قاراعاندىدا «التىن اربا» بازارىنداعى كونتەينەرلەردىڭ بىرىنەن 35 جاستاعى ەر ادامنىڭ دەنەسى تابىلدى, دەپ حابارلايدى Egemen.kz
6 قاڭتاردا قاراعاندىلىق پوليتسەيلەر كونتەينەرلەردىڭ بىرىنەن ەر ادامنىڭ دەنەسىن تاپقان. كۋاگەرلەردىڭ سوزىنشە, جابىرلەنۋشى بىرنەشە رەت بالتا ءتيىپ, قان جوعالتقاننان كەيىن قايتىس بولعان. وقيعا ورنىندا 37 جاستاعى كۇدىكتى ۇستالدى. ول جاساعان ارەكەتىن مويىنداعان. كۇدىكتىگە قاتىستى قىلمىستىق ءىس قوزعالدى.
«6 قاڭتاردا قاراعاندىنىڭ «التىن اربا» ساۋدا ءۇيىنىڭ كونتەينەرلەرىنىڭ بىرىنەن زورلىق-زومبىلىق بەلگىلەرى بار 35 جاستاعى ەر ادامنىڭ ءمايىتى تابىلدى. قابىلدانعان شارالاردىڭ ناتيجەسىنە قاراعاندى پوليتسيا باسقارماسىنىڭ پاترۋلدىك پوليتسيا پولكىنىڭ قىزمەتكەرلەرى وقيعا ورنىندا 37 جاستاعى ەر ادامدى ۇستادى. ول جانجال كەزىندە جابىرلەنۋشىگە دەنە جاراقاتىن سالعانىن مويىندادى. قىلمىستىق كودەكستىڭ 99-بابى («ادام ءولتىرۋ») بويىنشا قىلمىستىق ءىس قوزعالدى. تەرگەۋ امالدارى جۇرگىزىلىپ جاتىر. پوليتسەيلەر قىلمىستىڭ ءمان-جايىن انىقتاپ جاتىر», دەدى قاراعاندى وبلىسى پد ءباسپاسوز قىزمەتىنىڭ باسشىسى باقىتجان قۇدياروۆ.