«اۋىزبىرلىك بولسا, المايتىن اسۋ, جەتپەيتىن ماقسات بولمايدى ەكەن, سوعان كوزىم جەتتى», دەيدى باتىس قازاقستان وبلىسى قازتالوۆ اۋدانىنا قاراستى بوستاندىق اۋىلىندا تۇراتىن قاراپايىم مۇعالىم اسىلانبەك سارمالاەۆ. ول وسىدان ون جىل بۇرىن شالعاي اۋىلدا بوكس ۇيىرمەسىن اشىپ, شاكىرت تاربيەلەي باستاعان.
اۋىل مەكتەبىندە العاشقى اسكەري دايىندىق پانىنەن ساباق بەرەتىن اسىلانبەك مۋسا ۇلى قارادومالاقتاردى بىلعارى قولعاپ ونەرىنە باۋلىپ جۇرگەنىنە دە ون جىل بولىپ قالىپتى. اۋىل مەكتەبىنىڭ جەرتولەسىندە – توبەسى تاپال, تەرەزەسى جوق, ەدەنى توپىراق قۋىستا ءجۇرىپ, جارقىراعان جاتتىعۋ زالىن, جاراعى سايلى رينگتى اڭسايتىن. بىراق ول ويىنىڭ جۇزەگە اسۋى وڭاي ەمەس-ءتىن. وسىنداي وتىنىشپەن تالاي ەسىكتى قاعىپ, تالاي دوكەيدىڭ الدىنان ءوتتىم دەيدى جاتتىقتىرۋشى.
اۋىلداعى بوكس زالىن اسارلاتىپ سالىپ الۋ يدەياسىنا جان بىتىرگەن – وسىدان ءبىر جىلدان اسا ۋاقىت بۇرىن اۋدان تىزگىنىن ۇستاعان البەرت ەساليەۆ ەكەن. ول اسىلانبەك سارمالاەۆتىڭ ۇسىنىسىن قىزۋ قولداپ, جەرگىلىكتى بيلىك ورىندارى تاراپىنان دا بارىنشا كومەك كورسەتۋگە ۋادە بەرگەن. بۇعان اۋىل سپورتىن دامىتىپ جۇرگەن ازاماتتىڭ شىنايى ىقىلاسى, شاكىرتتەرىنىڭ جەتىستىكتەرى دە اسەر ەتسە كەرەك.
وسىلايشا, 2020 جىلدىڭ اقپان ايىندا ناقتى ءىس باستالىپ تا كەتتى. ەڭبەك ارداگەرى, ەرتەرەكتە اۋىلعا باسشىلىق ەتكەن تاسقالي ءىلياسوۆ اقساقال قاراماعىنداعى بوس تۇرعان عيماراتتى سىيعا تارتتى.
بىراق بۇل «عيماراتتىڭ» قالقيعان 4 قابىرعاسىنان باسقا جارامدى جەرى از ەدى. اسىلانبەك اۋىلدىڭ اتپال ازاماتتارىنىڭ, كاسىپكەرلەردىڭ الدىنان ءوتتى. وسى بوستاندىقتا تۋعان, بۇگىندە ءار جەردە جۇرگەن جەرلەستەر دە قاراپ قالمادى. ءسويتىپ, بوستاندىقتا بوكس زالىن اشۋ – ءبىر قاۋىم جۇرتتىڭ باستى ماقساتىنا اينالدى. شالعايداعى اۋىلدا قولعا الىنعان ءىس-شارا استاناداعى «باتىر بولامىن» اتتى قايىرىمدىلىق قوردىڭ دا نازارىنا ءىلىنىپتى. وسىلايشا, اۋىل مۇعالىمىنىڭ جۇرەگىنەن شىققان ۇشقىن بىرتە-بىرتە تالاي جاننىڭ جۇرەگىن جىلىتقان, ىقىلاسىن ىسىتقان جالىنعا اينالدى.
– ون ءبىر اي بويى كۇنى-ءتۇنى وسى ءىستىڭ باسى-قاسىندا ءجۇردىم. بۇل باستاماعا ۇلەس قوسقان, قولداۋ بىلدىرگەن جاندار وتە كوپ. سونىڭ ىشىندە اۋىلىمىزدىڭ ازاماتى ابزال نۇعمانوۆ دەگەن اعامىز جالعىز ءوزى 6 ملن تەڭگەدەي قارجىسىن بەردى. نۇرلان نۇعمانوۆ, ايدىنبەك ءابيتوۆ, ادىلبەك عازيزوۆ, قايرات بەكمۇحامبەتوۆ سەكىلدى جەرلەستەرىم ۇلكەن ۇلەس قوستى. ودان بولەك 100-200 مىڭ تەڭگەدەن ورتاعا سالعان اتىمتاي ازاماتتار بار. تەحنيكامەن كومەكتەسكەن, ءتىپتى قول كومەگىن كورسەتكەن جاندار دا جەتەرلىك. جەرگىلىكتى بيۋدجەتتەن دە قاراجات ءبولىندى. بوستاندىقتاعى بوكس زالى – بىرلىكتىڭ, باۋىرمالدىقتىڭ بەلگىسىندەي بولعان باستاما, – دەيدى اسىلانبەك سارمالاەۆ.
