جاپونيادا قارلى بوراننىڭ سالدارىنان جولدا 130 كولىك سوقتىعىسقان. ءبىر ادام قازا تاۋىپ, 10 ادام جارالانعان. وعان قوسا بىرنەشە شاقىرىمعا سوزىلعان كەپتەلىس پايدا بولعان.
قارلى بوران جاپونيانىڭ سولتۇستىگىنەن وڭتۇستىگىنە, مياگي پرەفەكتۋراسىنىڭ سولتۇستىك-شىعىس ايماعىنان وتەتىن توحوكۋ جوعارى جىلدامدىقتى تاس جولىنىڭ ۇزىن بولىگىن جاۋىپ تاستاعان.
سونىڭ سالدارىنان 200-گە جۋىق ادام كولىكتەرىن تاستاپ كەتە الماي, ەكى كۇن قاتارىنان جول بويىندا تۇنەگەن. وقيعا ورنىندا قۇتقارۋشىلار جۇمىس ىستەپ جاتىر. كولىكتەردە قامالعاندارعا تاماق, اۋىز سۋ جانە كورپە جەتكىزىلدى. 200 جولاۋشىنىڭ 12-ءسى اۋرۋحاناعا جەتكىزىلدى.
جاپون تەڭىزى جاعالاۋى ماڭىنداعى كەي جەرلەردە اق ۇلپانىڭ بيىكتىگى 1 مەتردەن اسادى. كەي اۋدانداردا جارىق ءسونىپ قالعان. سونداي-اق قار كوشكىنى قاۋپى كۇشەيگەن. ال اۋا رايىن بولجاۋشىلار قازىرگى كۇن رايى ەرتەڭگە دەيىن ساقتالاتىنىن ەسكەرتىپ وتىر.
سينوپتيكتەردىڭ بولجاۋىنشا, توحوكۋدىڭ سولتۇستىك-شىعىس ايماعىندا كەلەسى كۇنى 40 سم-گە دەيىن قار جاۋادى. بيلىك بىرنەشە پويىزدىڭ قوزعالىسىن توقتاتتى.
جاپونيانىڭ پرەمەر-ءمينيسترى يوسيحيدە سۋگا تۇرعىنداردى ساق بولۋعا شاقىردى.
دايىنداعان
رابيعا نۇرعالي