قۇرلىقتىق حوككەي ليگاسىنىڭ (قحل) كەزەكتى تۋر ويىنىن حاباروۆسكىدە «امۋر» كلۋبىمەن وتكىزگەن «بارىس» بۋلليت سەرياسى بويىنشا جەڭىسكە جەتىپ, جانكۇيەرلەرىن قۋانتتى.
«بارىس» كلۋبى ءۇشىن جاڭا جىلداعى العاشقى باسەكە تابىستى ءارى ناتيجەلى اياقتالدى. سەگىز گول سوعىلعان ويىندا قازاقستاندىق كوماندانىڭ ايى وڭىنان تۋدى. كەزدەسۋدىڭ ەسەبىن العاش قوناقتار اشتى. 13-مينۋتتا مەتتيۋ فرەتتين «بارىستى» ەسەپتە العا شىعارسا, ءبىرىنشى كەزەڭ سوڭىنا دەيىن ايدىن يەلەرى ەكى شايبا سوعىپ, تارازى باسىن وزدەرىنە اۋداردى. 14-مينۋتتا الەكساندر پولۋنين, 17-مينۋتتا دميتري لۋگين گول سوقتى. ەكىنشى كەزەڭنىڭ ورتا تۇسىندا «امۋر» ويىنشىسى ميحال يوردان مەرگەندىگىمەن كوزگە ءتۇسىپ, تابلوداعى كورسەتكىشتى 3:1-گە جەتكىزدى. ارادا بىرەر مينۋت وتكەندە پاۆەل اكولزين (33-مينۋت) ەسەپ ايىرماسىن قىسقارتسا, رومان ستارچەنكو (34-مينۋت) تارازى باسىن تەڭەستىردى.
ءۇشىنشى كەزەڭدە كوماندالار تاعى دا ءبىر-ءبىر شايبامەن الماستى. العاش 52-مينۋتتا «امۋر» ساپىنان سەرگەي تەرەششەنكو كومانداسىنىڭ ءتورتىنشى گولىن سوقسا, ىلە-شالا نيكيتا ميحايليس ەسەپتى 4:4-كە جەتكىزدى. ال قوسىمشا ۋاقىتتا جاعداي وزگەرمەگەن سوڭ, بارلىق ماسەلە بۋلليت سەرياسىندا شەشىلدى. ناتيجەسىندە, ەكى مارتە ناتيجەلى سوققى جاساعان رومان ستارچەنكو «بارىسقا» جاڭا جىلداعى العاشقى جەڭىستى سىيلادى. ەكى كوماندا بۇگىن تاعى دا ءوزارا باق سىنايدى.