كەنشىلەر استاناسىندا اشىلعان ۆاكتسينالاۋ ورتالىعى كەلەسى اپتادان باستاپ جۇمىسقا كىرىسەتىن بولدى. بۇعان قىسقا مەرزىم ىشىندە وتباسىلىق دەنساۋلىق ورتالىعىن قايتا بەيىمدەۋ ارقىلى قول جەتكىزىلدى, دەپ حابارلايدى Egemen.kz. وبلىس اكىمىنىڭ ءباسپاسوز قىزمەتىنە سىلتەمە جاساپ.
«قالالىق امسك ورتالىعى» جشس ديرەكتورى تاتيانا باشيروۆا بۇگىنگى كۇندە جاۋاپتى ناۋقانعا دايىندىقتىڭ قىزۋ ءجۇرىپ جاتقانىن ايتادى.
– ۆاكتسينالاۋ ورتالىعى ءبىزدىڭ فيليالىمىز. مۇندا جالپى تاجىريبە دارىگەرلەرى قابىلداعان وتباسىلىق دەنساۋلىق ورتالىعى جانە كۇندىزگى ستاتسيونار فيليالى ورنالاسقان. ءبىز ءوز بازامىزدا ۆاكتسينالاۋ جۇرگىزۋگە قاجەتتى نارسەنىڭ بارلىعىن تەز ارادا دايىنداي الدىق. كابينەتتەردى كوشىرۋ, جابدىقتاردى ورنالاستىرۋ قاجەت بولدى. مەديتسينالىق مۇزداتقىش كامەرالار, تەرموكونتەينەرلەر الىندى. ماماندارىمىز, اتاپ ايتقاندا, دارىگەرلەر مەديتسينالىق ۋنيۆەرسيتەت بازاسىندا, مەدبيكەلەر كوللەدجدە ارنايى وقۋدان ءوتتى, – دەيدى ول.
ۆاكتسينالاۋ ورتالىعىندا تەراپەۆت-دارىگەردىڭ كابينەتى, ەگۋ بولمەلەرى, ەكپەدەن كەيىنگى باقىلاۋ ايماعى بار. شۇعىل جانە شتاتتان تىس جاعدايلار ءۇشىن جەدەل مەديتسينالىق كومەك ايماعى جابدىقتالعان. سونىمەن قاتار كابينەتتەردە ۆاكتسيناتسيالاۋدىڭ بارلىق ۇدەرىسىن تىركەيتىن بەينەباقىلاۋ كامەرالارى ورناتىلعان جانە ول بەينەدەرەكتەر جىل سوڭىنا دەيىن ساقتالاتىن بولادى.
قاراعاندى وبلىستىق دەنساۋلىق ساقتاۋ باسقارماسىنىڭ قوعامدىق دەنساۋلىق ساقتاۋ قىزمەتىنىڭ باسشىسى بيبىگۇل تولەگەنوۆا ءدال وسىنداي ۆاكتسينالاۋ ورتالىقتارى ءوڭىردىڭ باسقا دا قالالارىندا جۇمىس ىستەيتىنىن حاباردار ەتتى.
– ءبىز ۆاكتسينالاۋعا دايىندىقتى جەلتوقسان ايىندا باستادىق. قاجەتتى مەديتسينالىق مۇزداتقىشتار مەن تەرموكونتەينەرلەرگە تاپسىرىس بەردىك. جابدىقتىڭ ءبىر بولىگى جەتكىزىلدى, قالعانى جولدا. وبلىس بويىنشا العاشقى مەديتسينالىق-سانيتارلىق كومەك ۇيىمدارىندا 115 ەكپە كابينەتى اشىلادى. ءبىز تولىق قىزمەت كورسەتەتىن جەكە ورتالىقتار ۇيىمداستىرۋدى ۇيعاردىق. ءبىرىنشىسى قاراعاندىدا امسك قو بازاسىندا قۇرىلدى. ودان ءارى تەمىرتاۋ, جەزقازعان جانە بالقاش قالالارىندا اشامىز. قازىر ۆاكتسينانىڭ جەتۋىن كۇتىپ وتىرمىز جانە بۇل ماڭىزدى ءىس-شارانى 1 اقپاندا باستاماقپىز, – دەپ مالىمدەدى ب.تولەگەنوۆا.
جالپى ماماننىڭ ايتۋى بويىنشا, ۆاكتسينالاۋ الدىندا پاتسيەنتتى مىندەتتى تۇردە دارىگەر تەكسەرىپ, ىستىعىن ولشەپ, قاجەتتى اقپاراتتى جينايدى. ەگۋ پاتسيەنت ۆاكتسيناتسياعا جازباشا كەلىسىمىن بەرگەننەن كەيىن عانا جۇزەگە اسىرىلادى. ال جوسپار بويىنشا ءبىر ەگۋ كابينەتىنىڭ وتكىزۋ قابىلەتى ورتاشا ەسەپپەن العاندا كۇنىنە 60 ادامدى قۇراۋى ءتيىس دەگەن بولجام بار.
«سپۋتنيك V» ۆاكتسيناسىن جەتكىزۋ لوگيستيكاسىمەن بىرىڭعاي ديستريبيۋتور «سك-فارماتسيا» اينالىسادى. ال ەكپە پرەپاراتىنىڭ ءوزى تەحنولوگيالار ترانسفەرتى بويىنشا قاراعاندى فارماتسەۆتيكالىق كەشەنىندە وندىرىلەدى. اتالعان ۆاكتسينا «سك-فارماتسيا» قويمالارىنا كەلىپ تۇسكەننەن كەيىن وبلىستىق ەكپە قويماسىنا جەتكىزىلەدى دە, ايماقتارعا تاراتىلادى.
نەگىزىندە «سپۋتنيك V» ۆاكتسيناسىنىڭ لوگيستيكاداعى وزىندىك ەرەكشەلىكتەرى بار ەكەنىن ايتا كەتۋ كەرەك. ماسەلەن ونى تاسىمالداۋ كەزىندە -20° C تەمپەراتۋرالىق رەجىمدى ساقتاۋ قاجەت. سوندىقتان تاسىمالداۋ بەلگىلەنگەن تەمپەراتۋرانى 48 ساعات بويى ۇستاپ تۇراتىن سىيىمدىلىعى 80 ليتر بولاتىن ارنايى تەرموكونتەينەرلەردە جۇزەگە اسىرىلادى. تەمپەراتۋرالىق رەجىمدى جازۋدى لوگگەرلەر جۇرگىزەدى. كەيىننەن ەلەكتروندى دەرەكتەر تىركەۋشىسىن كومپيۋتەرگە قوسىپ, تەمپەراتۋرانىڭ اۋىتقۋىن باقىلاۋعا بولادى. ال بۇگىنگى كۇندە وبلىستىق دەنساۋلىق ساقتاۋ باسقارماسى ۆاكتسينانى ساقتاۋعا ارنالعان ارنايى مەديتسينالىق مۇزداتقىشتاردى ساتىپ العان ەكەن.
قاراعاندى وبلىسىندا ۆاكتسينالاۋ مىناداي جوسپار بويىنشا ىسكە اسادى: ءبىرىنشى كەزەڭدە ءوڭىردىڭ ينفەكتسيالىق اۋرۋحانالاردىڭ, جەدەل مەديتسينالىق كومەكتىڭ, رەانيماتسيا بولىمشەلەرىنىڭ, امسك ۇيىمدارىنىڭ, قابىلداۋ بولمەلەرىنىڭ جانە سانەپيدقىزمەتتىڭ توعىز مىڭعا جۋىق مەدقىزمەتكەرى ەگىلەدى. ودان كەيىن پەداگوگتار, كۇشتىك قۇرىلىمدار قىزمەتكەرلەرىن جانە سوزىلمالى اۋرۋلارمەن ديسپانسەرلىك ەسەپتە تۇرعان ادامدار ۆاكتسينالاۋدان وتەدى.
جاۋاپتى ماماندار رەسەيلىك «سپۋتنيك V» ۆاكتسيناسى قاۋىپسىز دەگەندى ايتادى. بۇل ءوزى ەكى قۇرامداس بولىكتەن تۇراتىن پرەپارات ەكەن. ءبىرىنشى جانە ەكىنشى ەگىلۋدىڭ اراسىنداعى مەرزىم 21 كۇن بولۋى ءتيىس. ءبىر ەسكەرتە كەتەتىن جايت, ۆاكتسينالاۋعا 18 بەن 60 جاس ارالىعىنداعى ەرەسەكتەر عانا جاتادى. ال باسقا جاس ساناتتارى ءۇشىن سىناقتار ءالى جۇرگىزىلمەگەن. ەگەر دە دەرتىنىڭ ءجىتى كەزەڭىندە بولماسا, سوزىلمالى اۋرۋلارى بار ادامداردى دا ەگۋگە بولادى ەكەن. تاعى ءبىر ايتا كەتەتىن نارسە, ەگەر ادام التى اي بۇرىن كۆي-مەن اۋىرىپ تۇرعان بولسا, بۇل جاعداي ۆاكتسينالاۋدىڭ قاجەتى جوق دەگەن ءسوز ەمەس. سەبەبى ادام يممۋنيتەتىنىڭ قانداي مەرزىمگە قالىپتاساتىنى ءالى بەلگىسىز بولىپ وتىر.
مامان-دارىگەرلەر ۆاكتسينالاۋدان ءبىر تاۋلىك بۇرىن جانە ودان كەيىن دە ءبىر كۇن بويى سپورتتىڭ اۋىر تۇرلەرىمەن شۇعىلدانۋعا, ساۋناعا بارۋعا جانە سپيرتتىك ىشىمدىكتەر ىشۋگە بولمايتىنىن ەسكەرتەدى.