ءوزى تۋرالى ساراڭ سويلەگەنىمەن, ەڭ باستى ەڭبەك اسىلانبەك مۋسا ۇلىنا تيەسىلى ەكەنىن اۋىلداستارى جاقسى بىلەدى. سودان دا بولار, 2021 جىلدىڭ باسىندا بوكس زالىنىڭ سالتاناتپەن اشىلۋ كەزىندە كاسىپكەر ابزال نۇعمانوۆ اۋىلداستار اتىنان العىس ايتىپ, باپكەرگە سايگ ۇلىك مىنگىزدى.
ارينە, ۇستازدىڭ جەتىستىگى شاكىرتى شىققان شىڭمەن ولشەنەدى عوي. بوستاندىقتىڭ بۇعان دەيىن جەرتولەدە جاتتىققان جاس بوكشىلارى اراسىنان تالاي دارابوز شىعىپتى. قازىردىڭ وزىندە اسىلانبەك باپتاعان بالالاردىڭ 6-ۋى – سپورت شەبەرلىگىنەن ۇمىتكەر اتانعان. ال تۇراربەك قاليەۆ – جاسوپىرىمدەر اراسىندا قازاقستان چەمپيونى بولسا, سانجار ماركسوۆ وسى اتاقتى ەكى دۇركىن جەڭىپ العان! حالىقارالىق جارىستاردا دا جەڭىمپاز اتانعان جاستار ءوسىپ كەلەدى.
– ەندىگى ارمانىم – الاقانداي اۋىلدان ازيانىڭ, الەمنىڭ, ءتىپتى وليمپيادانىڭ چەمپيوندارى شىقسا دەيمىن, – دەيدى اسىلانبەك.
وسى ءىستىڭ ۇيىمداستىرۋ جۇمىستارىنا ءوز ەركىمەن جەگىلگەن ۆولونتەر, «باتىر بولامىن» قايىرىمدىلىق قورىنىڭ ۇيلەستىرۋشىسى, ورالداعى ء«وز ءومىرىمنىڭ يەسىمىن» اتتى ترەنينگ توبىنىڭ مۇشەسى ادەمى مارلەنقىزىنىڭ ايتۋىنشا, بوستاندىقتاعى بوكس زالىنىڭ قۇرىلىسى مەن جاساقتالۋىنا بارلىعى 21 ملن تەڭگەدەي قاراجات كەتكەن. ونىڭ ەداۋىر بولىگى قايىرىمدىلىق قورىنىڭ ەسەپشوتىنا تۇسكەن قارجى ەكەن. قور پرەزيدەنتى ارمان ۋاحاپ بۇل قارجىعا ساپالى سپورتتىق سناريادتاردى ارزانداۋ باعامەن الۋعا كومەكتەسكەن.
بوكس زالىنىڭ اشىلۋ سالتاناتىنا قازتالوۆ اۋدانىنىڭ اكىمى البەرت ەساليەۆ, باتىس قازاقستان وبلىسىنىڭ دەنە شىنىقتىرۋ جانە سپورت باسقارماسىنىڭ باسشىسى قايمەن ەسەندياروۆ سەكىلدى لاۋازىمدى تۇلعالار دا قاتىسىپ, اۋىل ازاماتتارىنىڭ قۋانىشىن ءبولىستى. جاڭا زالدىڭ قاجەتتى قۇرالدارى سىي-سياپاتپەن تۇگەندەلىپ, كاسىبي رينگ, ىڭعايلى سپورتتىق كيىمدەر, بوكس قاپتارى, رەزينا توسەنىشتەرى تارتۋ ەتىلدى.
قازتالوۆ اۋدانى – بوكستان وليمپيادا چەمپيونى اتانعان دانيار ەلەۋسىنوۆتىڭ تۋعان جەرى. سوندىقتان بوستاندىقتىق جاس بوكسشىلار بوي تۇزەپ, ۇلگى الاتىن تۇلعا جوق ەمەس.
بۇگىندە بوستاندىق اۋىلىنداعى جاڭا سپورت زالىندا بوكس جانە دزيۋدو ۇيىرمەلەرى جۇمىسقا كىرىسىپ تە كەتتى. اسىلانبەك سارمالاەۆتىڭ ءوزى جاتتىقتىراتىن توپتا 30 بالا بار. اۋىلدا سمارتفونعا ءجىپسىز بايلانىپ, بوس-بولبىر وتىرۋ ءسان ەمەس. وسىنىڭ ءبارى جالعىز ادامنىڭ جىگەرىنە, جانقيارلىعىنا بايلانىستى.
ال بالالار باپكەرى اسىلانبەك مۋسا ۇلى بولسا, ء«بارىن ەل ىستەدى» دەپ وتىر. «ەلىمىزدە اۋىزبىرشىلىك بولسا, المايتىن اسۋ, جەتپەيتىن ماقسات بولمايدى ەكەن, سوعان كوزىم جەتتى» دەپ قويادى جاي عانا.
باتىس قازاقستان وبلىسى