نيك فيلدينگ «Sunday Times» گازەتىندە اعا رەپورتەر جانە «Mail on Sunday» گازەتىندە باس رەپورتەر بولعان. بريتانيالىق جازۋشى, جۋرناليست وكسفورد ۋنيۆەرسيتەتىنىڭ پروفەسسورى قىزمەتىن دە اتقارعان.
ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى ءباسپاسوز جانە باسپا ءىسى كافەدراسىنىڭ اعا وقىتۋشىسى, تانىمال جۋرناليست عالىمجان بايىمبەتتىڭ ۇيىمداستىرۋىمەن وتكەن ونلاين كەزدەسۋدە نيك فيلدينگ ءوزىنىڭ گازەتتەگى باي تاجىريبەسىمەن ءبولىستى. اسىرەسە ءجۋرناليستىڭ قوعامدا رەزونانس تۋدىرعان زەرتتەۋلەرى ماگيسترانتتاردى دا بەي-جاي قالدىرمادى.
ونلاين كەزدەسۋ بارىسىندا بريتانيالىق جۋرناليست نيك فيلدينگ «The Correspondent» جۋرنالىندا جۇمىس ىستەپ جۇرگەن كەزدەگى مەملەكەتتىك بالالار ۇيىندەگى جاسوسپىرىمدەردىڭ زاڭسىز ارەكەتتەرمەن اينالىسقانى, ناركوتيك قابىلداپ, ىشىمدىك ىشكەندىگى تۋرالى انىقتاعانىن ايتتى. جۋرناليستىك زەرتتەۋ ناتيجەسىندە قىلمىستىق ءىس قوزعالىپ, جاۋاپتى مامانداردىڭ كوپشىلىگى جاۋاپكەرشىلىككە تارتىلعان.
نيك فيلدينگتىڭ جۋرناليستىك زەرتتەۋلەرىنىڭ ىشىندە كوپشىلىكتىڭ قىزۋ قولداۋىنا يە بولعان ماقالاسى – تەڭىز ارىستاندارىنىڭ (يتبالىقتىڭ ءبىر ءتۇرى) زاڭسىز تۇردە انگليادان فرانتسياعا ساتىلۋىنا بايلانىستى وقيعا. وقيعانى زەرتتەۋگە بىرنەشە اي زەرتتەۋ جۇرگىزگەن جۋرناليستكە گازەت وقىرماندارى قارجىلاي كومەك بەرىپ, ناتيجەسىندە يتبالىق انگلياعا قايتارىلعان.
جۋرناليست بريتاندىق عالىمدارمەن بىرگە ارحەولوگيالىق قازبا جۇمىستارىنا قاتىسىپ, دينوزاۆردىڭ تولىققاندى سۇيەكتەرى مەن فورماسىن تابۋعا اتسالىسادى. نيك فيلدينگتىڭ وسى كەزدەگى زەرتتەۋى كەلەسى ءبىر ماقالاسىنا تۇرتكى بولعان. ارحەولوگيالىق قازبا جۇمىستارىنىڭ ناتيجەسىندە ەجەلگى دينوزاۆر سۇيەكتەرى مەن باسقا دا قۇندى زاتتاردىڭ قارا بازاردا ساتىلۋى جايلى دەرەكتەردى انىقتاعان. «قوعامدىق رەزونانس تۋدىرعان جۋرناليستىك زەرتتەۋ كەلەسى ءبىر قىلمىستىق ءىستىڭ اشىلۋىنا سەبەپ بولدى. تاجىريبەلى جۋرناليست وقىرماندى ارەكەتكە يتەرمەلەۋ اۆتوردىڭ ءوز قولىندا», - دەيدى.
نيك فيلدينگ افريكاعا ساپارى, تەرروريزم تاقىرىبىندا جازعان بىرقاتار ماقالالارىنا توقتالدى. ەرەكشە تەرروريست تۋرالى زەرتتەۋىندە اۋقاتتى وتباسىدان شىققان, لوندون ۋنيۆەرسيتەتىنىڭ تۇلەگى, شاحماتتىڭ چەمپيونى بولعان پاكىستاندىق جىگىتتىڭ يگيل-ءدىڭ مۇشەسى بولىپ, تاعدىرىنىڭ كۇل-تالقانى شىققانى جايلى جازعان. جاستارمەن سۇقبات بارىسىندا ساياسي تاڭداۋ جاساۋدا جاۋاپكەرشىلىكتىڭ ماڭىزىن ءتۇسىندىردى.
بريتاندىق جازۋشى, جۋرناليستپەن بولعان سۇقباتتا قازاقستاننىڭ تاريحىنا قاتىستى بىرقاتار ماسەلەلەر كوتەرىلدى. ول قازاقستاندا ارحەولوگيالىق قازبا بايلىعىنىڭ وتە كوپ ەكەندىگىن, جاستاردىڭ ونى زەرتتەۋگە كوڭىل ءبولۋ قاجەتتىگىن ەسكەرتتى.
حالىقارالىق جۋرناليستيكا ماگيستراتۋرا ءبىلىم الۋشىلارى قاشىقتان وقۋ بارىسىندا بىرقاتار بريتانيالىق جۋرناليستەرمەن ونلاين كەزدەسىپ, دارىستەرىن تىڭدادى. ءبىر ايتا كەتەرلىگى, شەتەلدىك ارىپتەستەرمەن وتكىزىلگەن كەزدەسۋلەردىڭ بارلىعى اعىلشىن تىلىندە جۇرگىزىلدى. ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ بولاشاق ماگيسترلارى بريتاندىق جۋرناليست, عالىمدارمەن ەركىن پىكىر الماسىپ, عىلىمي ەسسە جازۋدا. وسىلايشا ۋنيۆەرسيتەت بىلىكتى جۋرناليستەردىڭ ارتۋىنا ءوز ۇلەسىن قوسپاق.