بەردىبەك ساپارباەۆ اۋىل اكىمدەرىنىڭ ەسەبىنە قاتىسۋدا

ادەتتە, وبلىس اكىمى اۋدان اكىمدەرىنىڭ عانا ەسەبىن تىڭدايتىن. سول جەردە ءتيىستى تاپسىرماسىن بەرىپ, كەزەگىن كۇتكەن ماسەلەلەردى شەشۋدى جۇكتەيتىن. بىراق, بيىل اۋىلدارعا وبلىس اكىمىنىڭ ءوزى بارىپ ءجۇر. مۇنداعى ماقسات – ەلدىڭ جاعدايىن كوزبەن كورۋ, شەشىمىن كۇتكەن ماسەلەلەردىڭ شەشۋ جولدارىن قاراستىرۋ. سونداي-اق, بەردىبەك ساپارباەۆ ءوزى بارعان اۋداندا ورنالاسقان ءىرى كاسىپورىنداردىڭ جۇمىسشىلارىمەن دە كەزدەسۋدە. ول وڭىردەگى اۋىل اكىمدەرىنىڭ ەسەبىنە قاتىسۋدى مەركى اۋدانى, اسپارا اۋىلدىق وكرۋگىنەن باستادى. اكىم اۋەلى اۋىل تۇرعىندارىمەن كەزدەسىپ, وكرۋگ اكىمى گاۋحار وسپانبەكوۆانىڭ وتكەن جىلعى جۇمىس قورىتىندىلارى مەن اعىمداعى جىلعا ارنالعان مىندەتتەرى قامتىلعان ەسەبىن تىڭدادى.

اسپارا اۋىلدىق وكرۋگىنىڭ قۇرامىنا كىرەتىن اسپارا, قايىڭدىساي جانە قۇمارىق ەلدىمەكەندەرىندە 1,6 مىڭ ادام تۇرادى. وكرۋگ بيۋدجەتى 50 ميلليون تەڭگە كولەمىندە. ول 99,9 پايىزعا يگەرىلگەن. مۇنداعى 37 شارۋا قوجالىعىنداعى جالپى ەگىستىك جەر كولەمى 11,2 مىڭ گەكتاردى قۇرايدى. ولار ءداستۇرلى تۇردە بيداي, ارپا جانە بەدە وسىرۋمەن اينالىسادى. مال باسى دا ارتىپ كەلەدى. مال شارۋاشىلىعىن دامىتۋ ءۇشىن «جۇمىسپەن قامتۋدىڭ جول كارتاسى» باعدارلاماسى اياسىندا 3 شارۋا قوجالىعى 29,6 ميلليون تەڭگە نەسيەگە قول جەتكىزسە, تاعى 9 اسپارالىق «ەڭبەك» باعدارلاماسى بويىنشا گرانتتار العان. اسپارا اۋىلىندا فۋتبول الاڭى سالىنىپ, اققاينار كوشەسىنە اعىمداعى جوندەۋ جۇمىستارى جۇرگىزىلگەن. قايىڭدىساي اۋىلىنداعى كوشە دە جاڭارىپ, تاعى ءبىر كوشەنى جوندەۋگە جوبالىق-سمەتالىق قۇجاتتاما دايىندالعان. بۇدان بولەك اۋىلدا بالالار الاڭى اشىلىپتى. وسىنداعى نۇسىپبەك راقىش اتىنداعى جانە قۇمارىق اۋىلىنداعى سادۋاقاس رىسباەۆ اتىنداعى كوشەلەر دە جارىقتاندىرىلعان. ءۇش اۋىلدا دا گاز بار بولعانىمەن, ەكەۋىندە سۋ قۇبىرى جوق ەكەن. ول بويىنشا بۇگىندە ءتيىستى سمەتالار دايىندالعان, ەندى بيۋدجەتتىك قارجىلاندىرۋ ماسەلەسى شەشىلۋدە. سونداي-اق, اۋىلدا كوروناۆيرۋستىق ينفەكتسيانىڭ بىردە-بىر  جاعدايى تىركەلمەگەن. سونىمەن قاتار, اعىمداعى جىلعا ارنالعان اۋىل جوسپارىندا ەڭ اۋەلى