تاۋەلسىزدىك كۇنى قارساڭىندا «قازمۇنايگاز» بارلاۋ ءوندىرۋ» كومپانياسى ماڭعىستاۋلىق مۇنايشىلارعا كەرەمەت تارتۋ جاسادى. «قاراجانباس» كەن ورنىندا ەلىمىزدە تەڭدەسى جوق تەحنيكالىق وندىرىستىك بازا اشىلدى. بۇل تۋرالى «حابار» تەلەارناسى حابارلادى.
وسى اتالعان بازا ايماقتاعى بارلىق مۇناي-گاز ءوندىرۋشى كومپانيالارعا جوعارى دەڭگەيدەگى تەحنيكالىق قىزمەت كورسەتۋگە دايىن. مۇندا مەملەكەت باسشىسىنىڭ تاپسىرماسىمەن بىلتىر قۇرىلعان «تەحنولوگيالىق كولىك جانە ۇڭعىمالارعا قىزمەت كورسەتۋ باسقارماسى» سەرىكتەستىگىنىڭ جۇمىسكەرلەرى ەڭبەك ەتەتىن بولادى.
جاڭا اشىلعان وندىرىستىك بازادا ءبىر مەزگىلدە 250 اۆتوكولىك پەن ارناۋلى تەحنيكاعا ساپالى قىزمەت كورسەتىلەدى. ناقتى ايتقاندا, سوڭعى ۇلگىدەگى قۇرال-جابدىقتاردىڭ كومەگىمەن تەحنيكالارعا دياگنوستيكا جاسالىپ, كۇردەلى دەگەن اقاۋلار قالپىنا كەلتىرىلەدى. سونىمەن بىرگە, اۆتوماتتاندىرىلعان قۇرىلعى لاستانعان كولىكتەردى ءاپ-ساتتە جۋىپ-شايىپ, تولىق تازارتىپ شىعادى ەكەن.
جوندەلۋگە اكەلىنگەن كولىكتەر ءۇشىن اۋماعى 3 مىڭ شارشى مەتردى قۇرايتىن جىلى گاراجدار سالىنعان. تەحنولوگيالىق كولىك تسەحىنىڭ باستىعى بەردىحان ارەشوۆتىڭ ايتۋىنشا, مۇندا جۇمىس ىستەيتىن ماماندار وزگە قالالارداعى وسىنداي بازاعا بارىپ تاجىريبە جيناقتاعان. سوندىقتان باسشىلار جۇمىستا قيىندىق تۋىندامايتىنىنا سەنىمدى بولىپ وتىر.
«بىلتىر جانە بيىل مۇندا كوپ جۇمىستار اتقارىلدى. كوپتەگەن تەحنيكالار الىندى. مىڭداعان مۇنايشى جۇمىسقا ورنالاستى. قالامقاس جانە قاراجانباس كەن ورىندارىندا ۆاحتالىق پوسەلكەلەر سالىندى. مۇنايشىلار تولىقتاي جۇمىسپەن قامتاماسىز ەتىلدى. «قازمۇنايگاز» بارلاۋ ءوندىرۋ» كومپانياسى ءدال وسىنداي بازانى بولاشاقتا جاڭاوزەندە سالۋدى جوسپارلاپ وتىر» ,-دەيدى ماڭعىستاۋ وبلىسىنىڭ اكىمى اليك ايدارباەۆ.
باقىتبەك كەنەش ۇلى.
دەرەككوز: «حابار» تەلەارناسى