بۇگىندە ەلىمىزدە ەرەكشە قاجەتتىلىكتەرى بار بالالاردى وقىتۋ, قوعامعا بەيىمدەۋ مەملەكەت الدىندا تۇرعان كەلەلى ماسەلەنىڭ ءبىرى. ينكليۋزيۆتى وقىتۋ نەگىزىندە بالالاردىڭ قانداي دا ءبىر كەمسىتۋشىلىككە ۇشىراماۋى قاجەت. بارلىق ءبىلىم الۋشىلاردىڭ تەڭ قۇقىلىعى, قولايلى جاعداي تۋعىزۋ, ولاردىڭ قوعامدا ءوزىن جايلى سەزىنۋى ءبىلىم بەرۋ مەكەمەلەرىندەگى ماڭىزدى جۇمىستاردىڭ ءبىرى.
الماتى قالاسىنىڭ اكىمى ب.ساعىنتاەۆ ەرەكشە قاجەتتىلىكتەرى بار بالالارعا ارنالعان وقۋ بارىسىن ۇيىمداستىرۋدىڭ جاعدايلارىمەن تانىسۋ بارىسىندا №7 ارنايى تۇزەتۋ مەكتەپ-ينتەرناتىندا بولىپ, قولعا الىنعان سانيتارلىق-ەپيدەميالىق قاۋىپسىزدىك شارالاردى كورىپ قايتتى. وسى ورايدا قالا باسشىسى ەرەكشە قاجەتتىلىكتەرى بار بالالارعا قولداۋ كورسەتىپ, ولاردىڭ جان-جاقتى دامۋىنا بارىنشا جاعداي جاسالاتىندىعىنا توقتالدى. ەرەكشە قاجەتتىلىكتەرى بار بالالاردى الەۋمەتتەندىرۋ وڭاي ەمەستىگىن العا تارتقان ب.ساعىنتاەۆ بالا تاربيەسىندە اتا-انالاردىڭ دا شىدامدى بولۋى قاجەتتىلىگىن اتاپ ءوتتى.
جاڭا توقساننىڭ باستالۋىنا بايلانىستى قالاداعى مەكتەپتەردە كەزەكشى توپتاردىڭ سانى ارتقانىن اتاپ وتكەن قالا باسشىسى بۇل باعىتتا مۇمكىندىگى شەكتەۋلى بالالارعا ەرەكشە كوڭىل بولىنەتىندىگىن جەتكىزدى. مەكتەپتە 216 بالا ءبىلىم السا, 200 بالاعا ءۇي جاعدايىندا ساباق بەرىلەدى. بالالارعا الەۋمەتتىك-پسيحولوگيالىق وڭالتۋ مەن بەيىمدەۋ, شىعارماشىلىق الەۋەتىن دامىتۋ, ەڭبەككە باۋلۋ ءۇشىن بارلىق جاعداي جاسالعان. تىگىن نەمەسە اعاش ۇستاسى ءىسىنىڭ قىر-سىرىن مەڭگەرە وتىرىپ, جاسوسپىرىمدەر 9-سىنىپتان كەيىن كوللەدجگە ءتۇسىپ, ماماندىق الۋىنا دا جاعدايلار قاراستىرىلعان. سونداي-اق بۇل مەكتەپتە ەمدىك دەنە شىنىقتىرۋ, مۋزىكا مەن بي بويىنشا ساباقتار وتەدى.
الماتى