اۋىزسۋ ماسەلەسىن شەشۋ جايى قاراستىرىلعان. كوشەلەردى جوندەۋ, قايىڭدىساي اۋىلىندا فۋتبول الاڭىن سالۋ, اسپارا اۋىلىندا 150 ورىندىق جاڭا مەكتەپتىڭ قۇرىلىسىنا جوبالىق-سمەتالىق قۇجاتتاما دايىنداۋ, اباتتاندىرۋ جۇمىستارى دا جوسپارلانعان. بەردىبەك ساپارباەۆ اۋىل اكىمىنەن اۋىل تۇرعىندارى مال شارۋاشىلىعىن دامىتۋعا باعىتتالعان «سىباعا», «قۇلان», «التىن اسىق» باعدارلامالارىنىڭ مۇمكىنشىلىگىن قانشالىقتى پايدالانىپ وتىرعانىن سۇرادى. دەگەنمەن, مۇندا ماسەلەلەر دە بار بولىپ شىقتى. حالىقارالىق اۆتوجول بويىندا ورنالاسقان اۋىلدا بىردە-ءبىر شاعىن جانە ورتا بيزنەس نىسانى جوق. الىنعان گرانتتار ۇساق مال ساتىپ الۋعا جۇمسالعان. وكرۋگتە 11 جۇمىسسىز ادام تىركەلگەن. كەزدەسۋدە «اسپارا» وندىرىستىك كووپەراتيۆىنىڭ باسشىسى قالدىباي الماباەۆ بەردىبەك ساپارباەۆتان وتكەن جىلعى سۋبسيديا ماسەلەسىن شەشىپ بەرۋدى سۇرادى. سونداي-اق, قوي ءجۇنىن وتكىزەتىن ورىننىڭ جوقتىعىن, بۇرىن شارۋالار ونى وتكىزىپ, جىل سايىن 20 ميلليون تەڭگەگە دەيىن تابىس تاپقانىن جەتكىزدى. ال, جەرگىلىكتى مەكتەپتىڭ قامقورشىلىق كەڭەسىنىڭ مۇشەسى نۇرجان بايجۇمانوۆ قولدانىستاعى ءبىلىم بەرۋ مەكەمەسى 34 جىل بۇرىن جاتاقحانا جوباسى رەتىندە سالىنعانىن, سوندىقتان وندا اكت جانە سپورت زالدارىنىڭ جوقتىعىن, دالىزدەرى تار ەكەنىن اتاپ ءوتتى. بەردىبەك ساپارباەۆ الداعى اقپان ايىندا بيۋدجەتتى ناقتىلاۋ كەزىندە بۇل ماسەلە ەگجەي-تەگجەيلى قارالاتىنىن جەتكىزدى.

سونىمەن قاتار, وبلىس اكىمى جامبىل ءوڭىرى بارلىق سالادا جاقسى كورسەتكىش كورسەتىپ وتىرعانىن, الايدا, اكىمدەردىڭ باستى مىندەتى – تۇرعىندارعا مەملەكەتتىك باعدارلامالاردىڭ ارتىقشىلىقتارىن جانە شارۋا قوجالىقتارىن ىرىلەندىرۋدىڭ ماڭىزدىلىعىن ءتۇسىندىرۋ ەكەندىگىن ايتتى. ەڭ باستىسى, قوعامداعى بەيبىتشىلىك پەن تىنىشتىق ساقتالۋى ءتيىس ەكەنىن جەتكىزدى. جيىننان كەيىن وبلىس اكىمى تۇرعىندار نازار اۋدارۋدى سۇراعان مەكتەپ عيماراتىن ارالاپ كوردى. بۇدان كەيىن ويتال اۋىلىندا ورنالاسقان «مەركى ىرىمشىك زاۋىتى» كاسىپورنىندا بولدى. سونداي-اق, وبلىس اكىمدىگى مەن اتالعان كاسىپورىن باسشىلىعى اراسىندا ەڭبەك زاڭناماسى سالاسىنداعى ءوزارا ىنتىماقتاستىق تۋرالى مەموراندۋم جاسالدى.

