قر پارلامەنت سەناتىنىڭ توراعاسى ماۋلەن اشىمباەۆ مەملەكەت باسشىسىنىڭ «Egemen Qazaqstan» گازەتىنە جاريالانعان «تاۋەلسىزدىك بارىنەن قىمبات» اتتى ماقالاسىن ەرەكشە ىقىلاسپەن وقىپ شىققانىن ايتتى. سەنات سپيكەرى ماقالاعا قاتىستى پىكىرىن فەيسبۋكتەگى پاراقشاسىندا جاريالادى, دەپ حابارلايدى Egemen.kz
ماۋلەن اشىمباەۆ پرەزيدەنتىمىز بۇگىنگە دەيىنگى جەتىستىكتەرىمىزدى وي ەلەگىنەن وتكىزىپ, الداعى ماقسات-مىندەتتەرگە نازار اۋدارعانىن اتاپ ءوتتى.
«مەملەكەتتىلىكتى نىعايتۋ, تاۋەلسىزدىكتى ساقتاۋ, ۇلتتى ۇلىقتاۋ باعىتتارى بويىنشا ءتيىستى ورگاندارعا ناقتى تاپسىرمالار دا بەرىلگەن. سوندىقتان بۇل ەڭبەكتى باعدارلامالىق قۇجاتتىڭ جۇگىن ارقالاعان دۇنيە دەۋگە تولىق نەگىز بار», دەدى سەنات توراعاسى.
ونىڭ ايتۋىنشا, ماقالادا ەگەمەن ەلىمىزدىڭ باعىت-باعدارى, قوعامدى الاڭداتقان وزەكتى ماسەلەلەر, جاھاندانۋ داۋىرىندەگى جاڭا سىن-قاتەرلەر بويىنشا سۇراقتارعا ناقتى جاۋاپ بەرىلگەن. اسىرەسە, مەملەكەتتىڭ جەرىنە قاتىستى كەلتىرىلگەن پايىمدار حالىق تاراپىنان تولىق قولداۋ تابۋدا. مەملەكەت باسشىسى اتاپ وتكەندەي, شىن مانىندە, بىزگە وسىناۋ ۇلان-عايىر اۋماقتى سىرتتان ەشكىم سىيعا تارتقان جوق. بۇل جەر – ەجەلدەن قازاقتىڭ اتا قونىسى, قاستەرلى مەكەنى.
«مەملەكەتتىك ءتىلدى دامىتۋعا, قانداستار كوشىن ءارى قاراي جانداندىرۋعا, شەكارا ماڭىنداعى اۋىلداردى وركەندەتۋگە قاتىستى ايتىلعان ۇسىنىستار جۇرتشىلىقتىڭ ەرەكشە قىزىعۋشىلىعىن تۋدىرىپ وتىر. وعان ماقالا جاريالانعالى بەرى بۇقارالىق اقپارات قۇرالدارى مەن الەۋمەتتىك جەلىلەردە ايتىلىپ, جازىلىپ جاتقان پىكىرلەر ايقىن دالەل. ناۋرىز مەيرامىن اتاپ ءوتۋدىڭ جاڭا تۇجىرىمداماسىن دايىنداۋ باستاماسى دا حالىقتىڭ بەرەكە-بىرلىگىن نىعايتۋ جولىنداعى ماڭىزدى قادام ەكەنى انىق. پرەزيدەنتىمىزدىڭ الاش ارىستارىنىڭ اسىل مۇراسىن يگەرۋ جالعاسا بەرەتىنى تۋرالى ايتقان ءسوزى دە كوپشىلىكتىڭ كوڭىلىنەن شىققانى داۋسىز», دەپ جازدى ماۋلەن اشىمباەۆ.
سەنات سپيكەرى بيىل تاۋەلسىزدىگىمىزدىڭ 30 جىلدىعىمەن بىرگە ازاتتىقتىڭ اق تاڭىن جاقىنداتا تۇسكەن جەلتوقسان وقيعاسىنىڭ 35 جىلدىعى تۋرالى دا ءسوز ەتتى.
