جەلتوقساننىڭ 13-ءى كۇنى بۇكىلالەمدىك بوكس سەرياسىنىڭ (WSB) ءتورتىنشى تۋرىندا Astana Arlans كۋبانىڭ Cuba Domadores كومانداسىن قابىلداپ, 2:3 ەسەبىمەن ۇتىلىپ قالدى.
جەلتوقساننىڭ 13-ءى كۇنى بۇكىلالەمدىك بوكس سەرياسىنىڭ (WSB) ءتورتىنشى تۋرىندا Astana Arlans كۋبانىڭ Cuba Domadores كومانداسىن قابىلداپ, 2:3 ەسەبىمەن ۇتىلىپ قالدى.
ءبىرىنشى ۇرىستا ميراس جاقىپوۆ حەراردو سەرۆانتەستى ۇتىپ, كۋبالىقتاردىڭ ءبىرىنشى جەڭىلىسىن تىركەدى. ماسەلەنىڭ ءمانىسى مىنادا, بوستاندىق ارالىنىڭ كومانداسى بۇعان دەيىن وتكىزگەن ءۇش ماتچىن دا 5:0 ەسەبىمەن اياقتاپ, بىردە-ءبىر جەكپە-جەكتە قارسىلاستارىنا ەسە بەرە قويماعان ەدى. سول سەڭدى ءبىزدىڭ بوكسشى بۇزدى.
بىراق بۇدان كەيىنگى ءۇش شايقاستا كۋبالىقتاردىڭ ايدىنى وزدى. اتاپ ايتقاندا, جاندوس مومىنوۆ لازارو الۆارەسكە, باقىتجان قوجابەكوۆ اريسپويديس دەسپاينعا, ال حورۆاتيالىق لەگيونەر حرۆوە سەپ ءوز كەزەگىندە سەزار دە لا كرۋسقا تىزە بۇكتى. مەيماندار ساپىنداعى جوعارىداعى ءۇش بوكسشى دا بيىل الماتىدا وتكەن الەم چەمپيوناتىنا قاتىسقان بولاتىن. ۇشەۋى دە فينالعا دەيىن جەتتى. سولاردىڭ ەكەۋى – لازارو الۆارەس پەن حۋليو سەزار دە لا كرۋس چەمپيون اتاندى. ەكەۋى دە بۇل اتاققا 2011 جىلعى باكۋدەن كەيىن قاتارىنان ەكىنشى رەت قول جەتكىزدى. ال اريسپويديس دەسپاين الماتى فينالىندا ءبىزدىڭ دانيار ەلەۋسىنوۆتەن ۇتىلىپ قالدى. وسى جولى كۋبالىق ءبىزدىڭ باقىتجاندى نوكاۋتپەن ۇتتى. سونىمەن, ماتچتا قوناقتاردىڭ كوماندالىق ەسەپتە جەڭىسكە جەتكەندەرى بەلگىلى بولدى.
سوڭعى ايقاستا كەلەسى حورۆات جىگىتى فيليپ حرگوۆيچ قارسىلاسى حوسە انحەل لاردۋەتتى ءۇشىنشى راۋندتا جەڭدى. ول العاشقى ەكى راۋندتا ايقىن باسىم كورىندى. ءۇشىنشى راۋندتا ەكى رەت نوكداۋنعا ءجىبەردى. وسىدان كەيىن كۋبالىق باپكەرلەر ءوز ءجىگىتتەرىن شارشى الاڭنان شىعارىپ الدى.
وسىلايشا, ەسەپ 3:2 بولىپ, Cuba Domadores بوكسشىلارىنىڭ پايداسىنا شەشىلدى.
دامير قوجامقۇل.