اتىراۋداعى ۋگ-157/11 مەكەمەسىندە جازاسىن وتەپ جاتقان ايەلدەر اعىلشىن ءتىلىن ۇيرەنۋدى باستادى. سونداي-اق ولار بيزنەس كۋرسىنا دا قاتىسىپ, كاسىپكەرلىكتىڭ قىر-سىرىن مەڭگەرۋگە ىنتا تانىتىپ وتىر.
– سOVID-19 پاندەمياسىنا بايلانىستى دارىستەر ونلاين-رەجىمىندە جۇرگىزىلۋدە. بارلىق سانيتارلىق تالاپ ساقتالىپ وتىر. بۇل كۋرستىڭ ماقساتى – جازاسىن وتەۋشىلەردىڭ اعىلشىن ءتىلىن جەتىك مەڭگەرۋىنە ىقپال ەتۋ. ويتكەنى تۇزەۋ مەكەمەسىنەن شىققان سوڭ ولاردىڭ وزدەرى قالاعان ماماندىعىمەن جۇمىسقا ورنالاسۋىنا سەپتىگى تيەدى, – دەيدى مەكەمەدەگى تاربيە ءبولىمىنىڭ باستىعى ۇلمەكەن اليەۆا.
جازاسىن وتەۋشىلەردىڭ ءبىرى – بالاۋسا. ادام ومىرىنە قاساقانا زيان كەلتىرگەنى ءۇشىن 8 جىلعا سوتتالىپتى. ول مۇندا اعىلشىن ءتىلى كۋرسىنا قاتىسۋمەن شەكتەلىپ جۇرگەن جوق. مەكەمەنىڭ كىتاپحاناسىنان اعىلشىن تىلىندەگى كىتاپتاردى الىپ وقيدى.
– اعىلشىن ءتىلى كۋرسىنا قىزىعۋشىلىقپەن قاتىسىپ ءجۇرمىن. سەبەبى بوستاندىققا شىققاننان كەيىن اتىراۋداعى شەتەلدىك كومپانيالاردىڭ بىرىنە جۇمىسقا تۇرعىم كەلەدى. بۇل ءۇشىن ارينە, شەت ءتىلىن ءبىلۋ كەرەك. وسى ورايدا مەكەمە باسشىلارى اعىلشىن ءتىلىن ۇيرەنۋگە مۇمكىندىك جاساپ وتىر, – دەيدى بالاۋسا.
ۇلمەكەن اليەۆانىڭ ايتۋىنشا, اقپان ايىندا 10-عا جۋىق جازاسىن وتەۋشىگە اعىلشىن ءتىلىن مەڭگەرگەنى تۋرالى سەرتيفيكات تاپسىرىلادى. قازىر مۇندا 150-دەن استام ايەل جازاسىن وتەپ ءجۇر.
اتىراۋ وبلىسى