بۇدان كەيىن بەردىبەك ساپارباەۆ سارىسۋ اۋدانىنا كەلىپ, جاڭاارىق اۋىلدىق وكرۋگىنىڭ اكىمى وڭلاسىن مۇقاشەۆتىڭ ەسەبىن تىڭدادى. جيىنعا  وكرۋگ قۇرامىنا كىرەتىن اقتوعاي, ۇ.سىزدىقباي ۇلى اۋىلىنىڭ تۇرعىندارى دا قاتىستى. وكرۋگ اۋماعىندا 1652 ادام تۇرادى. مۇندا 45 شارۋا قوجالىعى جۇمىس ىستەيدى جانە 131 جەكە كاسىپكەر تىركەلگەن. اۋىلدىقتار جىل سايىن مال باسىنىڭ ءوسىپ كەلە جاتقانىن ايتادى. «اۋىل شارۋاشىلىعىن قولداۋ قورى» اق ارقىلى ون شارۋا قوجالىعى 57,4 ميلليون تەڭگە كولەمىندە قولداۋعا يە بولعان. بارلىعى 1107 گەكتار ەگىستىك القاپتا ءداستۇرلى تۇردە بيداي, ارپا جانە بەدە وسىرىلۋدە. اقتوعاي اۋىلىندا 117 اۋلا, ۇ.سىزدىقباي ۇلى اۋىلىندا 97 اۋلا ءوز جەكە قوسالقى شارۋاشىلىقتارىنداعى جەر ۋچاسكەلەرىن ءتيىمدى پايدالانۋدا. ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ «ەڭبەك» باعدارلاماسى بويىنشا 32 اۋىل تۇرعىنى قايتارىمسىز گرانتتارعا يە بولعان. ءتورت جۇمىسسىز قوعامدىق جۇمىستارعا تارتىلىپ, ەكى مامان جاستار تاجىريبەسى بويىنشا جۇمىسقا ورنالاسقان. اقتوعاي اۋىلىندا 8,3 ميلليون تەڭگەگە شاعىن سپورت الاڭى سالىنىپ, 3 كوشەگە جارىقتاندىرۋ جۇرگىزىلگەن. ءبىر جاقسىسى, وتكەن جىلى وكرۋگتە بىردە-ءبىر قىلمىس تىركەلمەپتى. وكرۋگ قۇرامىنداعى ەكى اۋىلدا دا قايىرىمدىلىق جۇمىستارى بەلسەندى جۇرگىزىلۋدە. جالعىزباستى قارتتار, از قامتىلعان جانە كوپبالالى وتباسىلار ازىق-ت ۇلىكپەن, ءدارى-دارمەكتەر مەن گيگيەنا قۇرالدارىمەن قامتاماسىز ەتىلۋدە. كەزدەسۋدە اقتوعاي اۋىلى ارداگەرلەر كەڭەسىنىڭ توراعاسى سەرىك اپپازوۆ تۇرعىندار سپورتپەن قىستا دا شۇعىلدانۋى ءۇشىن جابىق سپورت كەشەنىن سالۋ قاجەتتىگىن ايتسا, زەينەتكەر رىمبالا تۇرعىنبەكوۆا جەرگىلىكتى سۋ ارناسىنىڭ اينالاسىنا قوقىس كونتەينەرلەرىن ورناتۋدى سۇرادى. ال, «بىرلىك» شارۋا قوجالىعىنىڭ باسشىسى جۇرگەن ايتبەكوۆ مال شارۋاشىلىعىن دامىتۋ ءۇشىن سۋبسيدياعا مۇقتاج ەكەنىن ايتتى. بەردىبەك ساپارباەۆ اتالعان اۋىلدىق وكرۋگ اكىمىنە تۇرعىندار كوتەرگەن ماسەلەلەردى شەشۋدى تاپسىردى. «مەملەكەتتىك باعدارلامالار