جاستار ءتىلىن, سالت-ءداستۇرىن بىلگىسى كەلەدى, دومبىرا ۇيرەنگىسى كەلەدى. ولارعا تىلمەن بىرگە ۇلتتىڭ رۋحى, ساناسى سىڭەتىنىن تۇسىندىردىك. ءالى كۇنگە دەيىن حابارلاسىپ تۇرامىز, - دەيدى باتىس قازاقستان وبلىستىق «قازاق ءتىلى» قوعامىنىڭ توراعاسى التىنبەك ءابدىلمانوۆ.
باتىس قازاقستان وبلىستىق تىلدەرى دامىتۋ باسقارماسى باسشىسىنىڭ مىندەتىن اتقارۋشى سۆەتا عانيەۆانىڭ ايتۋىنشا, قازىر وسى كۋرسقا قاتىسۋ ءۇشىن وڭىرمەن كورشىلەس وبلىستاردا تۇراتىن قازاقتاردان ءوتىنىش جينالىپ جاتىر ەكەن. استراحان, ۆولگوگراد, ساراتوۆ, سامارا جانە ورىنبور وبلىستارىنداعى قانداستارىمىزدىڭ ارقايسىسىنان 3 ادام, بارلىعى 15 ادام ىرىكتەلىپ, جىل سوڭىنا دەيىن ونلاين كۋرس جۇرەدى. ءبىر ەرەكشەلىگى, بۇل كۋرستا تەك قانا ءتىل ۇيرەتىلمەيدى, قازاق حالقىنىڭ ادەت-عۇرىپ, سالت-داستۇرىنە قاتىستى دا ونلاين ساباقتار بولادى. «كۋرس سوڭىندا ءبىز وعان قاتىسقان قانداستارىمىز انا ءتىلىن ەڭ تومەنگى دەڭگەيدەن ورتاشا دارەجەگە دەيىن مەڭگەرىپ, ءارى حالقىمىزدىڭ كوپتەگەن سالت-داستۇرىنەن حاباردار بولىپ شىعادى دەپ سەنەمىز» دەيدى سۆەتا عانيەۆا. ونلاين كۋرس ساباقتارى اقپان ايىنىڭ سوڭىنا تامان باستالىپ, اپتاسىنا ەكى مارتە ءوتىپ تۇرماق.
ارينە, مەملەكەتتىك ءتىلدى مەڭگەرۋ ماسەلەسى ءوز ەلىمىزدە دە وزەكتى تاقىرىپ. كونستيتۋتسيامىزدىڭ 7, 93-باپتارىندا «ۇكىمەت, جەرگىلىكتى وكىلدى جانە اتقارۋشى ورگاندار, ارناۋلى زاڭعا سايكەس, قازاقستان رەسپۋبليكاسىنىڭ بارلىق ازاماتى مەملەكەتتىك ءتىلدى ەركىن ءارى تەگىن مەڭگەرۋى ءۇشىن قاجەتتى ۇيىمداستىرۋشىلىق, ماتەريالدىق جانە تەحنيكالىق جاعدايدىڭ ءبارىن جاساۋعا مىندەتتى» دەپ كورسەتىلگەن. وسى ماقساتتا باتىس قازاقستان وبلىسىندا دا جىل سايىن قازاق ءتىلىن تەگىن وقىتۋ كۋرستارى ۇيىمداستىرىلىپ كەلەدى. سوڭعى ءۇش جىل ىشىندە وبلىستا 2,5 مىڭنان اسا ادام قازاق ءتىلىن وقىتۋ كۋرسىنان وتسە, اعىلشىن ءتىلى كۋرسىن 3 مىڭنان استام ادام تامامداعان.
باتىس قازاقستان