كوروناۆيرۋس پاندەمياسى سالدارىنان قايتىس بولعاندار سانى ەكىنشى دۇنيەجۇزىلىك سوعىس جىلدارىنان بەرى ەسەپتەگەندە ادام ءولىمىنىڭ ەڭ جوعارعى دەڭگەيىنە جەتكەنى جاڭالىق ەمەس. سوندىقتان جاھاندىق ىندەتپەن كۇرەستە كەز كەلگەن ماسەلە مەن زەرتتەۋلەر وزەكتى. ءوز كەزەگىندە دۇنيەجۇزىلىك دەنساۋلىق ساقتاۋ ۇيىمى ساراپشىلارى جاڭا تۋعان نارەستەلەردىڭ انالارى بەلگىلى ءبىر قاۋىپسىزدىك نورمالارىن ساقتاسا, كوروناۆيرۋس ينفەكتسياسىن جۇقتىرعان كەزدە بالانى ەمىزۋدى توقتاتپاۋىنا بولاتىنىن ايتىپ وتىر.
ددۇ ساراپشىلارىنىڭ پىكىرىنشە, قازىرگى ۋاقىتتا الەمدەگى 6 ايعا دەيىنگى بالالاردىڭ شامامەن 35%-ى ەمشەك سۇتىمەن قورەكتەنەدى. ەگەر اناسى COVID-19 اۋرۋىمەن اۋىرسا, ءبىرىنشى كەزەكتە دارىگەرگە قارالۋى كەرەك. بىراق بالانى ەمىزگەندە انالارى تىنىس الۋ گيگيەناسىنىڭ ەرەجەلەرىن ساقتاۋ تالاپ ەتىلەدى.
مامانداردىڭ ايتۋىنشا, اۋىز بەن مۇرىندى جاباتىن بەتپەردە تاعۋى قاجەت. مىندەتتى تۇردە بالاسىن قولعا الماستان بۇرىن جانە ودان كەيىن 20 سەكۋند ىشىندە قولدى سابىنداپ جۋعانى ءجون. ەگەر COVID-19 جۇقتىرعان انا ءوزىن تىم ناشار سەزىنسە, بالانى ەمشەك سۇتىمەن باسقا جولدارمەن, ونىڭ ىشىندە ءسۇتتى ساۋىپ بەرۋ ارقىلى تاماقتاندىرسا بولادى. ويتكەنى بالانىڭ اناسىنىڭ باۋىرىندا بولىپ, تەك ومىراۋ سۇتىمەن ەمىزۋ نارەستەنىڭ بارىنشا دۇرىس ءوسىپ-جەتىلۋىنە جاردەمدەسەدى.
نارەستەلەرگە ماسكا تاعۋعا بولمايدى. شەشەسى بارلىق قاۋىپسىزدىك تالاپتارىن ساقتاي وتىرىپ, بالانى تاماقتاندىرۋعا كەڭەس بەرىلەدى. سەبەبى انانىڭ دەنەسىندە پايدا بولاتىن انتيدەنەلەر بالاعا بەرىلەدى دە, ونىڭ دەنساۋلىعىنا پايدا كەلتىرەدى.
انا ءسۇتىنىڭ قۇرامى ەرەكشە, ويتكەنى ۋىزدا بالانى سىرتقى زياندى ورتادان قورعايتىن كوپتەگەن يممۋندىق فاكتورلار بار.
ددۇ ۇسىنىستارىنا سايكەس بالانى ەمىزۋدى 2 جاستان اسقانشا, ءتىپتى ودان دا كوپ ۋاقىتقا جالعاستىرۋ كەرەك. ويتكەنى ەمىزۋ 2 جاسقا دەيىنگى نارەستەلەر اراسىنداعى ءولىمدى 49% تومەندەتەدى. ەمىزۋدىڭ ءار قوسىمشا ايى بالانىڭ سەمىزدىگىن 4% تومەندەتەدى. العاشقى التى ايىندا تەك ەمشەك سۇتىمەن قورەكتەنەتىن بالالار ديارەيا, قۇسۋ, گاستروەنتەريت, سۋىق تيۋ, تۇماۋ, وتيت جانە تىنىس جولدارىنىڭ ينفەكتسيالارىنا سەزىمتالدىعى از بولادى جانە اعزالارى اۋرۋلارمەن جاقسى كۇرەسەدى.
دەنساۋلىق ساقتاۋ مينيسترلىگى ازاماتتارعا كوروناۆيرۋستىڭ العاشقى بەلگىلەرى كەزىندە ءوزىن ءوزى وقشاۋلاۋدى, ۇيدە بولۋدى جانە تۇرعىلىقتى جەرى بويىنشا ەمحانادان كومەك سۇراۋدى ۇسىنادى.
الماتى