تسيفرلىق تەڭگە – قولما-قول اقشا سحەمالارى مەن جالعان كاسىپورىنداردى توقتاتادى. بۇل تۋرالى قر سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى اليك شپەكباەۆ ايتتى, دەپ حابارلايدى Egemen.kz.
«تاجىريبە كورسەتكەندەي, ساتىپ الۋ سالاسى كولەڭكەلى ەكونوميكانى جانداندىراتىن جانە جەمقورلىق تۋدىراتىن سالالاردىڭ ءبىرى. سوندىقتان ۇلتتىق پالاتامەن بىرلەسكەن جۇمىستىڭ تاعى ءبىر باعىتى بيۋدجەتتى قالىپتاستىرۋ كەزىندە دە, ونى يگەرۋ كەزىندە دە باعا كومپلاەنسىن ەنگىزۋ. جاسىراتىنى جوق, كوبىنەسە بيۋدجەتكە سالىناتىن باعالار جەمقورلىق مۇددەلەرى ءۇشىن ادەيى قىمباتتاتىلادى. وسىعان وراي ءبىز ناقتى باعالار مەن ىسكە اسىرىلعان شارتتار نەگىزىندە قانداي دا ءبىر ساتىپ الۋدىڭ بيۋدجەتىن قالىپتاستىرۋدى ۇسىنامىز. بۇل ساتىپ الىناتىن تاۋارلاردىڭ, جۇمىستار مەن قىزمەتتەردىڭ بيۋدجەتىن «ۇلعايتۋعا» مۇمكىندىك بەرمەيدى. وسىلايشا, ۇلەستەس كومپانيالاردىڭ باعا ۇسىنىستارى نەگىزىندە بيۋدجەتتىك جوسپارلاۋ ارتتا قالادى», دەدى ا. شپەكباەۆ.
ونىڭ ايتۋىنشا, ورىندالعان جۇمىستاردىڭ جالعان اكتىلەرىنە قول قويۋ پروبلەماسىن شەشۋ ءۇشىن ولاردى ەگجەي-تەگجەيلى جاريالاۋ, سونداي-اق تاپسىرىس بەرۋشىلەردىڭ ونى مىسالى 3 كۇننەن اسپايتىن مەرزىمدە قاراۋىن ەنگىزۋ ۇسىنىلادى. بۇل ءبىر عانا ماقساتتى كوزدەيتىن اكتىلەرگە قول قويۋدى قاساقانا كەيىنگە قالدىرۋ مۇمكىندىگىن ەداۋىر قىسقارتادى.
«تسيفرلىق تەڭگەنى تەز ارادا ەنگىزۋ – ساتىپ الۋداعى جەمقورلىق پروبلەماسىنىڭ ىرگەلى شەشىمى, بۇل بيۋدجەت قاراجاتىن يگەرۋدىڭ بۇكىل پروتسەسىن قاداعالاۋعا مۇمكىندىك بەرەدى, «قولما-قول اقشا» سحەمالارىن جانە جالعان كاسىپورىندار قۇرۋدى توقتاتادى», دەدى ا. شپەكباەۆ.