بىرەر كۇن بۇرىن شۆەيتساريانىڭ نون قالاسىندا ۋەفا جاسوسپىرىمدەر ليگاسىنا قاتىساتىن كوماندالاردىڭ جەرەبە تارتۋ ءراسىمى ءوتتى. اتالعان دودادا بيىل «قايرات» كلۋبىنىڭ جاسوسپىرىمدەر كومانداسى باق سىنايدى.
جەرەبە قورىتىندىسى بويىنشا «قايراتتىڭ» 1/32 فينالداعى قارسىلاسى مولدوۆانىڭ «شەريف» كلۋبىنىڭ جاستارى بولادى. ەكى ۇجىم اراسىنداعى ماتچ مولدوۆادا وتەدى. تۋرنير ەرەجەسىنە سايكەس جەڭىمپاز كوماندا تەك ءبىر ويىن ناتيجەسى بويىنشا انىقتالادى. پلەي-وفف كەزەڭىنىڭ العاشقى ساتىسىنداعى ويىندار 2 جانە 3 ناۋرىز كۇندەرىنە بەلگىلەنگەن.
جارىستىڭ 1/32 جانە 1/16 فينالدىق كەزەڭىنىڭ ماتچتارى ەكى باعىتتا جۇرگىزىلەدى. العاشقىسى ءار ەلدىڭ چەمپيوندارى اراسىندا, ەكىنشىسى چەمپيوندار ليگاسى جولىمەن جۇزەگە اسادى. ال 1/8 فينالدان باستاپ جولدار بىرىكتىرىلەدى. ايتا كەتەيىك, الماتىنىڭ «قايراتى» بىلتىر ەل چەمپيوناتىندا توپ جارعاندىقتان, ونىڭ جاس فۋتبولشىلارى ءار ەلدىڭ چەمپيوندارىمەن كۇشتىنى انىقتاۋعا قاتىسادى.