اياسىندا سارىسۋ اۋدانىنا 7 ميلليارد تەڭگە ءبولىندى. اۋقىمدى جۇمىس اتقارىلدى. ءبىزدىڭ ەندىگى ورتاق ماقساتىمىز – وسى وڭ ناتيجەنى ساقتاۋ. بۇعان تەك بەرىك بىرلىگىمىزدىڭ ارقاسىندا قول جەتكىزە الامىز», دەدى وبلىس اكىمى. سونداي-اق, بەردىبەك ساپارباەۆ سارىسۋ اۋدانىنىڭ اكىمى باقىتجان جاقسىلىقوۆقا جانە جاڭاارىق اۋىلدىق وكرۋگىنىڭ اكىمى وڭلاسىن مۇقاشەۆكە اۋىل تۇرعىندارىنىڭ تابىسىن ارتتىرۋ بويىنشا پيلوتتىق جوبانى ىسكە اسىرۋ, پايدالانۋسىز جاتقان اۋىل شارۋاشىلىعى جەرلەرىن قايتارۋ, ۇساق شارۋا قوجالىقتارىن بىرىكتىرۋ, قايتا وڭدەۋ بويىنشا ءسۇت جانە ەت تسەحتارىن اشۋ, بارلىق قاۋىپسىزدىك شارالارىن ساقتاۋدى تۇسىندىرۋگە قاتىستى جۇيەلى جۇمىستار جۇرگىزۋدى تاپسىردى. كەزدەسۋدەن سوڭ بەردىبەك ساپارباەۆ وتكەن جىلى كۇردەلى جوندەۋدەن وتكەن مەكتەپ عيماراتىن ارالاپ كوردى. ديرەكتور ءامينا شەگىروۆا «جۇمىسپەن قامتۋدىڭ جول كارتاسى» باعدارلاماسى بويىنشا 157 ميلليون تەڭگە بولىنگەنىن ايتتى. 2003 جىلى ىرگەسى قالانعان مەكتەپ عيماراتىنىڭ ەدەندەرى, ەسىكتەرى, تەرەزەلەرى, جىلىتۋ جۇيەسى تولىعىمەن اۋىستىرىلىپ, سانيتارلىق توراپ جابدىقتالعان. سونداي-اق, جاڭا جيھازدار ساتىپ الىنعان. روبوتوتەحنيكا كابينەتى اشىلىپ, 22 بەينەكامەرا ورناتىلىپتى. قازىر 178 بالا شتاتتىق رەجيمدە ءبىلىم الۋدا. بۇدان كەيىن وبلىس اكىمى اۋدان ورتالىعى جاڭاتاس قالاسىنىڭ ماڭىنداعى «ەۆروحيم-تىڭايتقىش» كاسىپورنىنا ارنايى بارىپ, سەرىكتەستىكتىڭ باس ديرەكتورى يگور گەورگياديمەن وتكەن جىلدىڭ قورىتىندىسىن سارالادى. وتكەن جىلمەن سالىستىرعاندا كەن ءوندىرۋ 26,6 پايىزعا ۇلعايسا, فوسفوريت ۇنتاعىنىڭ ءوندىرىسى 622 100 تونناعا جەتكەن. باسقوسۋدا ەپيدەمياعا قارسى ءىس-شارالاردى ۇيىمداستىرۋ, وندىرىستىك كەشەننىڭ تۇراقتى جۇمىسىن قامتاماسىز ەتۋ, جۇمىس ورىندارىن ساقتاۋ, سونداي-اق, سارىسۋ اۋدانىنىڭ الەۋمەتتىك-ەكونوميكالىق دامۋ ماسەلەلەرىنە ايرىقشا نازار اۋدارىلدى. كومپانيانىڭ الەۋمەتتىك اۋدارىمدارى 24 ميلليون دوللاردى قۇراعان. كەزدەسۋ بارىسىندا تاراپتار ءوزارا تۇسىنىستىك تۋرالى مەموراندۋمعا قول قويدى.

