قاراعاندى وبلىسىنىڭ تابيعاتتى قورعاۋ پوليتسياسى قىزمەتكەرلەرى كيىك اۋلاعانداردى ۇستادى, – دەپ حابارلايدى Polisia.kz.
قىزىل كىتاپقا ەنگەن جانۋارلاردى زاڭسىز اۋلاعانى ءۇشىن قىلمىستىق جاۋاپكەرشىلىك تۋرالى پوليتسيا قىزمەتكەرلەرىنىڭ ەسكەرتۋلەرىنە قاراماستان, ازاماتتار جانۋارلاردىڭ سيرەك كەزدەسەتىن نەمەسە جوعالۋ قاۋپى جوعارى تۇرلەرىن اۋلاۋدى جالعاستىرۋدا. 14 قاڭتاردا ساعات 01.00-دە رەيدتىك شارالار بارىسىندا قاراعاندى وبلىسىنىڭ پد تابيعات قورعاۋ پوليتسياسىنىڭ جانە نۇرا اۋدانىنىڭ پب قىزمەتكەرلەرى, “وحوتزووپروم” مەكەمەسىنىڭ ينسپەكتورلارىمەن بىرگە نۇرا اۋدانىنىڭ اۋماعىندا “ۆاز-2121” ماركالى اۆتوكولىگىن توقتاتتى.
نۇر-سۇلتان قالاسىنىڭ 34 جاستاعى تۇرعىنى باسقارىپ كەلە جاتقان اۆتوكولىكتى تەكسەرۋ كەزىندە ءاۆتوموبيلدىڭ توبەسىنە ورناتىلعان جۇك سالعىشتا اقبوكەن تەرىسىن الىپ كەلە جاتقانى انىقتالدى. بۇدان باسقا جۇك سالعىشتان ءمۇيىزى كەسىلگەن ءۇش دانا كيىكتىڭ باسى, قان مەن ءجۇن ىزدەرى بار اس ءۇي پىشاعى بار قاپ تابىلدى. سول كۇنى ونىڭ نۇرا اۋدانىنىڭ 28 جاستاعى تۇرعىنى بولىپ تابىلاتىن ىنىسىمەن بىرگە ءبىر باس اقبوكەندى قوراعا ايداپ كىرگىزىپ, كەيىن سويىپ, سودان كەيىن سويىلعان كيىك ەتىن قاپقا سالىپ, كولىككە جاسىرعانى انىقتالدى.
ءتارتىپ ساقشىلارى اعايىندىلار قاساپحانا رەتىندە پايدالانعان قاراۋسىز قالعان عيماراتتى تەكسەرگەن كەزدە ەكى قاپقا سالىنعان كيىك ەتىنە ۇقساس جىلىكتەلگەن ەت پەن ءۇش جۇپ ءمۇيىزدى تاپتى. براكونەر ءتىرى جانە سويىلعان اقبوكەنمەن تۇسكەن فوتوسۋرەتتى سمارتفونىندا ساقتاپ, ونى جاقىندارىنا ەستەلىك رەتىندە قالدىرۋ تۋرالى شەشىم قابىلداعان. اتالعان فاكت بويىنشا ءتيىستى ساراپتامالار تاعايىندالىپ, قازىرگى ۋاقىتتا تەرگەۋ جۇمىستارى جالعاسۋدا.