الماتىدا «مۇستافا شوقاي. ون ەكى تومدىق تولىق شىعارمالار جيناعى» جانە «پول گۋردە – ۆەرنىي قالاسىنىڭ فرانتسۋزى» كىتاپتارىنىڭ تۇساۋكەسەرى ءوتتى. ايتۋلى شارانى ر. سۇلەيمەنوۆ اتىنداعى شىعىستانۋ ينستيتۋتى, فرانتسيانىڭ قازاقستانداعى ەلشىلىگى مەن قر ۇلتتىق كىتاپحاناسى بىرلەسىپ ۇيىمداستىردى.
الماتىدا «مۇستافا شوقاي. ون ەكى تومدىق تولىق شىعارمالار جيناعى» جانە «پول گۋردە – ۆەرنىي قالاسىنىڭ فرانتسۋزى» كىتاپتارىنىڭ تۇساۋكەسەرى ءوتتى. ايتۋلى شارانى ر. سۇلەيمەنوۆ اتىنداعى شىعىستانۋ ينستيتۋتى, فرانتسيانىڭ قازاقستانداعى ەلشىلىگى مەن قر ۇلتتىق كىتاپحاناسى بىرلەسىپ ۇيىمداستىردى.
تۇبىندە تاۋەلسىز بولاتىنىمىزعا سەنگەن تۇلعاعا قاتىستى وسىناۋ شارالار رۋحاني تۇرعىدا مۇستافا شوقايدى تۋعان جەرىنە ورالتتى دەپ ايتۋعا ەندى نەگىز بار.
– قازاقستانداعى فرانتسيا مادەنيەتى جىلى شەڭبەرىندە ءوتىپ وتىرعان بۇل شارا 3 كۇننەن كەيىن وتەتىن تاۋەلسىزدىك مەرەكەسىنە ۇلكەن تارتۋ بولماق. ويتكەنى, تاۋەلسىزدىك بولماعاندا مۇستافا شوقايدىڭ ەسىمىنىڭ اتالۋ-اتالماۋى ەكىتالاي ەدى. بىزگە وسىنداي جاعداي جاساۋعا مۇمكىندىك بەرىپ وتىرعان ەڭ الدىمەن ەل تاۋەلسىزدىگى. بۇگىن بىزدە قوس بىردەي قۋانىش بولىپ وتىر. ءبىرىنشىسى, مۇستافا شوقايدىڭ تولىق شىعارمالار جيناعىنىڭ 6 تومدىعىنىڭ تۇساۋكەسەرى بولسا, ەكىنشىسى, ونى شىعارىپ بىزگە جەتكىزىپ وتىرعان تاريح عىلىمدارىنىڭ دوكتورى, پروفەسسور كوشىم ەسماعامبەتوۆتىڭ تۋعانىنا 75 جىل تولىپ وتىر, – دەدى رامازان سۇلەيمەنوۆ اتىنداعى شىعىستانۋ ينستيتۋتىنىڭ ديرەكتورى ءابساتتار دەربىسالى.
كوشىم ەسماعامبەتوۆتىڭ ايتۋىنشا, جيناقتىڭ كەلەسى 6 تومى 2014 جىلى كورنەكتى مەملەكەت قايراتكەرى, تاريحشى-عالىم, پۋبليتسيست م.شوقايدىڭ 125 جىلدىق مەرەيتويى قارساڭىندا جارىق كورمەك. شىعىستانۋ ينستيتۋتى مۇستافا شوقايدىڭ 12 تومدىق ەڭبەكتەرىن شىعارىپ وتىر. مۇستافانىڭ كوپ ەڭبەكتەرىنىڭ تۇپنۇسقالارىنىڭ كوشىرمەلەرى رەسەيدىڭ, فرانتسيانىڭ سىرتقى ىستەر مينيسترلىگى, اقش-تاعى گۋۆەر ينستيتۋتىنىڭ مۇراعاتتارىنان, تۇركيا, انگليا, پولشا, گرۋزيا, وزبەكستان مەن باسقا مەملەكەتتەردىڭ كىتاپحانالارىنان ساتىپ الىندى. 2011 جىلى فرانتسيادان مۇستافا شوقايدىڭ جەكە مۇراعاتىنىڭ ەلەكتروندىق كوشىرمەسىن ساتىپ الۋ وسى جوبانى ىسكە اسىرۋدا زور دەمەۋ بولدى. باسىلىم عىلىمي تۇسىنىكتەرمەن, مۇستافا شوقايدىڭ جەكە جۇمىستارىنىڭ فاكسيميلەسى, ونىڭ جەكە مۇراعاتىنىڭ قۇجاتتارىمەن جانە يلليۋستراتسيالارمەن قامتىلعان.