سونىمەن قاتار, بەردىبەك ساپارباەۆ تالاس اۋدانى, قاراتاۋ اۋىلدىق وكرۋگىنىڭ اكىمى اسحات مالتاشوۆتىڭ تۇرعىندار الدىندا وتكەن ەسەپ بەرۋ جيىنىنا قاتىستى. جيىن وكرۋگ قۇرامىنا كىرەتىن قاراوي اۋىلىندا ءوتتى. ال, وكرۋگتىڭ اكىمشىلىك ورتالىعى ەسەيحان اۋىلىنا وتكەن جىلى كەلگەن وبلىس اكىمى جەرگىلىكتى اۋىلدىق كلۋبتى كۇردەلى جوندەۋدەن وتكىزىپ, ۇيالى بايلانىستى ىسكە قوسىپ بەرگەن بولاتىن. ەندى قاراويلىقتار بالالار ۇيىرمەلەرىن اشۋ ءۇشىن كلۋب شتاتىن ۇلعايتۋدى سۇراپ وتىر. اۋىلدا «جۇمىسپەن قامتۋدىڭ جول كارتاسى» مەملەكەتتىك باعدارلاماسى اياسىندا قاراوي اۋىلىندا بالالارعا ارنالعان ويىن جانە فۋتبول الاڭدارى سالىنعان. ەڭ باستىسى – اۋىلدان وبلىستىق ماڭىزى بار جاڭاتاس-قاراتاۋ-تاراز تراسساسىنا دەيىنگى ۇزىندىعى 8,3 شاقىرىم جول ۋچاسكەسى قايتا جاڭارتىلعان. قاراتاۋ اۋىلدىق وكرۋگىنىڭ اتالعان ەكى ەلدىمەكەنىندە بارلىعى 1,2 مىڭ ادام تۇرادى. ەكەۋىندە دە جاڭا مەكتەپ بار, دارىگەرلىك امبۋلاتوريا, مەديتسينالىق جانە ۆەتەرينارلىق پۋنكتتەر, پوشتا بولىمشەسى مەن كىتاپحانالار جۇمىس ىستەيدى. وكرۋگتە 75 شارۋا قوجالىعى تىركەلگەن. وكرۋگ اۋماعى 75 مىڭ گەكتار بولسا, ونىڭ 2,3 مىڭ گەكتارىن كۇزدىك بيداي مەن جازدىق ارپا القابى قۇرايدى. شارۋا قوجالىقتارىندا 1,1 مىڭ باس ءمۇيىزدى ءىرى-قارا, 686 جىلقى جانە 22,2 مىڭنان استام قوي بار. «اق بۇلاق» باعدارلاماسى اياسىندا قۇنى 540,8 ميلليون تەڭگەگە ەسەيحان اۋىلىن ورتالىقتاندىرىلعان اۋىزسۋمەن جابدىقتاۋ جوباسى جۇزەگە اسىرىلعان. وكرۋگ بيۋدجەتى 74,4 ميلليون تەڭگە دەسەك, ول تولىق كولەمدە يگەرىلگەن. اۋىلدا وتكەن جىلى بىردە-ءبىر قىلمىس تىركەلمەگەن. «اسارلاتىپ ءۇي سالۋ» جوباسى اياسىندا اۋىل تۇرعىندارى مۇقتاج وتباسىلارعا ارناپ ءۇش پاتەرلى تۇرعىن ءۇي سالىپ بەرگەن. ەندى ونى الداعى ناۋرىز مەيرامىنا وراي تاپسىرۋ جوسپارلانۋدا. جەرگىلىكتى دەمەۋشىلەر ەسەبىنەن 78 وتباسىعا كومەك كورسەتىلگەن. سونىمەن قاتار, كەزدەسۋدە جەرگىلىكتى تۇرعىندار بوگەتتى جانە جالپى قاراوي اۋىلى ارقىلى وتەتىن قاراشات وزەنىنىڭ ارناسىن تازارتۋ, ودان وتەتىن جاياۋ جۇرگىنشىلەر كوپىرىن سالۋ ماسەلەسىن كوتەردى. جەدەل جاردەم كولىگىن ءبولۋ تۋرالى دا ايتىلدى. جەدەل جاردەم كولىگى بويىنشا اۋداندىق ورتالىق اۋرۋحانانىڭ باس دارىگەرى يمام مىرزاەۆ قولداۋ كورسەتۋگە ۋادە بەردى. سونداي-اق, اۋىل تۇرعىندارى وبلىس اكىمىنەن ەسەيحان اۋىلىنداعى مادەنيەت ءۇيىن كۇردەلى جوندەۋدەن وتكىزىپ بەرۋدى سۇرادى. «بوگەتتى جوندەۋگە كومەكتەسەمىز. داقىلداردى سۋارۋعا ارنالعان ىلعال قورى بولۋى كەرەك. سۋ ماسەلەسىندەگى ءبىزدىڭ باستى مىندەتىمىز – كورشىلەرگە تاۋەلدىلىكتى بارىنشا ازايتۋ, سۋ ۇنەمدەيتىن تەحنولوگيالاردى بەلسەندى ەنگىزۋ. وبلىستىڭ سۋ بالانسى ازىرلەنۋدە. شاعىن سۋ قويمالارىن قۇرۋ قاراستىرىلىپ, ارنالاردى تازارتۋ بويىنشا مەحوتريادتار قارقىندى جۇمىس ىستەۋدە. ءبىز سۋدى جيناپ, مۇقيات پايدالانۋدى ۇيرەنۋىمىز كەرەك. شارۋا قوجالىقتارىن ىرىلەندىرۋ ماسەلەسى كۇن تارتىبىنەن تۇسپەيدى. وتىز جىلدىق تاريح ۇساق شارۋاشىلىقتاردىڭ تيىمسىزدىگى مەن السىزدىگىن كورسەتىپ بەردى. تەك كۇش بىرىكتىرۋ ارقىلى عانا ءبىز ايتارلىقتاي جەتىستىككە جەتە الامىز. جالپى, ءار اۋداندا 2-3 ىرى اگروقۇرىلىمدار بولۋى قاجەت», دەدى بەردىبەك ساپارباەۆ. سونداي-اق, وبلىس اكىمى تالاس اۋدانىنداعى «قاراتاۋ – پرو», «Talas Investment Company» سياقتى كاسىپورىنداردى ارالاپ, جۇمىسىمەن تانىستى. «قاراتاۋ پرو» جشس باسشىسى الەكسەي پودولسكي 2015 جىلدان باستاپ زاۋىت 110 مىڭ تونناعا جۋىق مارمار ۇنتاعىن شىعارىپ كەلە جاتقانىن ايتتى. بۇل ءونىم قۇرعاق قۇرىلىس قوسپالارى, جۋعىش زاتتار, بوياۋلار مەن باسقا دا تاۋارلار وندىرىسىندە قولدانىلادى. ءوندىرىس كولەمىنىڭ ورتاشا ءوسىمى شامامەن 10 پايىزدى قۇرايدى. اعىمداعى جىلى جارتى ميلليارد تەڭگەگە دەيىن ينۆەستيتسيا تارتۋ جوسپارلانۋدا. بۇل ورايدا ءوندىرىس ءوسىمى كەمىندە 50 پايىزعا جەتپەك. جۇمىس ورىندارىنىڭ سانى 30 پايىزعا ارتادى دەپ كۇتىلۋدە. دايىن ءونىم اۆتو جانە تەمىر جول كولىكتەرىنە تيەلىپ, ءتيىستى ورىندارعا جەتكىزىلەدى. قازىرگى تاڭدا زاۋىتتا جوسپارلى الدىن الۋ جوندەۋ جۇمىستارى جۇرگىزىلۋدە. ال, «Talas Investment Company» كاسىپورنىنىڭ ديرەكتورى ەرلان نۇرحانوۆتىڭ ايتۋىنشا, وتكەن جىلى 12,5 مىڭ توننا ناتري ءتسيانيدى ءوندىرىلىپ, قۋاتتىلىقتىڭ 80 پايىزى جۇكتەلگەن. اعىمداعى جىلى 14 مىڭ توننا ءونىم شىعارۋ جوسپارلانىپ, جۇكتەمە 95 پايىزعا جەتپەك. ەگەر 2018 جىلى بيۋدجەتكە 420 ميلليون تەڭگە سالىق اۋدارىلسا, وتكەن جىلدىڭ قورىتىندىسى بويىنشا بۇل كورسەتكىش 600 ميلليون تەڭگەنى قۇراعان. زاۋىتتىڭ ەكىنشى كەزەڭى ىسكە قوسىلعاننان كەيىن بۇل 1-1,2 ميلليارد تەڭگەنى قۇراماق. بۇگىندە سەرىكتەستىكتە بارلىعى 552 ادام جۇمىس ىستەيدى. ولاردىڭ 80 پايىزى جەرگىلىكتى تۇرعىندار ەكەن. قازىرگى ۋاقىتتا اتالعان كومپانيا قۇنى 25,8 ميلليارد تەڭگە بولاتىن ناتري ءتسيانيدىن 30 مىڭ تونناعا دەيىن ءوندىرۋدى كەڭەيتۋ جونىندەگى ينۆەستيتسيالىق جوبانى ىسكە اسىرۋدا. جابدىقتاردى جەتكىزۋگە جانە مونتاجداۋعا كەلىسىمشارت جاسالىپ, باس جوسپار ايقىندالىپ, نەگىزگى قۇرىلىس جانە ينفراقۇرىلىم بويىنشا سمەتالىق قۇجاتتار دايىندالعان.

جامبىل وبلىسىنىڭ اكىمى بەردىبەك ساپارباەۆتىڭ وبلىستىڭ ون اۋدانىنداعى اۋىل اكىمدەرىنىڭ دە ەسەبىنە قاتىسۋى جوسپارلانعان.