كەشە سىرتقى ىستەر مينيسترلىگىندە 2 تومدىق قازاقشا-اعىلشىنشا-ورىسشا جانە ورىسشا-قازاقشا-اعىلشىنشا ديپلوماتيالىق سوزدىكتەردىڭ تۇساۋى كەسىلدى.
كەشە سىرتقى ىستەر مينيسترلىگىندە 2 تومدىق قازاقشا-اعىلشىنشا-ورىسشا جانە ورىسشا-قازاقشا-اعىلشىنشا ديپلوماتيالىق سوزدىكتەردىڭ تۇساۋى كەسىلدى.
تۇساۋكەسەر ءراسىمىن اشىپ ءجۇرگىزگەن سىرتقى ىستەر ۆيتسە-ءمينيسترى قايرات سارىباي تاۋەلسىزدىك مەرەكەسى قارساڭىندا سىرتقى ساياسات سالاسىندا تۇڭعىش رەت ءۇش ءتىلدى ديپلوماتيالىق سوزدىكتىڭ جارىق كورىپ وتىرعانىن, ال ونىڭ 2004 پەن 2006 جىلدارى جارىققا شىققان قازاقشا-ورىسشا انىقتامالىق سوزدىكتەردىڭ نەگىزىندە جاسالعانىن ايتىپ ءوتتى.
كىتاپقا ديپلوماتيا, قازىرگى زامانعى سىرتقى ساياسات جانە حالىقارالىق قارىم-قاتىناستارعا قاتىستى تەرميندەر مەن ءسوز تىركەستەرى ەنسە, جالپى, بۇگىنگى كۇنى ديپلوماتيانىڭ ەل وركەندەۋىندە قامتىمايتىن سالاسى جوق ەكەنى انىق. ال ونىڭ ديپلوماتتار, وقىتۋشىلار مەن ستۋدەنتتەر ءۇشىن تاپتىرماس كومەكشى قۇرالى بولاتىنىنا دا سەنىم زور. ەڭ باستىسى, مۇندا ەلدەر مەن ولاردىڭ استانالارىنىڭ جازىلۋ نورمالارى بىرىزدەندىرىلگەن. ماسەلەن, پەكين اتاۋى بۇدان بىلاي بەيجىڭ دەپ اتالاتىن بولادى.
سىرتقى ىستەر مينيسترلىگىنىڭ جاۋاپتى حاتشىسى اسقار مۋسينوۆ جوعارىداعىداي سوزدىكتەردى ەندى قازاق, اراب, ورىس تىلدەرىندە شىعارۋ قولعا الىناتىنىن جاريا ەتتى. تۇساۋكەسەر راسىمىندە ءسوز العاندار سوزدىكتىڭ تەك ديپلوماتتار, وقىتۋشىلار مەن ستۋدەنتتەر ءۇشىن عانا ەمەس, جۋرناليستەر ءۇشىن دە تاپتىرماس كومەكشى بولاتىنىن اتاپ كورسەتتى. سونىمەن, ديپلوماتتار مەن سىرتقى ساياساتقا قاتىسى بار جانداردىڭ سومكەسىنەن تۇسپەس جاڭا سوزدىك تاۋەلسىزدىك مەرەكەسى قارساڭىندا ومىرگە جولداما الدى.
انار تولەۋحانقىزى,
«ەگەمەن قازاقستان».