اتىراۋدا Whatsapp مەسسەندجەرى ارقىلى ۆيرۋسقا قارسى جانە دەنە قىزۋىن تۇسىرەتىن ءتۇرلى پرەپەرات ءدارىحانالاردان الىنىپ جاتىر دەگەن اقپارات تاراعان بولاتىن. بۇل دەرەكتى وبلىستىق دەنساۋلىق باسقارماسى مەديتسينالىق كومەكتى ۇيىمداستىرۋ جانە ليتسەنزيالاۋ ءبولىمىنىڭ باسشىسى نينا وسپانوۆا جوققا شىعارىپ وتىر.
«الەۋمەتتىك جەلىدە تارالعان اقپارات جالعان. كەرىسىنشە, وڭىردە كوروناۆيرۋس ينفەكتسياسىنىڭ كۇن ساناپ كوبەيۋىنە بايلانىستى ىندەتتىڭ الدىن الۋ شارالارىن قاتاڭداتۋ كەزىندە دارىلىك قوردى قايتا قاراۋ, تولىقتىرۋ جۇمىستارى جۇرگىزىلۋدە» دەيدى نينا وسپانوۆا.
ونىڭ ايتۋىنشا, قازىر وبلىستا جەكە قورعانىش قۇرالدارى مەن دارىلىك زاتتاردىڭ ەكى ايلىق قورى ساقتاۋلى تۇر. ونىڭ ىشىندە ۆيرۋسقا قارسى امبۋلاتوريالىق جاعدايدا ەم قابىلداۋعا ارنالعان 189 مىڭعا جۋىق مەديتسينالىق پرەپەرات پەن ينفەكتسيالىق ستاتسيونارلاردا 1 ميلليونعا جۋىق دارىلىك زات بار.