«حالقىمىزدىڭ باسىنان وتكەن الاپات اشارشىلىقتىڭ العاشقى كەزەڭى – 1921-1922 جىلدارداعى ناۋبەتتەن بەرى دە 100 جىل ءوتتى. سونداي-اق, الەمدىك شەجىرەدە تەڭدەسسىز شەشىم بولىپ سانالاتىن سەمەي پوليگونىنىڭ جابىلعانىنا 30 جىل تولادى.مۇنىڭ ءبارى ءبىزدىڭ تاريحىمىز. ال, تاريحتى دارىپتەۋ – بارشامىزدىڭ ابىرويلى مىندەتىمىز. سول سەبەپتى, پرەزيدەنتىمىز ۇلتىمىزدىڭ وتكەنىنە تاۋەلسىز كوزقاراسپەن قارايتىن كەز كەلگەنىن, عالىمدارىمىز بەن تاريحشىلارىمىز بۇل باعىتتا اۋقىمدى جۇمىس اتقارۋ قاجەتتىگىن ناقتى اتاپ ءوتتى. وسى ورايدا مەملەكەت باسشىسىنىڭ فيلم ءتۇسىرۋ ىسىندە تاريحي تاقىرىپتارعا باسىمدىق بەرۋ تۋرالى تاپسىرماسىنىڭ ماڭىزى زور», دەدى ول.
ماۋلەن اشىمباەۆ پرەزيدەنت ماقالاسىندا ايتىلعان جالاڭ ۇرانعا بوي الدىرۋ جايىن دا ءسوز ەتتى. سونداي-اق, ماقالاداعى قورشاعان ورتانى قورعاۋعا قاتىستى ايتىلعان ويلار تابيعاتتى ايالاۋدا ءار ازامات جاۋاپتى ەكەنىن جانە اركىم ناقتى ىسپەن ۇلەس قوسۋ قاجەتتىگىن انىق كورسەتەتىنىن دە اتاپ ءوتتى.
«قاسىم-جومارت كەمەل ۇلى ماقالادا ساياسي-ەكونوميكالىق رەفورمالاردىڭ دا جۇيەلى تۇردە جالعاساتىنىن قاداپ ايتتى. وسى باعىتتاعى اۋىل جانە كەنت اكىمدەرىن سايلاۋ باستاماسى ەلىمىزدە ساياسي جاڭعىرۋدىڭ جاڭا كەزەڭىنە جول اشادى دەپ سەنەمىز. پرەزيدەنتىمىز ايتقانداي, ءبىزدىڭ ماقساتىمىز – كەلەر بۋىنعا قازاقستاندى تۇعىرى بەرىك, ەكونوميكاسى قۋاتتى, رۋحى اسقاق مەملەكەت رەتىندە تابىستاۋ جانە سول ىستەردى لايىقتى جالعاستىراتىن جاسامپاز ۇرپاق تاربيەلەۋ. مۇنداي جۇمىستارعا ارقايسىمىز اتسالىسۋىمىز قاجەت», دەپ جازدى سەنات توراعاسى.
م.اشىمباەۆ ءوز جازباسىندا مەملەكەت باسشىسى اتالعان ماقالا ارقىلى مەملەكەتتىلىكتى كۇشەيتۋگە جانە يدەولوگيالىق جۇمىستارعا قاتىستى ەلىمىزدىڭ الدىندا تۇرعان نەگىزگى باسىمدىقتاردى انىقتاپ بەرگەنىن باسا ايتتى.
«بۇل باعىتتاعى بارلىق باستامانى تابىستى ىسكە اسىرۋ ءۇشىن سەنات زاڭنامالىق تۇرعىدان قولداۋ كورسەتۋگە, تاۋەلسىزدىگىمىزدىڭ قادىر-قاسيەتىن ارتتىرۋعا جانە ەلدىگىمىزدى ەڭسەلى ەتۋگە ءوز ۇلەسىن قوسادى», دەپ تۇيىندەدى سەنات سپيكەرى.