قاي جاعىنان الساڭ دا تاعىلىمى مول شاراعا مۇستافا شوقايدىڭ تۋعان جەرى قىزىلوردا ەلىنەن دە ارنايى دەلەگاتسيا كەلىپتى. قىزىلوردا وبلىستىق تىلدەردى دامىتۋ باسقارماسىنىڭ باسشىسى ەرجان ءۋايىس مۇستافانىڭ كىشى وتانىنىڭ سالەمىن جەتكىزىپ, قازاق ازاتتىعىن كوكسەپ, كوكەيكەستى ارمانىنا عۇمىرىن ارناعان تۇلعاعا قاتىستى تۋعان وڭىرىندە جاسالىنىپ جاتقان تىرلىكتەردى تىلگە تيەك ەتتى.
قر ۇعا اكادەميگى ابدىمالىك نىسانباەۆ پەن قر ۇعا كوررەسپوندەنت-مۇشەسى مامبەت قويگەلديەۆ مۇستافا شوقايعا قاتىستى ماڭىزدى دەرەكتەرمەن ءبولىسىپ, بۇل تومدار مۇستافا شوقايدىڭ وتانىنا ورالۋى دەستى.
ال تۇركيادان ارنايى كەلگەن PhD دوكتورى ۆەجيحي سەفا حۋات حەكيموگلى شوقايتانۋدىڭ نەگىزى تۇركيادا قالانعانىن العا تارتىپ, قازىر دە ءوز ەلىندە قازاق پەرزەنتىنە قاتىستى زەرتتەۋلەر جۇرگىزىلىپ جاتقانىن ناقتى مىسالدارمەن دايەكتەدى.
وسىدان كەيىن شارا كەلەسى – «پول گۋردە – ۆەرنىي قالاسىنىڭ فرانتسۋزى» اتتى كىتاپتىڭ تۇساۋكەسەرىنە ۇلاستى. جينالعاندار پروفەسسور ۆينسەنت ءفۋرنونىڭ بايانداماسىن قىزىعا تىڭدادى.
تاعدىر جازۋىمەن بايىرعى الماتىنىڭ تۇرعىنى بولعان كورنەكتى ساۋلەتشى, اعارتۋشى پول گۋردەگە قاتىستى قر ءبىلىم جانە عىلىم مينيسترلىگىنىڭ «عىلىمي قازىنا» اتتى ماقساتتى باعدارلاماسى شەڭبەرىندە جانە قازاقستانداعى فرانتسۋز رەسپۋبليكاسىنىڭ ەلشىلىگى مەن «Allianse Francaise» قولداۋىمەن ءۇش تىلدە شىققان كىتاپتا قىزىقتى دەرەكتەر مول. قازاقستان مەن فرانتسيانىڭ مۇراعاتتىق قورلارىندا ساقتالعان قۇجاتتار مەن ماتەريالداردىڭ باسىم بولىگى بۇرىن-سوڭدى جاريالانباعان جانە عىلىمي اينالىمعا ەنبەگەن. كىتاپتىڭ يلليۋستراتسيالىق ماتەريالدارى دا ايرىقشا قۇندى. ءحىح-حح عاسىردىڭ باسىندا الماتى قالاسىنىڭ تاريحى مەن مادەنيەتىنىڭ ايعاعى بولاتىن فوتوسۋرەتتەرگە باعا جەتپەيدى.
ايناش ەسالي,
«ەگەمەن قازاقستان».
الماتى.
سۋرەتتى تۇسىرگەن
ازامات قۇسايىنوۆ.